Read kumam Ageini 14 Bible Online

Ageini 14 - kumam bible

Ageini 14

¹I kare ka Abaka Amurapel me Sinar kede Abaka Ariok me Elasa, Abaka Kedolaomer me Elam, kede Abaka Tidal me Goim,

²abakai nogi bin oko ribere di kiko yi kede Abaka Bera me Sodoma kede Abaka Birusa me Gomora, kede Abaka Sinab me Adama, kede Abaka Semeber me Seboim, kede Abaka me Bela (arabo Soar).

³Abakai nogi bin oko ribere pi yi i aditot me Sidim kame nataman kolwongo be Nam Oto.

⁴Gin oudo kibedo tic ne Kedolaomer pi mwakini tomon kiwie are, do i mwaka me tomon kiwie adek mere, gin kiko jemo ne.

⁵I mwaka me tomon kiwie ongwon mere, Kedolaomer karacel kede abakai kame bin en eribere kede oko bino pi yi di kiko bwono jo Repaim i Asiterot Karanaim, kede jo Susim i Kam, kede jo Emim i Sabe Kiriataim,

⁶kede jo me Kori i Seir piny me mori, di kiko donyo wapo gi kiton tuno Elparan kame tie i apokini kede wi tim.

⁷Di do gin kiko lokere kidok cen di kiko tuno Enmisupat (en Kades), di kiko yi kibwono piny me jo Amalek kede me jo Amor da, kame oudo bedo Kasason Tamar.

⁸Di do abaka me Sodoma, kede Abaka me Gomora, kede abakai me Adama kede me Seboim, kede abaka me Bela (en Soar) oko yai kioto di kiko yi i aditot me Sidim

⁹kede Abakai Kedolaomer me Elam, Tidal me Goim, Amurapel me Sinar, kede Ariok me Elasa; gin abakai ongwon nogo kiko yi kede abakai kany.

¹⁰Oudo bure kame kokunyo kiye emina opong i aditot me Sidim; manono oko mino kakame abakai me Sodoma kede Gomora oudo tie ringo kede tenge, gin kiko popoto i bure nogo, do jo ace kame bin oko dong, oko ringo i piny me mori.

¹¹Jokwor oko yako jamini dedede me Sodoma kede Gomora, kiton cam gi dedede di kiko girgi ot;

¹²kitero kiton Lot wot ka omin me Aburam, kame oudo bedo Sodoma; kiyako jamini mege di kiko yai kioto.

¹³Di do ngat acel kame bin oko lwi ki cing gi, oko bino di eko waco ne Aburam, ngat koudo obedo Ngaeburania, kame bin tie bedo i nget ejinga ka Mamure Ngamor, omin me Esikol kede Aner. Jo nogi oudo obedo jo kame konyo Aburam.

¹⁴Kakame Aburam owinyo kede be komako wot ka omin mere di oko tero, en eko telo jo mege kame bin konywalo i ode, jo kame oudo opwonyere kiber i yi, jo tol adek kede tomon kiwie kanyauni (318), di en eko ot wapo gi kiton tuno Dan.

¹⁵En eko pokopoko jo yi mege iwor pi ot suro gi, en kede jotic mege, di gin kiko bwono gi, kiko riamo gi kiton tuno Koba, kabedo kame tie tetu malo me Damasiko.

¹⁶En di do eko dwoko jamini dedede, kiton Lot wot ka omin mere da edwoko kede jamini mege, karacel kede mon kede jo icegun.

¹⁷Kakame bin Aburam odwogo kede, ingei en bwono Kedolaomer karacel kede abakai kame bin konye yi, abaka me Sodoma oko yai ot riamo kede i Aditot me Sabe (en Aditot me Abaka).

¹⁸Di Melkisedeki ngat koudo obedo abaka me Salem oko kelo mugati kede bwini; en oudo ebedo ngasaseredoti ka Rubanga Ngamalo Twal.

¹⁹En bin eko lamo ne winyo di ewaco be, “Rubanga Ngamalo Twal, ngat kocweo malo kede lobo mi Aburam winyo;

²⁰doko pwoc bed but Rubanga Ngamalo Twal, ngat kame komio jokwor ni i cingi!” Aburam bin oko mine acel me tomon me jame dedede kame en bin edwoko kibut jokwor.

²¹Di do abaka me Sodoma oko waco ne Aburam be, “Miango jo kame in imao do in iter jame.”

²²Do Aburam oko waco ne abaka me Sodoma be, “Ango atieko kwongere but Rwot Rubanga Ngamalo Twal, ngat kocweo malo kede lobo,

²³be likame ango abino tero akadi ausi arabo del me tweno amuka amoto gimoroni kame obedo meri, tetekeny kur in iwac be, ‘Ango en amio Aburam obaro.’

²⁴Ango likame abino tero gimoro pira, kwanyo kenekene gikame awobe na otieko camo, kede iner me jo kame oudo oko ot keda i yi: Aner, Esikol kede Mamure. Wek gin kiter iner gi.”