Read kumam Ageini 27 Bible Online

Ageini 27 - kumam bible

Ageini 27

¹Kakame bin Isaka oti kede, di wange oko doko mwadamwada likame ekaruno neno piny, en eko lwongo Esau wode adwong di eko waco ne be, “Woda”, en eko dwoko be, “Ango ine.”

²Isaka oko waco be, “Neningo, ango atieko ti, likame angeo ceng me to na.

³Nan kwany jamini me dwar, isau me imalia kede yat me gweno emal, di iko ot itela dwar di iko neko na le moro;

⁴di iko iiko na cam imiela kame cunya maro, di iko kelo na acami, tetekeny alam ni winyo di likame pwodi ato.”

⁵Aso, Rebeka oudo tie winyo di Isaka yamo kede wode Esau. Di do kakame Esau ooto kede itela pi dwaro le moro enek di eko kelo,

⁶Rebeka oko waco ne wode Yakobo be, “Ango awinyo di papa ni waco ne wode Esau be,

⁷‘Oti idwar iko neko le moro iko kelo ited na cam imiela acami, tetekeny ako lamo ni winyo i nyim Rwot di likame pwodi ato.’

⁸Pi mano, woda yei winyo kop kame atie waco ni.

⁹Oti i anok iko yero na diegi are ayapak, tetekeny anek gi di ako tedo ne papa ni cam imiela kame cunye maro;

¹⁰di in iko tero ne papa ni pi camo, tetekeny elam ni winyo di likame pwodi eto.”

¹¹Do Yakobo oko waco ne toto mere Rebeka be, “Neningo, Esau obedo dano kame yer oswapo i kome, do komango pwot.

¹²Cengemogo papa na romo rarapo ango di eko tero bala ango atie nyware, manoni bino mino audo ilam arac akaka winyo.”

¹³Toto mere oko waco ne be, “Woda, ka en elami wek ilam nono dwog i wiango. Kenekene in winy kop nango, oti di iko kelo nango diegi nogo.”

¹⁴Aso, Yakobo oko ot di eko kelo ne toto mere diegi nogo, di toto mere oko tedo ne papa gi cam kame cunye maro.

¹⁵Rebeka oko kwanyo igoen ka Esau abeco, kame oudo tie i ode, di eko ngapo ne Yakobo wode atidi.

¹⁶Di en eko tweno launi me diegi nogo i bad Yakobo kede i ngute kakame li kede yer.

¹⁷En eko mino wode Yakobo cam imiela kede mugati kame en oudo etedo, pi tero.

¹⁸Aso, Yakobo oko donyo but papa mere di eko waco be, “Papa”; Isaka oko gamo be, “Woda, in ngai?”

¹⁹Yakobo oko waco ne papa mere be, “Ango Esau wodi kao. Atieko timo gikame oudo iwaco na. Nan yai do icami le kame aneko ni, me wek imia winyo.”

²⁰Do Isaka oko penyo wode be, “Woda, in isusunyo twero udo le nono benyo benyo?” En eko dwoko be, “Pien Rwot Rubanga ni en komia aude.”

²¹Isaka oko waco ne Yakobo be, “Woda, bia i ngeta me wek ararapo in pi ngeno ka ateteni in ibedo woda Esau arabo li.”

²²Aso, Yakobo oko ot but papa mere Isaka di Isaka oko rarapo en di eko waco be, “Dwani winyere bala dwan Yakobo, do badi cal bala me Esau.”

²³Isaka likame oko twero ngene, pien bade oudo yer oswapo iye bala bad omin mere Esau; aso en eko yei lamo ne winyo.

²⁴Isaka oko bobo penye be, “Ateteni in en woda Esau?” En eko dwoko be, “Ango inononi.”

²⁵Isaka oko waco be, “Kel cam nono buta me wek acam le kame in woda ineko na di ako lamo ni winyo.” En eko mine cam di eko camo; eko kelo ne bwini da eko mato.

²⁶Di papa mere Isaka oko waco ne be, “Woda nyikini iyapiyapi di iko nota.”

