Read kumam Ageini 19 Bible Online

Ageini 19 - kumam bible

Ageini 19

¹Imalaikan are nogo oko tuno Sodoma otieno, di gin kiko udo Lot tie bedo i erute me bomba. Kakame Lot oneno gi kede, en eko yai eoto riamo kede gi, di eko riebere piny.

²En eko waco be, “Jodongo na, ango akwao wu ibinunu i oda, ango ngatic wu, di ikounu lwoko tienu di ikounu buto; di do odiko ikounu dilo yai di ikounu meede kede ot wu.” Gin kiko waco be, “Li; wan oyaro buto kacokere me bomba.”

³Do Lot oko dino gi tetek omio gin di do kiko yei kop mere di kiko ot i ode. En eko tedo negi cam aber kede mugati kame arup li iye, di gin kiko camo.

⁴Do di pwodi gin likame kibuto, cuo me bomba oko bwote, awobe kede cuo adongo, cuo dedede, gin kiko luko ot;

⁵di kiko lwongo Lot di kipenye be, “Cuo kame oudo obino buti otieno noni tie tuai? Kel gi ooko but wan kan, me wek wan obut kede gi.”

⁶Lot oko donyo ooko but gi di eko lokere eko cego ekeko.

⁷En eko waco negi be, “Imiegu na, ango akwao wu be kur itimunu gikarac kame rom kamano.

⁸Nenunu, ango atie kede anyira are kalikame pwodi ongeo icuo; wekunu ango akel gi ooko kan butu, di wun ikounu timo negi bala kame imitunu; kenekene kur itimunu gimoro i kom cuo gi, pien gin kitieko donyo i oda pi gwokere.”

⁹Do gin kiko waco ne be, “Orwa tenge! Kom in ibino kan bala ngakumbor, nan do imito be idok ngangolkop wan! Nan do wan oyaro timo nin gikarac kalamo gikame wan omito timo ne gin.” Di do gin kiko remoro Lot cen kitek di kiko nyiko i ekeko pi mito ture.

¹⁰Do cuo kame oudo tie i ot oko cwano cing gi di kiko wano Lot i ot but gi, di kiko cego ekeko.

¹¹Di gin kiko mino wang cuo kame oudo tie i ekeko oko to, awobe karacel kede cuo adongo, omio likame kiko karuno udo ekeko.

¹²Di do cuo are nogo oko penyo Lot be, “In itie kede dano ni moro ace kan? Idwe awobe ni amoto idwe anyira, cuog anyira ni arabo ngatamoro ace kame in itie kede i bomba kan; yai kede gi tenge ki kabedo noni.

¹³Pien wan oyapuno muducaro kabedo noni, pi koko kame tie i kom jo mege dwong twatwal i nyim Rwot; en komio en ecwao wan pi muducaro en.”

¹⁴Di do Lot oko ot but awobe kame oudo oyaro nyomo anyira mege di eko waco negi be, “Yaunu awakawaka, ootunu tenge ki kan; pien Rwot oyapuno muducaro bomba noni.” Do gin kiko tero kop mere tukotuko.

¹⁵Kakame piny oru kede, imalaikan oko burakino Lot di kiwaco ne be, “Yai awakawaka, ter dako ni kede anyira ni are kame tie kan, tetekeny kur muducaro ida kede bomba noni.”

¹⁶Do Lot oko mono gal, Rwot kisa oko make kede, omio imalaikan oko mako cinge, cing dako mere kede me anyira mege are nogo, di kiko tero gi oko me bomba.

¹⁷Kakame gin kitieko kelo gi kede oko me bomba, ngat acel oko waco negi be, “Ringunu tetekeny ilakunu kuo wu; kur ngatamoro ngoloro cen arabo ecungi i elet. Ringunu i mori tetekeny kur muducaro wu.”

¹⁸Do Lot oko waco negi be, “Okwe, jodongo na, likame kamano.

¹⁹In itieko timo bero ne ngatic ni, doko in itieko nyuto nango mwolo adwong ilako kuo na; do ango likame akaruno ringo tuno i mori, pien lworo bino mino peko nono maka i yongayo di ako to.

²⁰Neningo, bomba ca tie kakame iyapiyapi nango me ringo iye, doko en etitidi da. Wek ango aring kuno; bomba nono da gire titidi, ebino mino kuo na bwot.”

²¹En eko gamo be, “Mano ber, ango ayei kwac ni nono. Likame abino tuturo bomba kame in iwaco nono.

²²Susunyo, ring kuno, pien ango likame akaruno timo gimoro tuno di in itieko tuno kuno.” Pi mano, oko do lwongo bomba nono be Soar.[8]

²³Kakame Lot otuno kede Soar, ceng oudo otieko wok.

²⁴Di do Rwot oko mino salupa kede mac kame wok ki malo bute oko cwei Sodoma kede Gomora;

²⁵eko wango bomban nogo karacel kede elet, kede jo dedede kame oudo bedo i bomban nogo, kiton gi atui dedede kame oudo tie dongo kuno.

²⁶Do dako ka Lot, ngat kame oudo tie lube ki cen, oko ngoloro cen di eko lokere edoko epir me munyo.

²⁷Odiko sek oru mere, Aburaam oko ot kakame bin en oudo ecungo iye i nyim Rwot.

²⁸En di eko ngoloro piny tetu Sodoma kede Gomora, kede bad dedede me elet di eko neno yiro me lobo nono duny malo bala yiro kame duny i epipa me cwako nyonyo.

²⁹Manono en gikame oko timere i kare kame Rubanga omuducaro kede bomban kame oudo tie i elet, en bin eyutuno Aburaam di eko mino Lot obwot i kare nono kame en bin emuducaro kede bomban kame Lot oudo bedo iye.

³⁰Lot bin oko yai ki Soar, en karacel kede anyira mege are di eko ot bedo i abo i wi moru pien oudo elworo bedo Soar.

³¹Di nyako kao oko waco ne nyako atidi be, “Papa wa tie ti, aso di likame tie icuo moro i wi lobo kan kame bino buto kede wa di lubere kede itok me wi lobo.

³²Bia omi papa wa mat bwini di wan oko buto kede, tetekeny onywal idwe kede papa wa.”

³³Aso, iwor nono gin di kiko mino papa gi oko mato bwini di nyako kao oko buto kede papa mere. Papa mere bin likame oko ngeno gi kotimere.

³⁴Oru mere nyako kao oko waco ne nyako atidi be, “Neningo, ango oki abuto kede papa na iwor. Mito nat bobo omie emat bwini iwor, di ida iko ot buto kede, tetekeny onywal idwe kede papa wa.”

³⁵Aso, di gin kiko mino papa gi omato bwini bobo iwor nono, di nyako atidi da oko buto kede papa mere. Papa mere bin likame oko ngeno gikame oudo otimere.

³⁶Iepone nono, anyira ka Lot bin oko yac kede papa gi.

³⁷Nyako kao bin oko nywalo atin awobi di eko cako nyinge be Moab; en nono kame ebedo kwaru me jo Moab kiton tuno tin.

³⁸Nyako atidi da bin oko nywalo atin awobi di eko cako nyinge be Benami; en nono kame ebedo kwaru me jo Amon kiton tuno tin.