Read kumam Ageini 22 Bible Online

Ageini 22 - kumam bible

Ageini 22

¹Di do mago otieko timere, Rubanga oko tamo Aburaam. En elwonge be, “Aburaam!” Di Aburaam oko gamo be, “Ango ine.”

²Rubanga oko waco ne be, “Ter wodi Isaka, en wodi acel kenekene kame in imaro twatwal. Ot kede i lobo me Moria kakame in ibino mine iye bala giayala awanga i wi moru kame ango abino nyuto ni.”

³Odiko sek oru mere, Aburaam oko yai di eko belo yen me amoka pi giayala awanga. En eko tweno yec i ngei punda di eko yai kede jotic mege are karacel kede wode Isaka. En eyai eko ot kede gin kakame Rubanga oudo onyuto ne.

⁴I ceng me Adek mere Aburaam oko tingo wange malo di eko neno kabedo nono i kakabor.

⁵Aburaam di oko waco ne jotic mege be, “Wun bedunu kane kede punda. Ango abino ot kede awobi kuno di oko woro Rubanga, di do oko dwogo butu.”

⁶Aburaam oko kwanyo yen me moko mac di eko mino Isaka yeno di en eko mako mac kede pala. Kakame oudo kitie ot kede di kiupere,

⁷Isaka oko waco ne papa mere be, “Papa!” Di Aburaam oko gamo be, “Ango ine woda.” Isaka oko penye be, “Wan otie kede mac kede yen, do oromo kame oyaro wango me yalo Rubanga tie tuai?”

⁸Aburaam oko gamo be, “Woda, Rubanga kikome en kame bino mino wan oromo kame obino wango me yale.” Gin di do kiko meede kede ot karacel.

⁹Kakame do gin kiko tuno kede kabedo kame Rubanga oudo onyuto ne, Aburaam oko gero Alutari di eko napo yen iye. Di do eko tweno Isaka wode di eko piele i wi yen kame en oudo enapo i alutari.

¹⁰Aburaam di do oko kwanyo pala pi ngolo wode.

¹¹Do malaika ka Rwot oko lwonge ki malo be, “Aburaam, Aburaam!” En di eko gamo be, “Ango ine.”

¹²Malaika oko waco ne be, “Kur iket cingi i kom atin ni arabo timo ne gimoro arac; pien ango nataman do atieko ngeno be in ilworo Rubanga, pien in likame icere na kede wodi, en wodi acel kenekene.”

¹³Aburaam oko tingo wange malo di eko neno oromo di tunge omoko i jange me yat. Aburaam oko ot di eko kwanyo oromo nono eko kelo di eko mino but Rubanga bala giayala awanga akaka wode.

¹⁴Aburaam di do oko cako nying kabedo nono be, “Rwot bino mino”, bala kame koyamo kede tuno tin be, “Rwot mio ki wi moru mere.”

¹⁵Malaika ka Rwot bobo oko lwongo Aburaam ki i malo tien me are mere

¹⁶di eko waco ne be, “Rwot owaco be, ‘Ango atieko kwongere kede nyinga kena be: pi gikame in itimo noni, me weko cere na kede wodi, en wodi acel kenekene,

¹⁷ango ateteni abino mini winyo. Abino mino ikwae ni bedo tot bala acer me malo kede asinge me dog nam. Gin kibino bwono jokwor gi di kiko mano bomban gi.

¹⁸Atekerin dedede me lobo kobino mino winyo pi ikwae nin, pien in ilubo kop na.’ ”

¹⁹Aburaam di do oko dok but jotic mege, di en eko yai kede gin karacel, kiko ot Beereseba, kakame Aburaam oko donyo bedo iye.

²⁰Di do mago otieko timere, oko waco ne Aburaam be, “Milika da otieko nywalo idwe ne omini Nakor:

²¹Us en atin kao mere. Imiegu mege obedo Bus, Kemuel papa me Aram,

²²Kesed, Kaso, Pilidas, Jidilap kede Betuel.”

²³Betuel oko nywalo Rebeka. Milika bin onywalo ne Nakor omin me Aburaam idwe kanyauni nogi.

²⁴Nakor oudo bobo tie kede dako ace kame nyinge bin Reuma. Reuma da bin oko nywalo Teba, Gakam, Takas kede Maka.