²⁷Aso, Yakobo oko nyiko bute di oko note. Isaka oko ngweno igoen ka Yakobo di eko mine winyo di ewaco be, “Ngwece me cilokom woda cal bala ngwece me poto kame Rwot omio winyo.

²⁸Akwao Rubanga emii toyo kame wok ki malo, kede lobo amio, kede emii engano atot kede bwini.

²⁹Akwao be poore jo bed jotic nin, kede atekerin bed jo kame luro i nyimi. Akwao be in ibed kede loc i kom imiegu ni, doko ikwae ka toto ni miero lur i nyimi. Ilam arac mak jo kame lami kirac, kede winyo bed ne jo kame lamo ni winyo!”

³⁰Cucuto di Isaka otieko mino Yakobo winyo, di pwodi Yakobo oyai ayaa kibut papa mere, omin mere Esau oko dwogo ki dwar mere.

³¹Eda eko tedo cam imiela di eko tero ne papa mere. En eko waco ne papa mere be, “Papa, yai malo icam le kame ango wodi aneko ni, tetekeny imia winyo.”

³²Isaka papa mere oko penye be, “In ngai?” En eko dwoko be, “Ango wodi kao Esau.”

³³Kom Isaka oko donyo miel teltel di eko waco be, “Do ngai ica kodwaro le di eko kelo nango ca? Ango ako came di pwodi likame in ibino, di do ango ako mine winyo, ebo winyo nono do tie mere atwal!”

³⁴Kakame Esau owinyo kede kop kame papa mere owaco, en eko kok kitek kede twon wangcuny, di eko waco ne papa mere be, “Papa miada winyo!”

³⁵Do Isaka oko dwoko be, “Omini obino kan i yore me angalo di eko tero winyo nin.”

³⁶Esau oko waco be, “Mam ebedo gi kopoore pi cako ne nyinge be Yakobo? Piento en etieko umere i nyinga nan odoko tien are. Oudo etero twero na me atin kao, nan doko etero winyo na da.” Di do eko penyo Isaka be, “Likame iweko nada winyo moro?”

³⁷Isaka oko dwoko ne be, “Ango atieko mine edoko ngaloc nin, doko atieko mine imiegu mege pi bedo jotic mege. Atieko mine engano kede bwini. Woda, nan do nyo bobo kame ango atwero timo ni?”

³⁸Esau oko penyo papa mere be, “Papa, in itie kede winyo acel kenekene? Okwe papa miada winyo!” Esau oko donyo koko.

³⁹Di papa mere Isaka oko dwoko ne be, “Neningo, paco nin bino bedo i lobo kalikame mio, kede kakame toyo me malo li kiye.

⁴⁰Ibino kuo kede epima, doko ibino bedo ngatic ka omini, do kame ijemo ne, ibino turo ayoko kame eketo i nguti.”

⁴¹Esau oko dingere kede Yakobo pi winyo kame papa mere omio Yakobo. En eko waco kene be, “Ceng me koko papa na oyapuno tuno, di do ango ako bino neko Yakobo.”

⁴²Rebeka oko winyo kop kame Esau awobi kao oudo tie iiko. Aso, Rebeka oko lwongo Yakobo wode atidi di eko waco ne be, “Omini Esau tie kwekweo cunye kede iik kame etie timo me neki.

⁴³Nan do, woda, yei winyo kop kame atie waco ni. Buny ringo but ominango Laban i lobo me Aran,

⁴⁴di in iko bedo kede en pi kare moro, tuno di cuny omini okwei,

⁴⁵tuno di gero ka omini okwei di wie oko wil kede gikame in itimo ne. Di do ango ako bino cwano dano moro pi omi ki kuno. Pinyo miero ango akei awobe na are dedede i ceng acel?”

⁴⁶Rebeka oko waco ne Isaka be, “Ango atieko ol kede mon ka Esau jo Kiti. Ka Yakobo da onyomo dako Ngakiti bala magonogi, dako kobedo anywali me lobo noni, kony nango me bedo kuo do udo li!”