Read kumam Ageini 45 Bible Online

Ageini 45 - kumam bible

Ageini 45

¹Di do Yosepu likame oko twero dino cunye i nyim jo dedede kame oudo tie cungo i ngete, en eko lelemo be, “Jotic dedede poore yai tenge.” Aso, likame ngatamoro oko dong but Yosepu kakame en enyutere kede but imiegu mege.

²En eko kok kede dwan amalo twatwal, omio jo me Misiri kame oudo tie i ngete kanono oko winyo, di kop nono oko tuno but jo me paco ka Parao da.

³Yosepu oko waco ne imiegu mege be, “Ango Yosepu. Benyo, papa na pwodi kuo?” Do imiegu mege likame oko twero dwoko ne kop moro, pien lworo oudo omako gi i nyime.

⁴Di Yosepu oko waco ne imiegu mege be, “Bianu i ngeta.” Gin kiko nyiko bute. En eko waco be, “Ango abedo ominu Yosepu kame bin wun icatunu i lobo me Misiri.

⁵Nan do kur ibedunu kede cwercuny amoto awangacuny pi kite kame icatanu kede kan; pien Rubanga en ocako cwanango kan di pwodi wun, pi lako kuo me jo.

⁶Pien kec nan otieko mwakini are i piny noni, do pur amoto kac pwodi likame oyaro bedo tie pi mwakini kany anyim.

⁷Rubanga oudo ogeo cwanango di pwodi wun pi mino ikwae wu dong tie i wi lobo, kede pi mino jo atot kibutu bwot.

⁸Aso, likame wun en kame icwaanu kan, do Rubanga en kocwaa; en etieko mina adoko ngat kame mio Parao tam kede ngat kame lo ode, bobo da ango apugo lobo me Misiri lung.

⁹“Nan bunyunu ot but papa na ikounu waco ne be wode kame kolwongo be Yosepu owaco be, ‘Rubanga otieko mina adoko ngapug me Misiri lung, bia buta, kur igali.

¹⁰In ibino bedo i lobo me Gosen, doko ibino kio keda, in, idwe ni, ikwae ni karacel kede romini kede diegi, dok kede jame dedede kame itie kede.

¹¹Ango abino mino wu cam kame mitere ne wu ki kuno, tetekeny kur ibedunu abongo cam, in kede jo me paco ni, karacel kede leini ni. Pien pwodi odong mwakini kany me kec.’ ”

¹²Yosepu oko meede be, “Nan wun, karacel kede in Benjamin, itiekunu neno be ango inononi Yosepu kame atie yamo kede wu.

¹³Poore iwacenu papa na dwongo kame ango atie kede i Misiri, kede da gi dedede kame wun itiekunu neno. Sunyunu ot ikelenu kan.”

¹⁴En eko gwako ngut omin mere Benjamin di eko donyo koko; Benjamin da oko donyo koko di gwake.

¹⁵Eko donyo gwagwako imiegu mege dedede di enoto gi di ekok. Ingei manono imiegu mege oko donyo yamo kede.

¹⁶Kakame kop otuno kede i ot ka Parao be imiegu ka Yosepu oudo obino, Parao kede jotic mege cuny gi oko bedo yom.

¹⁷Parao oko waco ne Yosepu be, “Wace imiegu ni ket yec i ngei pundan gi di kiko dok Kanan.

¹⁸Kioti kiko kelo papa gi kede jo me miere gi kane. Ango abino mino gi lobo aber kalamo i Misiri, kibino camo anyakini abeco me lobo noni.

¹⁹Wace gi da kiter cabalan ki Misiri ne idwe kede mon gi, di kiko kelo papa gi.

²⁰Kur kibed kede par pi weko jame gi, pien jamini abeco me Misiri dedede bino doko mergi.”

²¹Awobe ka Yakobo oko timo bala kame kowaco negi. Yosepu oko mino gi cabalan bala kame Parao oudo owaco, di eko mino gi cam me acama i yongayo.

²²En emio ngat acelacel kikom gi egoe anyen; do eko mino Benjamin igoen anyen kany kede sente akaya me siliba 300.

²³Eko cwano ne papa mere gigi: pundan tomon kame yeo jamini abeco me Misiri, pundan amon tomon kame yeo cam, kede cam kame papa mere bino camo i yongayo.

²⁴Yosepu oko cwano imiegu mege; kakame oudo kitie yai kede en eko waco negi be, “Kur ilokunu i yongayo.”

²⁵Aso, gin kiko yai ki Misiri di kiko dok but papa gi Yakobo Kanan.

²⁶Gin kiko waco ne papa gi be, “Yosepu pwodi tie kuo! Doko da en etie ngapug me Misiri dedede.” Wi Yakobo oko dubere; likame oudo etwero yei kop gi.

²⁷Do kakame gin kitatamo ne kede kope dedede kame Yosepu oudo owaco negi, doko da di eko neno cabalan kame Yosepu ocwao ne pi tere kuno, cunye oko dwogo.

²⁸Yakobo oko waco be, “Ayei do be woda Yosepu pwodi kuo. Miero aoti anene di pwodi akuo.”