Read kumam Ageini 44 Bible Online

Ageini 44 - kumam bible

Ageini 44

¹Yosepu oko waco ne ngatic kame gwoko ode be, “Pongi ipukoi ka jogo kede cam bala kame gin kitwero yeno, di iko keto sente ka ngat acelacel i epuko mere.

²Ket ikopo nango, ikopo kame kotimo kede nyonyo siliba, i epuko me ngat atitidi kalamo, kete karacel kede sente mere me wilo cam da.” En eko timo bala kame Yosepu owaco ne.

³Odiko di piny oru, oko peruno jo nogo kioto kede pundan gi.

⁴Kakame kioto kede kakacecek pwodi yai ki bomba, Yosepu oko waco ne ngagwok ode be, “Wap jogo, kame imako gi, wace gi be, ‘Pinyo komio iculunu bero kede raco?

⁵Pinyo komio ikwalunu ikopo ka ngadwong na, ikopo kame kotimo kede nyonyo siliba? Mam en emato kede ikopo nono? Mam etimo kede en tic me tuco kope me anyim kede komungere? Itimunu gikarac twatwal.’ ”

⁶Kakame en etuno kede but gi, en eko nyogao negi kope nogi.

⁷Gin kiko waco ne be, “Adwong pinyo komio in iwaco kope acal kamagi? Tim kacal kamano bor kibut wan jotic nin!

⁸Neningo kong, sente kame wan oudo i ipukoi wa wan oko dwoko buti yai ki lobo me Kanan; pinyo do kame mio wan oko kwalo siliba amoto saabu ki ot ka ngadwong ni?

⁹Ka koudo ngatamoro kikom wa kede ikopo nono, poore neke, di wan jo apat oko doko ipasoi ni.”

¹⁰En eko waco be, “Ebo ango ayei, do kenekene ngat kame koudo kede ikopo en kame bino doko epasoit na, do jo apat kikom wu bino ot.”

¹¹Di do ngat acelacel kikom gi oko cibo epuko mere piny awakawaka di egonyo doge.

¹²En eko cako more, egeo kede epuko me ngat adwong di eko tieko kede epuko me ngat atitidi; eko udo ikopo i epuko ka Benjamin.

¹³Manoni oko mino gi kinyinyilo igoen i kom gi pi wangcuny. Ngat acelacel kikom gi oko keto yec mere ingei punda mere di kiko dok i bomba.

¹⁴Yuda kede imiegu mege oko dok i ot ka Yosepu di kiko ude pwodi etie. Gin kiko riebere i nyime,

¹⁵di Yosepu oko waco negi be, “Nyo ine kame wun itimunu ni? Oudo likame ingeunu be dano acal bala ango twero timo tic me tuco gikomungere?”

¹⁶Yuda oko dwoko be, “Owaci nyo? Oyam kedi benyo? Epone mene en kame wan oromo lwoko kede nying wa? Rubanga otieko udo raco wan jotic ni; nan wan ige odoko ipasoi ni, wan dedede karacel kede ngat kame koudo ikopo bute.”

¹⁷Yosepu oko waco be, “Likame abino timo mano akadi acel! Ngat kame koudo ikopo bute en oyaro doko epasoit nango; do wun jo apat, otunu but papa wu kede mulem.”

¹⁸Yuda oko nyiko but Yosepu di eko waco ne be, “Okwe adwong na, yei na yamo kedi di likame iko doko ger keda; pien in irom aroma kede Parao.

¹⁹Adwong na, in ipenya be, ‘Itienu kede papa wu arabo ominu?’

²⁰Wan oko dwoko ni be, ‘Wan otie kede papa wa, en eti, doko otie kede omin wa atidi, atin kame en enywalo i wi tio. Omin mere me toto gi kede acel oto, en kene kame edong; papa mere mare.’

²¹Di in iko waco ne wa be, ‘Kelenu buta, tetekeny ada anene.’

²²Wan oko waco ni be, ‘Awobi ca likame twero weko papa mere, ka etimo kamanono, papa mere bino to.’

²³Di in iko waco ne wan be, ‘Likame ibinunu bobo neno wanga tuno di ikelunu ominu.’

²⁴Kakame wan odok kede but papa wa, wan oko waco ne kop nin.

²⁵En eko waco ne wa be, ‘Dokunu ikounu bobo wilo cam moro atitidi.’

²⁶Wan oko waco ne be, ‘Wan likame obino ot, kwanyo ka omin wa ooto kede wa. Pien likame wan obino twero neno wang icuo ca tuno di ooto kede omin wa atidi.’

²⁷Di papa wan oko waco ne wa be, ‘Wun ingeunu be dako nango onywalo na idwe awobe are;

²⁸acel kikom gi oweka di ango ako waco be, ateteni miero bed di kotieko nyinyilo en; cako cenge nono likame bobo ango ako nene.

²⁹Ka iterunu man da kibuta, di gimoro arac oko timere ne, ango atieko ti, ibinunu mino par neka.’

³⁰Pi mano, ka nan ango adok but papa na abongo awobi noni, en ebino to, pien kuo mere kede kuo me awobi no tie acel. Ka en eneno be awobi no likame tie kede wa, wan obino mino par neke, piento en etieko ti.

³²Medo i wi mano, ango oudo ayei i nyim papa na pi gwoke di awaco be, ‘Ka likame ango adwoke buti, raco nono bino bedo i wiango i nyimi i kare dedede me kuo nango.’

³³Pi mano, nan wek ango adong kan bala epasoit nin akaka awobi no, di iko yei ne en dok kede imiegu mege.

³⁴Pien epone mene kame ango atwero dok kede but papa na abongo awobi no? Ango lworo maka neno can kame papa na oyaro beo iye.”