Read kumam Ageini 5 Bible Online

Ageini 5 - kumam bible

Ageini 5

¹Man en iwandik kame nyuto nying ikwae ka Adamu. Kakame bin Rubanga ocweo kede jo, en bin ecweo gi i cal mere.

²En bin ecweo gi icuo kede dako eko mino gi winyo, di eko lwongo gi be “Jo” i ceng kame en ecweo gi kede.

³Kakame Adamu oromo kede mwakini tol acel kede ot adek (130), en eko nywalo atin awobi kame oudo cal kede en; eko cako nyinge Set.

⁴Ingei nywalo Set, Adamu oko bobo bedo kuo pi mwakini tol kanyauni (800). En eko bobo nywalo idwe ace awobe kede anyira.

⁵Pi mano, Adamu bin obedo kuo pi mwakini tol kanyangon kede ot adek (930) di do eko to.

⁶Kakame Set oromo kede mwakini tol acel kede kany (105), en eko nywalo wode Enosi.

⁷Ingei nywalo Enosi, Set bobo oko medo bedo kuo pi mwakini tol kanyauni kede kanyaare (807), di eko bobo nywalo idwe ace awobe kede anyira.

⁸Pi mano, Set obedo kuo pi mwakini tol kanyangon kede tomon kiwie are (912) di do eko to.

⁹Kakame Enosi oromo kede mwakini ot kanyangon (90), en eko nywalo wode Kenan.

¹⁰Ingei nywalo Kenan, Enosi oko bobo bedo kuo pi mwakini tol kanyauni kede tomon kiwie kany (815), di eko bobo nywalo idwe ace awobe kede anyira.

¹¹Pi mano, Enosi obedo kuo pi mwakini tol kanyangon kede kany (905) di eko to.

¹²Kakame Kenan oromo kede mwakini ot kanyaare (70), en eko nywalo wode Makalalel.

¹³Ingei nywalo Makalalel, Kenan oko bobo bedo kuo pi mwakini tol kanyauni kede ot ongwon (840), di eko bobo nywalo idwe ace awobe kede anyira.

¹⁴Pi mano, Kenan obedo kuo pi mwakini tol kanyangon kede tomon (910) di eko to.

¹⁵Kakame Makalalel oromo kede mwakini ot kanyape kiwie kany (65), en eko nywalo wode Yared.

¹⁶Ingei nywalo Yared, Makalalel oko bobo bedo kuo pi mwakini tol kanyauni kede ot adek (830), di eko nywalo idwe ace awobe kede anyira.

¹⁷Pi mano, Makalalel obedo kuo pi mwakini tol kanyauni kede ot kanyangon kiwie kany (895) di eko to.

¹⁸Kakame Yared oromo kede mwakini tol acel kede ot kanyape kiwie are (162) en eko nywalo wode Enoka.

¹⁹Ingei nywalo Enoka, Yared oko bobo bedo kuo pi mwakini tol kanyauni (800), di eko nywalo idwe ace awobe kede anyira.

²⁰Pi mano Yared obedo kuo pi mwakini tol kanyangon kede ot kanyape kiwie are (962) di eko to.

²¹Kakame Enoka oromo kede mwakini ot kanyape kiwie kany (65), en eko nywalo wode Metusela.

²²Ingei nywalo Metusela, Enoka oko nywak kede Rubanga pi mwakini tol adek (300), di eko nywalo idwe ace awobe kede anyira.

²³Pi mano, Enoka obedo kuo pi mwakini tol adek kede ot kanyape kiwie kany (365).

²⁴Enoka oudo obedo nywak kede Rubanga i kare me kuo mere lung, di do eko rwenyo, pien Rubanga oudo otieko tere.

²⁵Kakame Metusela oromo kede mwakini tol acel kede ot kanyauni kiwie kanyaare (187), en eko nywalo wode Lamek.

²⁶Ingei nywalo Lamek, Metusela oko bobo bedo kuo pi mwakini tol kanyaare kede ot kanyauni kiwie are (782), di eko nywalo idwe ace awobe kede anyira.

²⁷Pi mano, Metusela obedo kuo pi mwakini tol kanyangon kede ot kanyape kiwie kanyangon (969) di eko to.

²⁸Kakame Lamek oromo kede mwakini tol acel kede ot kanyauni kiwie are (182), en eko nywalo wode;

²⁹eko cako nyinge Nua, di ewaco be, “Ki lobo kame Rubanga olamo, atin noni bino kelo ne wa wei i tice wa atek dedede.”

³⁰Ingei nywalo Nua, Lamek oko bobo bedo kuo pi mwakini tol kany kede ot kanyangon kiwie kany (595), di eko nywalo idwe ace awobe kede anyira.

³¹Pi mano, Lamek obedo kuo pi mwakini tol kanyaare kede ot kanyaare kiwie kanyaare (777) di eko to.

³²I kare kame Nua oromo kede mwakini tol kany (500), en oudo enywalo awobe adek, Sem, Kam kede Yapesi.