Read kumam Ageini 46 Bible Online

Ageini 46 - kumam bible

Ageini 46

¹Yakobo bin oko coko jame mege dedede di eko yai ot tuno Beereseba, kakame en eko mino kiye giayala but Rubanga ka papa mere Isaka.

²Rubanga bin oko yamo kede i dier iwor i gianyuta, di elwongere be, “Yakobo, Yakobo.” En di eko gamo be, “Ango ine.”

³Rubanga di oko waco ne be, “Ango Rubanga, Rubanga ka papa ni; kur ilwor ot Misiri, pien ango abino mini idoko ateker adwong kuno.

⁴Ango kikoma abino upere kedi ot Misiri, di bobo ako bino dwoki ki kuno. Cing Yosepu en kame bino umo wangi i esawa me to ni.”

⁵Yakobo di oko yai, cako ki Beereseba. Awobe mege oko kete i cabala kame oudo Parao ocwao me biele, en kede idwe gi atitino, kede mon gi.

⁶Gin bin kiko tero da leini kede jamini kame gin bin kiudo i lobo me Kanan, di kiko ot Misiri. Yakobo bin oko ot kede kodi me jo kowok kibute dedede:

⁷awobe mege, anyira mege kede ikwae mege.

⁸Nying jo me Isirael kame bin oko ot Misiri kede Yakobo gin ige: Ruben, kao ka Yakobo

⁹kede idwe mege. Idwe ka Ruben ige, Kanok, Palu, Keseroni, kede Karami.

¹⁰Simeon kede idwe mege. Idwe ka Simeon ige, Jemuel, Yamin, Okad, Yakin, Sokar kede Saul wot ka dako kame obedo dano me Kanan.

¹¹Lebi kede idwe mege. Idwe ka Lebi ige, Gereson, Kokat kede Merari.

¹²Yuda kede idwe mege. Idwe ka Yuda ige, Er, Onan, Sela, Peresi kede Seera; Er kede Onan oudo oto sek i Kanan. Idwe ka Peresi gin en, Keseroni kede Kamul.

¹³Isakar kede idwe mege. Idwe ka Isakari gin ige, Tola, Puwa, Yasub kede Simiron.

¹⁴Sebulun kede idwe mege. Idwe ka Sebulun gin ige, Sered, Elon kede Yakalel.

¹⁵Mago en awobe kame bin Lea onywalo ne Yakobo i Mesopotamia, karacel kede nyare Dina. Wel me idwe awobe kede anyira kame bin obedo me ka Yakobo kede Lea oudo tie ot adek kiwie adek (33).

¹⁶Gad kede idwe mege. Idwe ka Gad ige, Sipion, Kagi, Suni, Esibon, Eri, Arodi kede Areli.

¹⁷Aser kede idwe mege. Idwe ka Aser ige, Imina, Isiba, Isibi, Beria kede amin gi Sera. Idwe ka Beria gin en, Keber kede Malakiel.

¹⁸Idwe tomon kiwie kanyape nogo en kame obedo me ka Yakobo kede Silipa, apasoit kame bin Laban omio but nyare Lea.

¹⁹Lakeri kede idwe mege. Idwe ka Lakeri ige, Yosepu kede Benjamin.

²⁰Yosepu bin oko nywalo awobe are i Misiri; gin en Manase kede Epuraimu, kame Asenat nyar ka Potipera, ngasaseredoti me On onywalo ne.

²¹Idwe ka Benjamin gin en, Bela, Beker, Asabel, Gera, Naman, Eki, Ros, Mupim, Kupim kede Arad.

²²Jo tomon kiwie ongwon nogi en kobedo idwe kame Yakobo onywalo kede Lakeri.

²³Dan kede wode Kusim.

²⁴Naputali kede awobe mege. Awobe ka Naputali ige, Yakasil, Guni, Yeser kede Silem.

²⁵Mago en jo kanyaare kame Yakobo onywalo kede Bilka, apasoit kame Laban bin omio but nyare Lakeri.

²⁶Jo ka Yakobo dedede kame bin oko ot Misiri, idwe kede ikwae, oudo tie ot kanyape kiwie kanyape (66), di likame komaro iye mon.

²⁷Idwe ka Yosepu kame en enywalo i Misiri oudo tie are; gin nogo en kame kiko mino wel me jo ka Yakobo kame bin oko ot Misiri oko romo ot kanyaare (70).

²⁸Yakobo oko ooro Yuda ooto anyim pi kwano Yosepu pi bino riamo kede en i Gosen. Kakame gin bin kiko tuno kede,

²⁹Yosepu bin oko mino koiko ne cabala di eko yai ot Gosen pi riamo kede papa mere Yakobo. Kakame eko tuno kede i nyim papa mere, en eko gwako ngute di eko donyo koko tieko esawa alac.

³⁰Yakobo oko waco ne Yosepu be, “Nan do akaruno to pien atieko neni kede wanga; atieko ngeno be in pwodi itie ikuo.”

³¹Di Yosepu oko waco ne imiegu mege karacel kede jo me ot ka papa mere be, “Ango abino ot di ako waco ne Parao be, ‘Imiegu na kede jo me ot ka papa na, kame oudo tie i lobo me Kanan, otieko bino buta.

³²Gin kibedo jokwat, pien gin kitie jo kame gwoko leini; doko da kitieko kelo romini kede diegi gi, doke kede jamini dedede kame gin kitie kede.’

³³Ka Parao olwongo wu, di eko penyo wu tic kame wun itimunu,

³⁴wun ibinunu waco ne be wun ibedunu jokwat cako di pwodi ititinunu kiton tuno tin, bala kame joakwari wu oudo timo. Ka iwacunu ne kamano, en ebino yei ne wu bedo i adul me Gosen, pien jokwat obedo bala gi me kwer ne jo me Misiri.”