Read kumam Ageini 26 Bible Online

Ageini 26 - kumam bible

Ageini 26

¹Kikano kec ace bobo oko poto i lobo nono, weko maca kame oudo obedo tie i kare ka Aburaam. Isaka oko ot Gerar, but Abimelek abaka me Pilistia.

²Rwot oko nyutere but Isaka di eko waco ne be, “Kur iot Misiri; bedi i lobo kame ango abino nyuto ni.

³Bedi i lobo nono bala ngakumbor, ango abino bedo tie kedi, doko abino mini winyo. Pien ango abino mini karacel kede ikwae ni lobere nogi dedede, doko abino cobo cikere kame bin atimo but papa ni Aburaam.

⁴Abino mino ikwae ni bedo tot bala acer kame tie malo, di ango ako bino mino gi lobo noni dedede. Atekerin dedede me wi lobo bino udo winyo pi ikwae ni,

⁵pien Aburaam owinyo dwana di eko gwoko cik kede iswilia na.”

⁶Aso, Isaka oko bedo Gerar.

⁷Kakame cuo me kuno openye kede kop i kom dako mere, en eko waco negi be, “En ebedo amina.” En oudo etie kede lworo pi waco be Rebeka obedo dako mere, pien oudo eparo be cuo me kuno bino neke di kiko tero dako mere, pien Rebeka oudo cil twatwal.

⁸Kakame Isaka otieko bedo kede kuno pi kare moro, Abaka Abimelek me Pilistia oko neno ki dirisa di Isaka tie gwagwako dako mere Rebeka.

⁹Abimelek oko lwongo Isaka di eko waco ne be, “Mere dako ni ino! Pinyo komio oudo iwaco be en ebedo amini?” Isaka oko waco ne be, “Pien ango oudo aparo be kobino neka pire ka awaco be en dako na.”

¹⁰Abimelek oko waco be, “Itimo ne wa kamano pinyo? Icuo moro oudo romo buto kede dako nin, di koto iko mino wan odonyo i raco.”

¹¹Aso, Abimelek oko kwenyaro jo mege di ewaco negi be, “Ka ngatamoro otimo gimoro arac ne icuo ni arabo ne dako mere, kobino neke.”

¹²Isaka oko puro kodi i lobo nono, mwaka nono eko udo cam kame kalamo kodi kame oudo epuro tien tol acel. Rwot omie winyo,

¹³di en eko medo ameda baro; emedo lony ameda tuno di eko baro adikinicel.

¹⁴Oudo etie kede romini kede dok, kede jotic atot, omio jo me Pilistia oko bedo kede nyeko bute.

¹⁵Gin kiko cuculo ataneko kame bin jotic ka papa mere Aburaam okunyo di pwodi Aburaam oudo kuo.

¹⁶Abimelek oko waco ne Isaka be, “Yai tenge kibut wa; in do itieko doko tek kalamo wan.”

¹⁷Aso, Isaka oko yai, eko ot guro eema mere i aditot me Gerar, eko donyo bedo kuno.

¹⁸En eko bobo medo kukunyo ataneko kame bin kokunyo i kare ka papa mere Aburaam, pien jo me Pilistia oudo ocuculo gi ingei to ka Aburaam; en eko bobo cako negi nying kame papa mere bin ocako negi.

¹⁹Do kakame jotic ka Isaka okunyo kede aditot kanono di kiko udo atan amol,

²⁰jokwat me Gerar oko lok kede jokwat ka Isaka di kiwaco be, “Pii no obedo merwan.” Omio en eko cako ne atan nono nyinge be Esek,[11] pien gin kilok kede en.

²¹Jotic ka Isaka oko bobo kunyo atan ace, di kiko bobo lok pi manono da; en eko lwongo atan nono be Sitina.[12]

²²En eko dak ki kuno di eko bobo kunyo atan ace, lok likame oko bedo tie pi manono; en eko lwongo atan nono be Rekobot,[13] pien ewaco be, “Nan do Rwot otieko mino wa kabedo, obino do nywal oko nyai i lobo noni.”

²³Isaka oko yai di eko ot Beereseba.

²⁴Iwor nono Rwot oko nyutere bute di oko waco ne be, “Kur ibed kede lworo; ango Rubanga ka papa ni Aburaam, ango atie kedi. Ango ayaro mini winyo di ako bino mini ikwae atot pi cikere na but ngatic na Aburaam.”

²⁵Isaka di oko gero alutari kanono di eko woro Rubanga, di eko guro eema kanono. Jotic ka Isaka oko bobo kunyo atan ace kanono.

²⁶Abimelek oko yai ki Gerar, karacel kede Akusat ngat koudo mie tam, kede Pikol ngadwong me isirikalen mege, kiko bino but Isaka.

²⁷Isaka oko penyo gi be, “Pinyo komio wun ibinunu buta, do di wun oudo idaganu, doko ikounu riama tenge kibutu?”

²⁸Gin kiko waco be, wan oneno kakaler be Rwot tie kedi; omio wan oko waco be poore wan okwongere kede in, di oko timo isikan kedi,

²⁹tetekeny kur in itim ne wa raco moro, bala kame wada likame otimo ni kede raco moro, do kenekene otimo ni bero di oko cwani tenge kede mulem. In nan itie do ngat kame Rwot otieko mino winyo.

³⁰Isaka oko iiko negi cam, di kiko cam kede amata.

³¹Gin kiko dilo yai odiko sek di kiko timo ikwong but ngati kede but ngat ca; Isaka oko peruno gi kede amot, di gin kiko yai kibute kede mulem.

³²Cenge nono jotic ka Isaka oko bino di kiko waco ne kop i kom atan kame gin oudo kikunyo; gin kiwaco ne be, “Wan otieko udo pii!”

³³En eko lwongo atan nono be Siba;[14] nying bomba me Beereseba owok ki nying atan nono.

³⁴Kakame Esau oromo kede mwakini ot ongwon (40), en eko nyomo mon are me jo Kiti, Yudis nyar ka Beeri, kede Basemat nyar ka Elon.

³⁵Mon nogi oko mino Isaka kede Rebeka obedo kede kuo me cwercuny.