Read kumam Ageini 37 Bible Online

Ageini 37 - kumam bible

Ageini 37

¹Yakobo bin oko donyo bedo i lobo me Kanan, kakame bin papa mere obedo iye bala ngakumbor.

²Man en itatam amako jo me ot ka Yakobo. Yosepu di bin oromo mwakini tomon kiwie kanyaare, eko donyo kwano romini kede diegi, en karacel kede imiegu mege awobe ka Bilka kede Silipa, mon ka papa mere. Yosepu bin kelo ne papa gi kope areco kame bin imiegu mege timo.

³Yakobo bin maro Yosepu kalamo awobe mege apat dedede, piento en bin enywale i wi tio. En bin eko kuno ne ekanso abor kame bade boco.

⁴Do kakame bin imiegu mege oneno kede be papa gi oudo maro Yosepu kalamo gin dedede, gin kiko dage, doko oudo likame kiyamo kede kiber.

⁵Ceng moro acel Yosepu oko lek. Kakame en bin eko tatamo ne kede imiegu mege lek mere nono, gin kiko medo dage kitek.

⁶En oudo ewaco negi be, “Winyunu lek kame ango aleko.

⁷Oudo wanunu dedede otienu i poto twetweo engano i arita. Oyotoyot di arita nango oko yai eko cungo. Di do aritan wun oko cokere luke diere, di kiko gungo piny mino arita nango wor.”

⁸Imiegu mege oko waco ne be, “Iparo be in iyaro bedo abaka di iko bino pugo wan? Mam in imito pugo wan?” Di do gin kiko medo dage kitek pi lek mere kede pi kope kame en ewaco negi.

⁹Yosepu bin bobo oko leko lek ace di eko waco ne imiegu mege be, “Nenunu, ango bobo aleko lek ace. Aleko be oudo aneno ceng, duwe, kede acerin tomon kiwie acel di kitie luro piny buta.”

¹⁰Do kakame en etatamo ne kede papa mere kede imiegu mege lek nono, papa mere oko coke di waco ne be, “Epone me lek nyo ino kame in ileko no? Ateteni in iparo be ango kede toto ni, kede imiegu ni oyaro bino di oko luro piny i nyimi?”

¹¹Di do nyeko bin oko mako imiegu mege i kome, do papa mere bin oko kano kop noni i cunye.

¹²Ceng moro acel imiegu ka Yosepu bin oko ot Sekem kwano leini ka papa gi kuno.

¹³Yakobo bin oko waco ne Yosepu be, “Mam imiegu ni tie kwano leini Sekem? Bia acwai but gi.” Yosepu oko gamo be, “Ango ine.”

¹⁴Papa mere oko waco ne be, “Oti inen ka imiegu ni tie kiber kede leini; di iko dwoko na kop.” Aso, en bin eko cwane eyai ot ki aditot me Keburon. Kakame bin en eko tuno kede Sekem,

¹⁵icuo moro bin oko ude di etie awiratoi i obar; icuo nono oko penye be, “Nyo kame in itie mono?”

¹⁶En di eko gamo be, “Ango atie mono imiegu na. Okwe, waca kakame gin kitie kwano iye leini.”

¹⁷Icuo nono oko waco ne be, “Gin kitieko yai ki kan, pien ango awinyo di gin kiyamo be, ‘Ootunu Dotan.’ ” Di do Yosepu oko wapo imiegu mege di eko udo gi Dotan.

¹⁸Gin bin kiko nene di pwodi etie kakabor, di gin kiko cako poro kop me neke di en pwodi likame etuno but gi.

¹⁹Gin kiko donyo yamo ken gi ken gi be, “Ngailek ca ine tie bino.

²⁰Bianu onekenu di okounu uce i bur moro; di okounu ot waco be le moro me obar ocame, di okounu neno gikame bino timere ne lek mere.”

²¹Do kakame Ruben owinyo kede kamano, en bin eko tamo lake ki cing gi. En ewaco negi be, “Kur onekenu.”

²²Ruben bin owaco negi be, “Kur ionyunu remo mere; ucenu i bur ni i wi tim kan, do kur imienu awanon moro.” En ewaco kamano piento en oudo etie mono epone me lake ki cing gi di eko dwoke but papa mere.

²³Kikano, kakame Yosepu bin oko tuno kede but imiegu mege, gin kiko gonyo ekanso mere, ekanso abade boco kame bin en engapo.

²⁴Di do gin kiko tere kiko uce i bur. Bur nono oudo gimoro li kiye; pii oudo li kiye.

²⁵Gin bin kiko bedo piny cam; kakame kitingo kede wang gi malo, kiko neno ekodet me jocat me jo Isimael di bino kiwok ki Gilead kede aguraguran kame yeo odok, kede mo angwe kur me yen; oudo kitie tero gi Misiri.

²⁶Yuda bin oko penyo imiegu mege be, “Nyo kame wan obinunu udo ka onekunu omin wa di okounu mungo?

²⁷Bianu ocatenu but jo Isimael, do weko wan keto can moro i kome, piento en ebedo omin wa, merwa me remo.” Imiegu mege oko yei kede kop mere.

²⁸Kakame jocat me Midian mogo oko beo kede kuno, imiegu ka Yosepu oko wote ki bur di kiko cate but jo Isimael pi siliba ot are. Jo nogo oko tero Yosepu Misiri.

²⁹Kakame bin Ruben oko dwogo kede i bur di eko udo Yosepu li kiye, en eko nyinyilo igoen mege pi cwercuny.

³⁰Eko dok but imiegu mege di eko waco negi be, “Awobi ca li ki bur; ango abino timo nadi?”

³¹Di do gin kiko kwanyo ekanso ka Yosepu, kiko ngolo ekoroi di kiko luto ekanso mere i remo.

³²Gin kiko tero ekanso nono but papa gi di kiko waco ne be, “Wan oudo ekanso noni; kong nene ka en me ka wodi arabo li.”

³³En eko ngeno ekanso nono di eko waco be, “Kom en ekanso ka woda! Le me obar otieko came; ateteni le otieko nyinyilo Yosepu.”

³⁴Di do Yakobo oko nyinyilo igoen mege pi cwercuny di eko rwano igoen me iturur i piere, eko koko wode pi ceng atot.

³⁵Awobe mege kede anyira mege dedede bin oko bino pi tamo kweno cunye, do en eko dagi winyo kop gi, di eko waco negi be, “Li ba, ango abino ot kabedo me jo oto but woda di pwodi atie koke kamanono.” Di do papa mere oko meede koke kamanono.

³⁶Di mano bin tie timere, jo me Midian bin oko cato Yosepu i Misiri but Potipa, ngadwong me tic ka Parao, ngat kame bin obedo ngatel isirikalen kame gwoko paco ka Parao.