Read kumam Ageini 34 Bible Online

Ageini 34 - kumam bible

Ageini 34

¹Ceng acel Dina nyar ka Lea kame enywalo kede Yakobo oko ot pi welao mon mogo me adul nono.

²Kakame Sekem ngat koudo obedo ngapug me kabedo nono onene kede, en wot ka Kamor dano me Kibi, en eko make di eko buto kede tetek.

³Cunye oko wane i kom Dina nyar ka Yakobo; ebedo kede amara bute di eko donyo yamo kede i yore me mwolo.

⁴Aso, Sekem oko waco ne papa mere Kamor be, “Nyoma nyako no.”

⁵Yakobo oko winyo be Sekem otimo emuna i kom nyare; do pi kite kame awobe mege oudo ooto kede i kwat, en kong eko dire tuno gin dwogo.

⁶Kamor papa me Sekem oko ot but Yakobo pi yamo kede,

⁷esawa nono en kame awobe ka Yakobo oudo tie dwogo kede ki itela. Kakame kiwinyo kede kop noni, cuny gi oko wang kede twon gero, pien Sekem oudo otimo raco adwong twatwal i Isirael pi ot buto kede nyar ka Yakobo; akodi tim nono likame poore atima.

⁸Do Kamor oko waco negi be, “Cuny woda tie i kom nyaru, okwe mienu nyako no enyomi.

⁹Wek obedunu joaoc; miunu wa onyom anyira wu di wuda ikounu nyomo anyira wa.

¹⁰Wun ibinunu bedo karacel kede wa; ibinunu bedo karamoro dedede kame cunyu mito, ibinunu bedo iye di itimunu tic me cato wil, doko da ikounu udo jamini amako wu kiye.”

¹¹Sekem da oko waco ne papa me Dina kede imiegu mege be, “Timanu ber, gi dedede kame ibinunu penya ango abino mino wu.

¹²Penyunu giamia kede cul me nyom di tot bala kame cunyu mito, di ango ako bino mino wu gi dedede kame ipenyanu; kenekene wun mianu nyako no dok dako na.”

¹³Awobe ka Yakobo oko dwoko ne Sekem kede papa mere Kamor kop kame umo wang gi auma, pien Sekem oudo otieko munao amin gi Dina.

¹⁴Gin kiwaco negi be, “Wan likame otwero yei ne amin wa nyomere kede ngat kalikame kokepo, pien manono bino kelo ne wa lewic.

¹⁵Kenekene wan obino yei kop wu ka wun iyeunu doko cal bala wan, di ikounu kepo cuo dedede kame tie i diere wu.

¹⁶Di do wan oko bino mino wu anyira wa pi nyomo, di wada oko bino nyomo anyira wu, di wan oko bino bedo i diere wu okounu doko jo acel.

¹⁷Do ka wun idagunu kop wan likame ikounu kepere, wan obino kwanyo nyar wa di oko girwa ot.”

¹⁸Kop kame kiwaco oko yomo cuny Kamor kede wode Sekem.

¹⁹Awobi noni likame oko gal kede timo gikame oudo kowaco ne, pien nyar ka Yakobo oudo oyomo cunye twatwal. Sekem oudo obedo dano apire tek twatwal i diakal gi.

²⁰Aso, Kamor kede Sekem oko ot i erute me bomba gi di kiko waco ne jo me bomba be,

²¹“Jogi obedo jo abeco kede wa; owekunu gi kibed i lobo wa, kitim iye tic me cato wil, pien lobo wa ni gire lac romo gi; onyomunu anyira gi, doko wada omiunu gi anyira wa kinyomi.

²²Gin kiyaro yei pi bedo i diere wa, pi doko jo acel kede wan, kwanyo kenekene ka kokepo cuo wan bala mergi.

²³Mam doke gi, jamini gi, kede leini gi dedede bino doko merwa? Kenekene wan oyeunu kede tam gi, di gin kiko bino bedo i diere wa.”

²⁴Jo dedede kowok ooko i erute me bomba oko yei kop kame Kamor kede wode Sekem owaco, di oko kepo cuo dedede, jo dedede kowok ooko i erute me bomba.

²⁵I ceng me adek, di oudo pwodi jo tie kede aramo me akepo, awobe ka Yakobo are, Simeon kede Lebi, gin imiegu ka Dina, oko kwanyo ipimai gi di kiko ot ngeso yi i bomba, di kiko neko cuo dedede.

²⁶Gin kineko kiton Kamor kede wode Sekem kede epima, di kiko kwanyo amin gi Dina ki ot ka Sekem di kiko girgi ot.

²⁷Awobe apat ka Yakobo oko bino kakame kotimo iye nek, di kiko yako bomba nono, pien oudo komunao amin gi.

²⁸Gin kitero romini kede doke gi, pundan gi kede gi dedede kame oudo tie i bomba kede i calo.

²⁹Gin kiyako abar gi dedede kede gi dedede kame oudo tie i ude gi, di kiko mako idwe kede mon gi kitero.

³⁰Yakobo oko waco ne Simeon kede Lebi be, “Wun itiekunu kelo nango peko pien itiekunu kelo na ading kede jo me Kanan kede jo me Perisi, gin jo me lobo noni. Ango jo na nonok; ka gin kicokere di kiko sura, gin kibino neko wa dedede, ango karacel kede jo me oda.”

³¹Do gin kiko waco be, “Benyo, mam do en ebut kede amin wan iepone nono, ineno bala edoko malaya?”