Read kumam Ageini 16 Bible Online

Ageini 16 - kumam bible

Ageini 16

¹Sarai dako ka Aburam oudo likame onywalo ne atin moro. Do oudo en etie kede atin nyako apasoit mere, kame bin nyinge Agar, kame oudo obedo dano me Misiri.

²Sarai bin oko waco ne Aburam be, “Neningo, ango Rwot otieko twona nywal; but kede apasoit na me wek amoto aud atin kibute.” Aburam di oko winyo kop ka Sarai.

³Di Sarai dako ka Aburam oko mino Agar, kame oudo obedo dano me Misiri, nyako kame bin tie apasoit mere, but cware Aburam pi doko dako mere. Manoni bin otimere di Aburam oudo otieko mwakini tomon i Kanan.

⁴Aburam bin oko buto kede Agar di Agar oko udo yie. Kakame Agar oko neno kede be en etieko udo yie, eko donyo neno Sarai kede acae.

⁵Di do Sarai oko bin waco ne Aburam be, “Rac kame kotimo na bed i wii! Ango en kame bin amio apasoit na buti, do nan kakame en eneno kede be yie tie, eko donyo nena kede acae. Rwot en kame do ngol kop i dierediere nango kedi!”

⁶Di Aburam oko waco ne Sarai be, “Neningo, apasoit nin tie i twer nin; tim ne bala kame in imito.” Di do Sarai oko donyo tere kirac, omio en eko ringo tenge kibute.

⁷Malaika ka Rwot oko ude i nget atan me pii kame bin tie i wi tim, atan kame bin tie i yongayo aoto Sur.

⁸Di eko penye be, “Agar, apasoit ka Sarai, in iwok ki tuai, doko itie ot tuai?” En di eko dwoko ne be, “Ango atie ringo Sarai dako kame ango oudo abedo i cinge.”

⁹Malaika ka Rwot oko waco ne be, “Dok bute di iko yei ne pugi.”

¹⁰Eko bobo waco ne be, “Abino mino ikwae ni nyai nyai kalikame kokaruno maro kede wel gi.

¹¹Neningo, nan in itieko udo yi, in ibino nywalo atin awobi di iko bino cako nyinge Isimael,[2] pien Rwot otieko winyo koko ni me can.

¹²En ebino bedo bala punda me obar; ebino suro jo dedede, doko jo dedede da bino sure; doko likame en ebino bedo kiber kede joawade mege dedede.”

¹³Agar oko penyere be, “Kom ateteni ango aneno Rubanga di ako dong kuo i cen me nene?” Manono oko mino en di do eko cako nying Rwot kame bin oyamo kede be, “In en El Roi.”[3]

¹⁴Manono en omio oko cako nying atan nono be Beerlakairoi;[4] en etie i dierediere me Kades kede Bered.

¹⁵Agar bin oko nywalo ne Aburam atin awobi di Aburam oko cako nyinge Isimael.

¹⁶Mwakini me dongo ka Aburam oudo tie ot kanyauni kiwie kanyape i kare kame Agar onywalo kede Isimael.