Read kumam Ageini 6 Bible Online

Ageini 6 - kumam bible

Ageini 6

¹Kakame jo onyai kede i lobo di kiko nywalo anyira,

²awobe ka Rubanga oko neno be kicil, di kiko yero kame cuny gi omito oko doko mon gi.

³Di Rwot oko waco be, “Tipo na kame mio kuo likame bino bedo i kom jo nakanaka, pien gin kibedo kom akoma; likame kibino kuo kalamo mwakini tol acel kede ot are (120).”

⁴I kare nono, kede i kare kolubo, itucio me jo oudo tie i wi lobo; bin konywalo gi kakame awobe ka Rubanga oribere kede anyira kobedo anywali me jo di kiko nywalo negi idwe. Magonogi bin obedo jo me aura doko kame nying gi iruo me kare kasek.

⁵Rwot oko neno be dub ka dano oudo dwong twatwal i wi lobo, doko da cuny gi oudo tie kede tam areco i kare dedede.

⁶Rwot oko paro be koto oudo likame ecweo dano i wi lobo, manoni oko wango cunye twatwal.

⁷Aso, Rwot oko waco be, “Abino wearo tenge ki wi lobo jo kame ango acweo, jo karacel kede leini kede gikame liao alia kede winy me wi yamo, pien likame cunya obedo yom pi cweno gi.”

⁸Do Rwot cunye oko bedo yom kede Nua.

⁹Man en itatam i kom Nua. Nua oudo obedo dano kopoore, kame oudo likame tie kede raco moro i kare mere; Nua oudo nywako kede Rubanga.

¹⁰Nua oudo tie kede awobe adek, Sem, Kam kede Yapesi.

¹¹Do jo dedede oudo obedo jo areco i nyim Rubanga, doko lobo oudo opong kede tim me gero.

¹²Rubanga oko neno wi lobo eko udo be oudo epong kede raco, pien jo dedede oudo tie kede tim areco i wi lobo.

¹³Rubanga oko waco ne Nua be, “Ango atieko moko tam na pi muducaro jo dedede, pien gin kimio lobo opong kede tim me gero; nan do ango ayaro muducaro gi karacel kede lobo.

¹⁴Gur yee amaki me ebao aber; ngongolo isengena iye di iko puco yie kede ngee kede emina.

¹⁵Ipoore cwene kaman: boro mere poore bedo puti tol ongwon kede ot kany (450), laco mere puti ot kanyaare kiwie kany (75), kede boro mere malo puti ot ongwon kiwie kany (45).

¹⁶Gur wi yee nono di iko weko kakatwolo me puti acel kede dul yai ki wi apama mere; ket ekeko i ngete; gere di etie goropa adek malo.

¹⁷Pien ango ayaro kelo alele me pii i wi lobo pi muducaro jame dedede akuo; gi dedede kame tie i wi lobo bino to.

¹⁸Do ango abino timo isikan na kede in, di wun ikounu bino donyo i yi yee, in, awobe ni, dako ni kede mon me awobe ni.

¹⁹Aso, ki jamini dedede akuo, ki gi dedede kame tie kede ringokom gi, ibino kwanyo are are, icuo kede dako, iko keto gi i yi yee.

²⁰Ibino kwanyo iko tero i yi yee icuo kede dako me winy me egere acelacel, kede me leini me egere acelacel, kede me egere acelacel me gi dedede kame liao alia, pi mino gi dong kuo.

²¹Doko da teri egere me cam acelacel iko kano gi, tetekeny kiko bino bedo giacama ne in kede ne gin.”

²²Nua oko timo kamanoni; etimo gi dedede kame Rubanga ociko ne timo.