Read kumam Ageini 4 Bible Online

Ageini 4 - kumam bible

Ageini 4

¹Kikano Adamu oko yac ne dako mere Keba. Keba oko nywalo Kain di eko waco be, “Rwot okonya emia audo atin awobi.”

²Alubo mere en eko nywalo omin mere Abel. Abel oko bedo ngagwok romini, do Kain oko bedo ngapur.

³Ingei kare moro Kain oko kelo ne Rwot giayala me cam kame oudo epuro,

⁴do Abel oko neko romini kame oudo obedo idwe kao, di eko mino Rwot giayala me kakamio. Cuny Rwot oko bedo yom kede Abel kede giayala mere,

⁵do eko dagi Kain kede giayala mere. Aso, cuny Kain oko wang di cal me nyime oko lokere.

⁶Rwot oko penyo Kain be, “Cunyi owang pinyo, doko pinyo komio cal me nyimi olokere?

⁷Ka in itimo kiber, mam ango abino gami? Do ka likame itimo kiber, dub tie buto i dog ekeko nin, cunye keto liklik i komi, do miero ibwone.”

⁸Di Kain oko waco ne omin mere Abel be, “Ber kong ooti i poto.” Kakame oudo kitie do kede i poto, Kain oko cako bungo omin mere di eko neko.

⁹Di Rwot oko penyo Kain be, “Omini Abel tie tuai?” En eko dwoko be, “Ango likame angeo; benyo, oudo ango adoko ngat kame gwoko omina?”

¹⁰Di Rwot oko waco be, “Nyo kame in itimo? Neningo, remo ka omini tie kok buta ki lobo!

¹¹Nan do kotieko lami, likame bobo ibino karuno puro lobo; lobo nono en kongamo doge pi gamo remo ka omini kakame in ineke kede.

¹²Ka in ipuro lobo likame bobo ebino nyako ni cam, in ibino bedo dano koringo kop di irimo piny arima i wi lobo.”

¹³Kain oko waco ne Rwot be, “Alola na noni dwong likame atwero kanyakino!

¹⁴Tin in itieko riama tenge ki lobo noni, likame bobo abino neeno i wangi; abino bedo dano koringo kop di arimo piny arima i wi lobo; ngat kame riamo keda bino twero neka.”

¹⁵Rwot oko waco ne be, “Li! Ka ngatamoro oneko Kain, ango abino culo kwor mere tien kanyaare.” Di Rwot oko keto alama i kome tetekeny ngat kame ude kur neke.

¹⁶Di do Kain oko yai tenge kibut Rwot eko ot bedo i lobo me Nod, tetu kide me Eden.

¹⁷Kain kede dako mere oko nywalo awobi di kiko cako nyinge Enoka. Kain oko gero bomba eko cako ne bomba nono nying wode Enoka.

¹⁸Enoka oko nywalo Irad, Irad oko nywalo Mekujael, Mekujael oko nywalo Metusael, Metusael oko nywalo Lamek.

¹⁹Lamek oko nyomo mon are, Ada kede Sila.

²⁰Ada oko nywalo Jabal; Jabal bin oko bedo kwaru me jo dedede kame oudo bedo i eema di kitie kede dok kede diegi kede romini.

²¹Omin mere oudo nyinge Yubal; en oudo ebedo kwaru me jo kame oudo goo arigirigi kede kame kuto bilo.

²²Sila oko nywalo Tubal Kain, ngat oko donyo teto egere me jamini dedede kame kotimo kede nyonyo ayon kede buronsi. Amin me Tubal Kain oudo obedo Naama.

²³Lamek oko waco ne mon mege be, “Ada kede Sila, winyunu dwana; wun mon ka Lamek, winyunu kop kame atie waco: ango atieko neko awobi moro, aneke pien oudo ewana.

²⁴Kame koculo kwor ka Kain tien kanyaare, ateteni kobino culo kwor ka Lamek tien ot kanyaare kiwie kanyaare.”

²⁵Adamu oko bobo yac ne dako mere; dako mere oko nywalo atin awobi di eko cako nyinge Set, piento dako nono oudo owaco be, “Rubanga omia bobo atin ace kawang Abel, pien Kain oneke.”

²⁶Set da oko nywalo atin awobi di eko cako nyinge Enosi. I kare nono jo oko cako pako nying Rwot.