Read kumam Ageini 39 Bible Online

Ageini 39 - kumam bible

Ageini 39

¹Bin jo Isimael oko tero Yosepu Misiri, di kiko cate but Potipa, ngadwong me jotic ka Parao, kame bin telo isirikalen kame oudo gwoko paco ka Parao.

²Rwot bin oko bedo tie kede Yosepu di eko mine ebedo ngawinyo. En bin eko donyo bedo i ot me ngadwong mere me Misiri.

³Ngadwong ka Yosepu bin oko neno be Rwot oudo tie kede Yosepu doko oudo emio gi dedede kame en etimo cobere kiber.

⁴Cuny Potipa oko bedo yom kede Yosepu di eko mine ebedo ngatic mere. En emie ebedo ngat kame lo ode lung kiton jamini dedede kame en bin etie kede.

⁵Cako i kare kame en emie ebedo kede ngat kame lo ode kede jamini dedede kame en oudo etie kede, Rwot oko mino winyo i ot me icuo me Misiri nono pi Yosepu. Rwot omio winyo i kom gi dedede kame bin en etie kede i ot kede kiton i kom leini kede i poti mege.

⁶Omio Potipa di do oko weko gi dedede kame en bin etie kede i cing Yosepu. I kare kame bin Yosepu bedo kede en, oudo likame en bin eparo gimoro akadi acel, kwanyo kenekene cam kame oudo epoore camo. Yosepu oudo obedo icuo acil doko di ibus.

⁷Ingei kare moro, dako ka ngadwong mere cunye oko wane i kom Yosepu di eko waco ne be, “But keda.”

⁸Do en eko dagi di eko waco ne dako ka ngadwong mere be, “Neningo, di ango atie kan, ngadwong na likame tie kede par moro i kom gimoro kame mako i ot, doko da en etieko keto gi dedede kame en etie kede i cinga.

⁹En likame edwong i ot noni kalamo ango, doko likame tie gimoro kame en etwona kwanyo kenekene in, piento in ibedo dako mere. Benyo benyo kame bobo ango akaruno timo kede gikame rac rom kano, di ako timo dub but Rubanga?”

¹⁰Bed bala en ebedo penyo Yosepu buli ceng pi buto kede, do Yosepu likame oko yei buto kede akadi maro bedo kede.

¹¹Ceng moro acel, kakame bin Yosepu ooto kede i ot pi timo tic mere, di oudo ngatamoro ace li i ot kanono,

¹²dako nono oko mako egoe ka Yosepu di ewaco ne be, “But keda!” Do Yosepu oko ringo ooko eweko egoe mere i cinge.

¹³Kakame en eneno kede be Yosepu otieko weko egoe mere i cinge di eko ringo ooko,

¹⁴en eko lwongo jotic me ode di eko waco negi be, “Nenunu, cwara otieko kelo i diere wa Ngaeburania ni pi nywaro wa! Oudo kom ebino buta pi mito maka tetek buto keda, do ango ako dwilao kitek.

¹⁵Kakame en ewinyo ango adwilao kede, eko ringo ooko eweko egoe mere i ngeta.”

¹⁶Di do eko kano egoe nono tuno ngadwong ka Yosepu dwogo paco.

¹⁷Di en eko tatamo ne kop acel nono di ewaco ne be, “Ngatic kame obedo Ngaeburania no, kame in ikelo i diere wa, oudo obino i ot buta pi nywara.

¹⁸Do kakame ango ako dwilao kede, en eko ringo ooko eweko egoe mere i ngeta.”

¹⁹Kakame ngadwong ka Yosepu oko winyo kede di dako mere owaco ne be, “Man en epone kame ngatic nin otera kede,” cunye oko wang.

²⁰Di eko mino kotero Yosepu di oko rwake i otkol, kakame bin kotweo iye mabus me abaka, di eko bedo kuno.

²¹Do Rwot oudo tie kede Yosepu di eko nyuto ne amara mere kalikame lokere; en eko mino ngadwong me otkol obedo kede amara bute.

²²Ngadwong me otkol oko keto mabus dedede kame bin tie i otkol i cing Yosepu, doko eko mine akarunikin i kom gi dedede kame bin kotimo i otkol kuno.

²³Ngadwong me otkol bin likame do tie kede par moro i kom gikame oudo etieko keto i cing Yosepu, pien Rwot oudo tie kede, doko gi dedede kame bin Yosepu timo oudo Rwot mio cobere kiber.