Read kumam Ageini 7 Bible Online

Ageini 7 - kumam bible

Ageini 7

¹Di Rwot oko waco ne Nua be, “Donyi i yi yee, in karacel kede jo me odi dedede, pien ango atieko neno be in keni en kame ipoore i nyima kikom lwak me kare kanataman.

²Ter karacel kedi leini kanyaare acuo, kede kanyaare amon me egere acelacel kalikame obedo leini me kwer, kede leini kobedo me kwer iteri icuo kede dako me egere acelacel.

³Ter da winy me wi yamo acuo kanyaare kede amon da kanyaare me egere acelacel, pi mino egere gi dong di kuo i wi lobo lung.

⁴Pien ingei ceng kanyaare ango abino cwano kot i wi lobo pi iceng ot ongwon kede iwor da ot ongwon, di ako bino wearo ki wi lobo jamini akuo dedede kame acweo.”

⁵Di Nua oko timo gi dedede kame Rwot oudo ociko ne pi timo.

⁶Mwakini me dongo ka Nua oudo tie 600 i kare kame alele oumo kede wi lobo.

⁷Di Nua kede awobe mege kede dako mere kede mon me awobe mege oko donyo i yi yee pi bwot ki alele.

⁸Kikom leini kalikame obedo me kwer kede leini kobedo me kwer, kede winy kede gi dedede kame liao alia i piny,

⁹are are, icuo kede dako en odonyo i yi yee kede Nua, bala kame Rubanga oudo ociko kede Nua.

¹⁰Kikano ingei ceng kanyaare alele oko bino i wi lobo.

¹¹I mwaka me tol kanyape (600) me kuo ka Nua, i duwe me are, i ceng me tomon kiwie kanyaare (17) me duwe, i ceng nono wang pie kame tie i lobo oko tutucun, di oko yabo dirisan me malo.

¹²Kot oko cwei i wi lobo pi iceng kede iwor ot ongwon (40).

¹³I ceng nono Nua kede awobe mege, Sem kede Kam kede Yapesi kede dako ka Nua, kede mon adek me awobe mege oko donyo i yi yee.

¹⁴Gin kidonyo karacel kede leini me obar me egere dedede, kede leini me paco me egere dedede, kede gi dedede kame liao alia i piny, kede winy dedede me egere apapat, gi dedede kame tie kede bwom gi.

¹⁵Gi dedede kame tie kede ringokom di kikuo oko donyo are are i yi yee karacel kede Nua.

¹⁶Cuo kede mon me gi dedede kame odonyo i yi yee oko donyo bala kame oudo Rubanga ociko kede Nua; di do Rwot oko cego gi i yi yee.

¹⁷Alele oko meede i lobo pi ceng ot ongwon (40), di pii oko meede, di eko tingo yee malo kakabor kede wi lobo.

¹⁸Pii oko cere eko meede pong i wi lobo, di yee oko donyo lemo alema i wi pii.

¹⁹Pii oko pong adikinicel paka mwonyo mori dedede abocoboco i wi lobo;

²⁰en emedo ameda pong paka kalamo wi mori kede mita kanyaare.

²¹Gi dedede kame tie kede ringokom gi di kioto i wi lobo oko to: winy, leini me paco, leini me obar, kede gimogo kame bwote di kinyidinyidi i wi lobo, kede jo dedede;

²²gi dedede kame wei di kitie i wi lobo kakatek oko to.

²³En ewearo gikame kuo dedede kame oudo tie i wi lobo, jo kede leini kede gikame liao alia, kede winy me wi yamo, en ewearo gin dedede ki wi lobo. Nua kenekene en oko dong, kede jo kame oudo tie kede en i yi yee.

²⁴Pii oko pong i wi lobo pi ceng tol acel kede ot kany (150).