Read kumam 2 Samuel 14 Bible Online

2 Samuel 14 - kumam bible

2 Samuel 14

¹Joab wot ka Seruya bin oko neno be abaka oudo tie paro Abisolom.

²Di Joab oko cwano dano Tekoa, di eko ot kelo dako moro ki kuno kame oudo riek. En eko waco ne dako nono be, “Cuk iturur; ngap igoen me iturur, doko kur isut kede mo, do bed bala dako kame otieko ceng atot di etie iturur pi dano mere oto.

³Di do iko ot i cal ni nono but abaka di iko waco ne kop kame atie waco ni.” Joab di oko waco ne kop kame epoore ot waco.

⁴Kakame dako me Tekoa nono oko ot kede but abaka, en eko riebere piny i nyime di eko mine wor, di eko waco ne be, “Okwe abaka, konya!”

⁵Abaka oko penye be, “Peko nyo kame tie ni?” En eko dwoko be, “Adwong, ango apuserut, cwara oto.

⁶Ango oudo atie kede awobe are, do ceng moro acel gin kiko yi i obar; ngat kame oudo dwek gi li, di ngat acel oko juto ngat ocelu eko neke.

⁷Nataman joawade na lung otieko loko wi gi i koma. Gin kitie mito be ango ami gin awobi koneko omin mere, tetekeny gin kineke pi neko omin mere. Manono bino mino oneko kiton musika. Ka kineke, udo do kikwanyo gen na acel kenekene kodong, di kiko weko cwara abongo atin moro kame mio nyinge dong i wi lobo.”

⁸Di abaka oko waco ne dako nono be, “Dok paco, ango ayaro tieko kop ni no.”

⁹En eko waco ne abaka be, “Adwong abaka, raco bed i wia kede but jo me ot ka papa na; poore abaka kede jo me ode bed abongo raco moro.”

¹⁰Abaka oko waco ne be, “Ka ngatamoro owaco ni kop moro arac, kele buta, di likame bobo eko bino muli.”

¹¹Di do en eko waco be, “Adwong, ango akwai ileg Rwot Rubanga ni, tetekeny ngacul kwor me remo ka woda kur tim nek, di likame eko neko woda ocelu.” Abaka oko waco be, “Ango acikere i nying Rwot kakuo be, likame tie gimoro akadi katitidi kame bino timere ne wodi.”

¹²Dako nono bobo oko waco be, “Adwong na, ango akwai iyei na waco ni kop moro acel bobo.” Abaka oko waco ne be, “Aso waci.”

¹³Dako nono oko waco be, “Pinyo bo do komio in iko timo gikame cal kamanono but jo ka Rubanga? Pien kop kame in iwaco no mio in ingolo kop i komi keni ka in likame iyei dwoko ngat koringo tenge ki paco.

¹⁴Wan dedede obinunu to; wan ocalunu bala pii kame olepar piny, kalikame bobo okaruno jobo. Akadi Rubanga da likame kwanyo kuo; do en emo epone me dwoko dano, tetekeny ngat koringo tenge ki nyime kur dong bedo tenge atwal.

¹⁵Adwong na abaka, ango nataman abino pi waco ni kop noni pien jo oudo omia lworo; ango oudo aparo i cunya be, ‘Ango abino yamo kede abaka, cengemogo ebino timo na gikame akwae.

¹⁶Ango oudo angeo be in ibino winyo kop na di iko laka ki cing ngat kame mito kwanya karacel kede woda tenge ki lobo kame Rubanga omio jo mege.’

¹⁷Ango oudo aparo i cunya be, ‘Kop kame adwong na abaka waco bino mina audo anapakin’; pien adwong na abaka cal bala malaika ka Rubanga, engeo poko gikaber kede gikarac. Rwot Rubanga ni bed kedi!”

¹⁸Di abaka oko dwoko ne be, “Ango ayaro penyi, do kur imung na gimoro.” Dako nono oko waco be, “Adwong na abaka, penya.”

¹⁹Abaka oko penye be, “Benyo, Joab oribere kedi i kop noni?” Dako nono oko dwoko be, “Adwong na abaka, ango alairo ateteni, likame dano karuno pango dwoko kop moro kame in ipenyo. Ateteni ngatic ni Joab en ocwaa; en da kame eko waco na kope nogo dedede.

²⁰Ngatic ni Joab otimo gi noni tetekeny ekel alokaloka i kom gi kotimere. Do adwong in itie kede rieko kame cal bala me malaika ka Rubanga; in ingeo gi dedede kame timere i wi lobo.”

²¹I cen mere abaka oko waco ne Joab be, “Manono ber, ango atieko yei timo gikame in imito; ot idwoki awobi Abisolom.”

²²Joab oko riebere piny i nyim abaka di eko mine wor, eko kwano ne abaka winyo. Joab oko waco be, “Adwong na abaka, tin ango atieko ngeno be in cunyi yom keda pien in iyei winyo kwac na.”

²³Di do Joab oko yai, eko ot Gesur di eko dwoko Abisolom Yerusalem.

²⁴Do abaka oko waco be, “Poore Abisolom ot i ot amake; miero kur ebin i nyima.” Aso, Abisolom oko ot i ode amake, di likame eko ot i nyim abaka.

²⁵I Isirael lung oudo likame tie ngatamoro kame kosurao cilo mere bala me ka Abisolom; oudo likame tie karamoro arac i kome cako ki lwete me tiene kiton i yer wie.

²⁶En oudo elielo wie i atiekini me mwaka acelacel kame edongo di eko doko pek ne. Kame en oudo elielo wie, epimo rom me yer wie kalamo kilo are i gipim me abaka.

²⁷Abisolom oudo onywalo idwe awobe adek, kede atin nyako acel kame oudo nyinge Tamar. En oudo ebedo dako acil twatwal.

²⁸Abisolom bin oko tieko mwakini are Yerusalem di likame eneno abaka.

²⁹Di do en eko cwano dano lwongo Joab pi bino bute me wek eore but abaka; do Joab oko dagi bino bute. En eko bobo cwano dano tien me are, do Joab bobo oko dagi bino.

³⁰Di do Abisolom oko waco ne jotic mege be, “Nenunu, poto ka Joab tie i nget mera, doko mawele tie iye; otunu di ikounu cwinye.” Aso, jotic ka Abisolom oko wango poto nono kede mac.

³¹Di Joab oko yai eko lubo Abisolom i ode, di eko penye be, “Pinyo komio jotic ni owango poto na?”

³²Abisolom oko dwoko ne Joab be, “Neningo, ango acwao kop buti be ibin kan tetekeny acwai but abaka i ot ipenye be, ‘Pinyo komio ango ayai ki Gesur di ako bino kan? Oudo koto pwodi eber nango dong bedo kuno.’ Nataman ango amito imia aot i nyim abaka; ka ango atie kede raco moro, wek eneka!”

³³Di do Joab oko ot but abaka di eko waco ne kop ka Abisolom; di abaka oko lwongo Abisolom. En eko bino but abaka di eko riebere piny i nyime; di abaka oko moto Abisolom di enote.