Read kumam Ageini 2 Bible Online

Ageini 2 - kumam bible

Ageini 2

¹Epone noni en kame bin kotieko cweno kede malo kede lobo, kede twon jamini dedede kame tie i yi gi.

²Di ceng me kanyaare otuno, Rubanga oudo otieko do tic mere, en eko wei i ceng me kanyaare ki tice kame oudo ebedo timo.

³Aso, Rubanga oko mino ceng me kanyaare winyo, eko mine ebedo ceng acil, piento en ewei i ceng nono ki tice kame oudo en ebedo timo me cwec.

⁴Manoni en epone kame malo kede lobo ocakere kede i kare kame kocweo gi kede. Kakame Rwot Rubanga ocweo kede lobo kede malo,

⁵yen me obar oudo pwodi likame tie i wi lobo, doko oudo likame tie kodi moro kotieko tui, pien Rwot Rubanga oudo pwodi likame omio kot ocwei i wi lobo, doko dano kame puro lobo da oudo pwodi li,

⁶do pii oudo wok ki piny di eko bido wi lobo dedede.

⁷Di do Rubanga oko kwanyo apua me lobo eko cweno kede dano, eko kuto i ume wei kame mio kuo, di dano oko doko gikame kuo.

⁸Di Rwot Rubanga oko keto poto i Eden, i bad tetu kide, di eko keto iye dano kame en ecweo.

⁹Rubanga oko mino yen dedede kame neno beco, kede kame ber me acama otui i lobo; i dier poto oudo tie iye yat kame mio kuo, kede yat kame mio ngec me gikame ber kede gikame rac.

¹⁰Ecilet oudo mol ki Eden kame bido poto nono; ki kanono en epokere eko doko icileta ongwon.

¹¹Me agege nyinge Pison, en emol eluko lobo me Kabila lung, kakame saabu tie iye;

¹²saabu me lobo nono ber; odok angwe kur kame kolwongo be deliam kede kide me wel amalo kame kolwongo be onik da tie iye.

¹³Ecilet me are nyinge Gikon, en emol eluko lobo me Kus lung.

¹⁴Ecilet me adek nyinge Tigiris, en kame emol eoto i bad tetu kide me Asiria. Ecilet me ongwon mere nyinge Eupurate.

¹⁵Rwot Rubanga oko keto dano i poto me Eden pi pure kede pi gwoke.

¹⁶Rwot Rubanga oko ciko dano be, “In itwero camo anyakini dedede me yen kame tie i poto;

¹⁷do likame ibino camo anyakini me yat kame mio ngec me gikame ber kede gikame rac, pien ceng kame ibino came kede in ibino to.”

¹⁸Di Rwot Rubanga oko waco be, “Likame eber ne dano bedo kene; abino timo ne ngakonye kame poore ne.”

¹⁹Rwot Rubanga oko kwanyo lobo eko timo kede leini dedede me obar kede winy dedede me wi yamo, di en eko kelo gi but dano pi neno epone me cako negi nying gi; nying kame dano oko mino gikame kuo acelacel oko doko nyinge.

²⁰Dano oko mino leini me paco dedede nying gi, kede winy me wi yamo, kede leini dedede me obar; do dano oudo likame tie kede ngakonye kopoore ne.

²¹Aso, Rwot Rubanga oko mino dano onino kitek, di eko kwanyo esep mere acel, eko mwono kare kede ringokom.

²²Esep kame oudo Rwot Rubanga okwanyo ki kom dano nono eko timo kede dako di eko kele but dano.

²³Di dano oko waco be, “Nan do man en cogo me cogere na, kede ringo me ringokoma; kobino lwonge be dako, pien kokwanye ki kom icuo.”[1]

²⁴Pi mano, icuo weko papa mere kede toto mere eko moko i kom dako mere, di gin kiko doko kom acel.

²⁵Icuo kede dako oudo bedo nono, do likame lewic oudo mako gi.