Read kumam Ageini 47 Bible Online

Ageini 47 - kumam bible

Ageini 47

¹Di do Yosepu oko ot eko waco ne Parao be, “Papa nango kede imiegu na otieko bino ki Kanan; kibino kede romini kede diegi gi, kede doke kede jamini dedede kame gin kitie kede. Gin nataman kitie i adul me Gosen.”

²En oudo eupere kede imiegu mege kany, di do eko nyuto gi but Parao.

³Parao oko penyo imiegu mege nogo be, “Tic nyo kame wun itimunu?” Gin di kiko gamo be, “Adwong, wan obedo jokwat bala bin joakwari wa.

⁴Wan obino i piny noni pi bedo iye bala jokumbor, pien kec ager twatwal tie i lobo me Kanan, kame oko mino lum odoko li ne leini wa. Wan nataman okwai iyei ne wa bedo i adul me Gosen.”

⁵Di do Parao oko waco ne Yosepu be, “Bala kame papa ni kede imiegu ni otieko bino kede buti,

⁶lobo me Misiri tie i cingi; ket papa ni kede imiegu ni kakame ber kalamo; mi gi kibed i lobo me Gosen. Doko ka in ingeo cuo kame ikukurana kikom gi, ket gi kibed jodongo kame lo leini na.”

⁷Di Yosepu oko kelo Papa mere Yakobo di eko nyute but Parao. Yakobo oko lamo ne Parao winyo.

⁸Parao oko penyo Yakobo be, “Mwakini nin me dongo nataman romo adi?”

⁹Yakobo oko gamo be, “Mwakini kame ango abedo irim kede i piny kan bala ngakumbor tie tol acel kede ot adek. Mwakini nango pwodi nonok, do kibedo mwakini me kuo atek; likame kirom kede mwakini kame joakwari na otieko di kirimo piny bala jokumbor.”

¹⁰Di do Yakobo bobo oko lamo ne Parao winyo di eko yai eoto.

¹¹Yosepu oko mino papa mere kede imiegu mege kabedo i Misiri. En emio gi lobo kakame ber kalamo i adul me Rameses, bala kame oudo Parao otieko waco.

¹²Di eko donyo mino cam but papa mere, imiegu mege kede jo me ot ka papa mere dedede, di lubere kede wel me jo kame kitie kede.

¹³Kec ager bin oko poto i piny, di cam oko doko li i lobere dedede. Jo me Misiri kede me Kanan oko doko goro twatwal pi kec nono.

¹⁴Yosepu oko coko sente dedede i lobo me Misiri kede Kanan, kame oudo jo wilo kede cam di eko tero paco ka Parao.

¹⁵Kakame do sente oko tiek kede ki cing jo me Misiri kede me Kanan, jo me Misiri dedede bin oko bino but Yosepu di kiko waco ne be, “Mi wan cam! Mam in imito be wan otoi di in ineno wa anena. Wan sente wa otiek.”

¹⁶Yosepu oko gamo be, “Kelanu leini wu; ango abino mino wu cam di aseso kede leini wu ka sente wu otiek.”

¹⁷Di gin kiko kelo leini gi but Yosepu; en eko mino gin cam eseso kede asigiran gi, romini, diegi, doke kede pundan. Mwaka nono en eko bedo mino gi cam di eseso kede leini gi dedede.

¹⁸Kakame mwaka nono oko tiek kede, mwaka kame lubo mere gin kiko bobo bino bute di kiko waco ne be, “Adwong, wan likame okaruno mungo ni gimoro akadi acel; wan sente wa otiek pitipit doko leini wa da otieko doko megi. Likame tie gimoro kodong amoto kame okaruno mini, kwanyo kenekene kom wa kede lobere wa.

¹⁹Benyo, mam in imito be wan otoi di in ineno wa anena, di oko weko lobere wa? Mi wan cam do in iter wan karacel kede lobere wa, di wan oko bino doko ipasoi ka Parao kede lobo wa da di ko bino doko mere. In kenekene mi wan kodi, tetekeny kur otoi, do obed kuo, di lobere wa likame ko bino dong nono.”

²⁰Manono bin oko mino Yosepu owilo ne Parao lobo me Misiri lung. Jo me Misiri dedede bin oko cato lobere gi pien kec oudo ger negi twatwal, di lobo lung oko doko me ka Parao.

²¹Do en eko mino jo odoko ipasoi, cako ki tetucel me Misiri tuno tetu ocelu.

²²Lobo me josaseredoti kenekene en kame en bin likame eko wilo. Josaseredoti likame bin oko cato lobo gi pien bin tie sente kame Parao oudo mio gin. Manono en kame gin bin kiko kuo kede, en komio likame kiko cato lobo gi.

²³Yosepu bin oko waco ne jo be, “Nenunu, ango tin do atieko wilo wu karacel kede lobere wu ne Parao, kodi ine, gamunu icuunu i poti.

²⁴Di i kare me kac ikounu bino mino but Parao acel i kom kany me cam kame iudunu, do apat lung bino bedo megu pi kodi me acua i poti kede me acama wu, wun karacel kede jo me ude wu kede idwe wu.”

²⁵Gin di kiko gamo be, “In itieko lako kuo wan; in itimo ne wan bero, wan obino bedo ipasoi ka Parao.”

²⁶Di do Yosepu oko mino kop nono odoko iswil i lobo me Misiri, be acel i kom kany me cam kawok ki poti obedo me ka Parao. Iswil noni pwodi kotie tic kede kiton tin. Lobo me josaseredoti kenekene en kalikame bin oko doko me ka Parao.

²⁷Jo me Isirael bin oko donyo bedo i lobo me Misiri, i adul me Gosen. Gin bin kiko udo abar i kanono, doko kiko nywal kiko doko tot twatwal.

²⁸Yakobo bin oko bedo Misiri pi mwakini tomon kiwie kanyaare. Manono oko mino mwakini kame Yakobo obedo kuo kede i wi lobo oromo tol acel kede ot ongwon kiwie kanyaare.

²⁹Kakame kare mere me to oudo onoko kede, en bin eko lwongo wode Yosepu di eko waco ne be, “Ka ateteni in imara, rwak cingi i dierediere me amuros na di iko kwongere be ibino bedo kede genere kede ateni buta likame iko bino yika Misiri.

³⁰Ka ango ato, tinganu ikounu tera ooko me Misiri di ikounu yika kakame koyiko iye joakwari na.” Yosepu oko gamo be, “Ango abino timo bala kame in itieko iwaco.”

³¹Yakobo bobo oko waco be, “Kwongere buta.” Di Yosepu oko kwongere bute. Di do Yakobo oko kudo wie piny i wi kabuto mere pi pwone.