Read kumam 2 Samuel 12 Bible Online

2 Samuel 12 - kumam bible

2 Samuel 12

¹Rwot bin oko cwano Natan but Daudi. Natan oko ot bute di eko waco ne be, “Bin tie cuo are i bomba moro, ngat acel kikom gi oudo obaro do ngat acel oudo obedo ngacan.

²Icuo kobaro nono oudo tie kede romini kede doke atot;

³do icuo kame oudo obedo ngacan ca oudo li kede gimoro kwanyo kenekene akaale me oromo acel atitidi, kame oudo ewilo awila. En oudo ewile di eko dongo i cinge karacel kede idwe mege; oudo en epite kede cam mere atitidi nono, doko oudo emie emato pii i ikopo mere, di etinge i tiene. Akaale me oromo nono oudo cal ne do bala nyare.

⁴Ceng moro acel welo oko bino but ngabar nono, di en cunye likame oko mito kwanyo oromo arabo diang mere me aneka pi tedo kede welo kame oudo obino bute, do en eko lunyo kwanyo akaale me oromo me ngacan ca, di eko ngolo eko tedo ne welo kame oudo obino bute.”

⁵Cuny Daudi oko wang i kom ngabar nono eko waco ne Natan be, “Ango alairo i nying Rwot kakuo be, icuo kotimo gi noni poore to!

⁶Pi kite kame en etimo kede gikame cal kamano, doko likame eko bedo kede cuny me kisa, miero en ecul akaale me oromo kame en etero nono kede romini ongwon.”

⁷Natan oko waco ne Daudi be, “In en icuo nono. Doko Rwot Rubanga me Isirael waco be, ‘Ango aketi pi bedo abaka me Isirael, di ako laki ki cing Saulo;

⁸Ango oudo ami ot ka ngadwong ni Saulo kede mon mege, doko ako mini ibedo abaka me Isirael kede me Yuda; ka koto oudo mago likame oromi, koto oudo ango bobo amedi atot kame kalamo magonogo.

⁹Pinyo do komio in iko cano cik na di iko timo gikame rac i wanga? In imio koneko Uria; in imio jo Amon oneke di in iko tero dako mere oko doko meri.

¹⁰Pi mano, kobino bedo neko jo me odi nakanaka, pien in ibedo kede acae buta di iko tero dako ka Uria oko doko meri.

¹¹Ango abino mino dano moro me odi en kame kelo ni peko, doko abino kwanyo mon ni di ako mino but icuo apat di in ineno, di en eko buto kede gi i kakaler i dier iceng.

¹²In oudo itimo i mung, do ango abino timo gi noni kakaler i dier iceng i nyim jo lung me Isirael.’ ”

¹³Daudi oko waco ne Natan be, “Ango atieko timo dub but Rwot.” Natan oko waco ne Daudi be, “Rwot otieko sasiro dub nin; in likame ibino to.

¹⁴Akadi kamanono da, pi kite kame in inyuto kede acae but Rubanga pi gikame itimo noni, atin kame konywalo ni nono bino to.”

¹⁵Di do Natan oko dok ture. Rwot oko mino tuwo atek omako atin kame dako ka Uria oudo onywalo ne Daudi.

¹⁶Daudi bin oko bedo bako doge but Rubanga pi atin; ebedo kanyo kec, doko iwor oudo en edonyo i agola mere di eko buto piny i dier ot iwor kiakia.

¹⁷Jotic mege adongo oudo oto bute di kiko ngangao en be eyai malo; do en likame eko yei, doko oudo likame eko yei akadi cam kede gin.

¹⁸I ceng me kanyaare mere atin oko to. Jotic ka Daudi adongo oko bedo kede lworo pi yamo ne be atin oudo oto. Pien gin oudo kiwaco be, “Ber kong di atin oudo pwodi tie kuo, wan oudo okounu yamo kede do en likame eko yei winyo kop wa; benyo benyo kame wan nataman okarununu yamo ne kede be atin oto? Cengemogo eromo awanakin kene.”

¹⁹Do kakame Daudi oko neno kede be jotic mege oudo tie iwewei ken gi ken gi, en eko niang be atin oudo oto. Di en eko penyo jotic mege be, “Mam atin oto?” Gin kiko gamo be, “Ebo en etieko to.”

²⁰Di do Daudi oko yai malo, eko bol, esut kede mo di eko loko igoen. En eko ot i ot ka Rwot mino wor. Kakame en eko dok kede i ode, eko penyo cam di oko kelo ne eko camo.

²¹Jotic mege oko penye be, “Nyo ine kame in itimo? In oudo iko kanyo kec doko oudo ikoko atin di pwodi oudo ekuo; do kakame atin oko to kede, in iko yai di iko cam.”

²²Daudi oko dwoko negi be, “Di pwodi oudo atin kuo, ango oudo akanyo kec di akok, pien oudo aparo i cunya be cengemogo Rwot twero bedo kede kisa buta di eko mino atin bedo kuo.

²³Do nataman en etieko to; pinyo bobo amio ango akanyo kec? Iparo be ango akaruno bobo dwoke? Ango abino ot bute, do en likame ebino dwogo bobo buta.”

²⁴Di do Daudi oko kweno cuny dako mere Bateseba. En eko buto kede, di eko nywalo atin awobi eko cako nyinge Sulumani. Rwot oudo oko maro atin awobi nono,

²⁵di eko cwano enabi Natan pi ot cako nying atin awobi nono Jedidia,[2] pi Rwot oudo mare.

²⁶I kare nono Joab oudo tie yi kede jo me bomba me Raba, en bomba adwong me jo Amon, doko oudo eyapuno mane.

²⁷Joab oko cwano jo but Daudi pi waco ne be, “Ango atieko suro bomba me Raba; bobo atieko da mano adul kame pii me bomba wok kiye.

²⁸Nataman do in cok isirikalen odong dedede karacel, iko bino luko bomba di iko mane; ka likame itimo kamanono, ango ayaro mano bomba noni di oko bino lwonge kede nyinga.”

²⁹Aso, Daudi oko coko isirikalen mege di eko ot Raba, eko yi di eko mane.

³⁰En eko kwanyo ocoro me ajakanut kame kotimo kede saabu ki wi Milikom, en rubanga me jo Amon; peko me ocoro nono oudo kalamo kilo ot adek, doko oudo kide me wel tie iye; en eko kwanyo kide me wel nogo di eko keto i ocoro mere me ajakanut. Daudi bobo da oko tero jamini atot twatwal kame eyako ki bomba nono.

³¹Eko tero jo me bomba nono di eko mino gi tic kede musumeno, isululun kede lee, doko da kitimo tic me gono matapalin. En bin eko timo kamanono ne bomban dedede me jo Amon. Di do Daudi kede jo dedede oko dok Yerusalem.