Read kumam Ageini 42 Bible Online

Ageini 42 - kumam bible

Ageini 42

¹Kakame Yakobo ongeo kede be cam oudo tie Misiri, en eko waco ne awobe mege be, “Pinyo komio itienu nenere anena kenu kenu?

²Ango awinyo be cam tie Misiri, otunu kuno iwilunu cam pirwa, tetekeny kur otounu kec.”

³Aso, imiegu ka Yosepu tomon oko ot pi wilo cam Misiri.

⁴Do Yakobo likame oko cwano omin me Yosepu anyinge Benjamin kede imiegu mege, pien oudo etie kede lworo be gimoro arac twero pi timere ne.

⁵Awobe ka Yakobo oko upere kede jo apat da pi ot wilo cam, pien kec nono oudo otuno i lobo me Kanan da.

⁶Bala ngapug me lobo me Misiri, Yosepu en kame oudo tie cato cam ne jo me lobo nono. Imiegu ka Yosepu oko bino di kiko riebere piny i nyime.

⁷Kakame Yosepu oneno kede imiegu mege, en eko ngeno gi, do en eko tero gi bala jokumbor di eyamo kede gi dwan agwai. En epenyo gi be, “Wun iwokunu ki tuai?” Gin kiko dwoko be, “Wan owok ki lobo me Kanan, obino pi wilo cam.”

⁸Bed bala Yosepu oko ngeno imiegu mege, do gin likame kiko ngene.

⁹Yosepu doko da oko yutuno lek kame eleko i kom gi. En eko waco negi be, “Wun ibedunu ibegai; wun ibinunu pi neno goro me lobo wa!”

¹⁰Gin kiko dwoko ne be, “Adwong, li; jotic ni obino pi wilo cam.

¹¹Wan dedede obedo awobe me icuo acel; wan obedo jo kame yamo kop me ateni; cako pwodi likame jotic ni obedo ibegai.”

¹²Do Yosepu oko waco negi be, “Li, wun ibinunu pi neno goro me lobo wan!”

¹³Gin kiko waco be, “Wan jotic ni otie imiegu tomon kiwie are, obedo awobe me icuo moro me lobo me Kanan; awobi atidi odong kede papa wa, do omin wa acel oto.”

¹⁴Do Yosepu oko waco negi be, “Etie bala kame ango atieko waco ne wu; wun ibedunu ibegai!

¹⁵Epone kame kobino ngingico wu kede ine: tek di Parao tie kuo, likame ibinunu yai ki kan tuno di ominu atidi obino!

¹⁶Poore dano acel oti di eko kelo ominu, di jo apat kikomu ber kong odong i otkol, tetekeny bin ngei ateni me kope wu; aso ka li, tek di Parao tie kuo, ateteni wun ibedunu ibegai.”

¹⁷En eko keto gin dedede i otkol pi ceng adek.

¹⁸I ceng me adek, Yosepu oko waco negi be, timunu kaman di ikounu bino kuo, pien ango alworo Rubanga:

¹⁹ka wun ibedunu jo kame yamo kop me ateni, wekunu ominu acel dong kan i otkol. Do jo apat dok ter cam ne jo kame kec odio i miere wu.

²⁰Di gin kiko bino kelo ominu atidi buta. Manono bino moko kope wu, di likame oko bino neko wu. Di gida kiko yei pi timo kamanono.

²¹Kiko donyo yamo ken gi ken gi be, “Okwe, kotie tidilo wa pi raco kame wan otimo ne omin wa. Wan oudo oneno can kame etie iye kakame ebako ne wa kede doge, do wan oko dagi winye. Manoni en komio can noni nataman opoto i kom wa.”

²²Di Ruben oko dwoko negi be, “Mam oudo ango awaco ne wu be kur itimunu ne awobi ca raco moro? Do wun ikounu dagi. Nan do wan otienu culo kwor me remo mere.”

²³Gin oudo likame kingeo be Yosepu tie niang gikame kitie yamo, piento en oudo ebedo yamo kede gi di ngat apat en agonyo kop.

²⁴Yosepu oko yai tenge kibut gi di eko donyo koko, di eko dwogo eko yamo kede gi. En eko kwanyo Simeon eko mino kotwee i nyim gi kanono.

²⁵Yosepu oko mino cik be pong ipukoi gi kede cam, kede dwok sente me ngat acelacel i epuko mere, doko da be, mi gi cam me acama i yongayo. Oko timo negi kamanono.

²⁶Gin kiko keto ipukoi me cam gi ingei pundan gi di kiko yai.

²⁷Kakame ngat acel kikom gi ogonyo kede epuko mere pi mino punda mere cam i kakame oudo kibuto iye, en eko udo sente mere i dog epuko.

²⁸En eko waco ne imiegu mege be, “Kodwoko na sente na, en ine etie i epuko na!” Gi nono oko neko kom gi di kiko donyo penyere ken gi ken gi kede mielkom be, “Nyo ine kame Rubanga otieko timo ne wa?”

²⁹Kakame kituno kede i lobo me Kanan, gin kiko tatamo ne papa gi Yakobo gi dedede kotimere negi be,

³⁰“Icuo kame obedo ngapug me Misiri oyamo kede wa kede dwan agwai, di eko tero be wan ooto kuno begao kop me lobo nono.

³¹Do wan oko waco ne be, ‘Wan obedo cuo kame li kede angalo, wan likame obedo ibegai.

³²Wan obedo imiegu tomon kiwie are kame papa wa onywalo; ngat acel oto, do awobi atidi odong kede papa wa i lobo me Kanan.’

³³Di icuo nono, ngapug me lobo nono, oko waco ne wa be, ‘Ango abino ngeno be wun iliunu kede angalo ka itimunu kaman: wekunu ominu acel kede ango, di jo apat kikomu ko tero cam ne jo me miere wu kame kec odio.

³⁴Kelunu ominu atidi buta, di ango ako bino ngeno be wun likame ibedunu ibegai, do ibedunu jo kame yamo kop me ateni. Di ango ako bino gonyo ominu, di ikounu twero bedo kan di itimunu tic me cato wil.’ ”

³⁵Kakame oudo kitie yabo kede ipukoi gi, ngat acelacel kikom gi oko udo ikapu mere me sente i dog epuko mere. Kakame kineno kede abunge me sente gi, lworo oko mako gi karacel kede papa gi Yakobo.

³⁶Papa gi Yakobo oko waco negi be, “Wun itienu minango akei idwe na: atieko kei Yosepu, doko atieko kei Simeon da, nan doko imitunu tero Benjamin da. Can nogi dedede opoto i komango!”

³⁷Ruben oko waco ne papa mere be, “Ka likame ango adwoko Benjamin, in nek awobe nango are. In kete i cinga, di ango ako bino dwoke buti.”

³⁸Do Yakobo oko waco be, “Likame woda bino ot kede wu, pien omin mere otieko to, nan en edong kene. Ka gimoro arac otimere ne i yongayo, ango atieko ti, ibinunu mino par neka.”