Read kumam 2 Samuel 20 Bible Online

2 Samuel 20 - kumam bible

2 Samuel 20

¹I kanono oudo tie iye icuo moro kame ekite mege reco, kame nyinge Seba, wot ka Bikiri, en dano me ekeko ka Benjamin. En eko kuto agwara di ewaco be, “Wan oliunu kede iner moro i kom Daudi, oliunu kede gimoro amako wa kibut wot ka Yese, ngat acelacel doki i eema mere, wun jo me Isirael!”

²Manono oko mino jo dedede me Isirael oweko Daudi di kiko cako lubo Seba wot ka Bikiri. Do jo me Yuda oko lubo abaka gi di cuny gi omoko i kome cako ki Yorodan tuno Yerusalem.

³Aso Daudi oko tuno i paco mere me abaka kame tie Yerusalem. En eko kwanyo mon mege tomon kame oudo bin ebedo kede gi abeda, kame oudo eweko daro ode, di eko keto gi i ot di eko mino isirikalen odonyo daro gi. En eko donyo gwoko gi do likame bobo eko buto kede gi. En ecego gi kuno tuno i kare me to gi; oudo gin kitie bedo i kuo acal bala me apuserun.

⁴Abaka oko waco ne Amasa be, “Lwong jo me Yuda cokere buta di pwodi ceng adek likame okato, do ida iko bedo tie kanoni.”

⁵Amasa oko ot lwongo jo me Yuda do eko gal ekalamo ceng kame abaka oudo ociko ne.

⁶Daudi oko waco ne Abisai be, “Seba wot ka Bikiri bino timo ne wa raco akalamo me ka Abisolom. Pi mano kwany isirikalen na ikounu wape, aso ka li, ebino ot donyo i bomba kame kocelo kede apama di eko bwot.”

⁷Di Joab kede jo mege, kede jo Keret, kede jo Pelet, kede isirikalen ace apat oko yai ki Yerusalem pi ot wapo Seba wot ka Bikiri.

⁸Kakame kituno kede i kidi adwong me Gibeon, Amasa oko riamo kede gi. Joab oudo tie ngapo igoen me sirikale di ekodo epima kame tie i akularu mere i kom rakoba kame etweo i piere. Kakame oudo etie meede ot kede anyim, epima oko poto ne piny.

⁹Joab oko penyo Amasa be, “Omina kuo tie teri benyo?” Di eko mako yer me tik Amasa kede cinge tetu cam pi noto leme.

¹⁰Do Amasa likame oko neno epima kame oudo tie i cing Joab. Aso Joab oko cobo Amasa i yie kede epima nono paka jame me yie bwote piny, di eko to. Likame bobo eko medo cobe tien me are. Di Joab kede omin mere Abisai oko meede ot anyim ot wapo Seba wot ka Bikiri.

¹¹Dano ka Joab acel oko cungo i nget Amasa di eko waco be, “Ngat kame tie pi Joab kede Daudi, poore elub Joab!”

¹²Amasa oko buto i dier gudo di epwokere kede remo. Dano ka Joab nono oko neno be jo dedede oudo tie bino di kicungo kanono, omio en eko wano kom Amasa tenge ki gudo di eko tere i poto, eko uco egoe i kome.

¹³Kakame otieko kwanyo kede kom Amasa tenge ki gudo, jo dedede oko lubo Joab pi ot wapo Seba wot ka Bikiri.

¹⁴Seba oko bebeo but jo dedede me ateker me Isirael di eko tuno i bomba me Abel Bet Maka, di jo dedede me ekeko ka Bikiri oko cokere odonyo kede i bomba.

¹⁵Isirikalen ka Joab oko bino di oko lukaro Seba i bomba me Abel Bet Maka. Gin kiko donyo kumemo lobo kede yugi i kor apama, di kikunyo dud apama piny pi mito rete piny.

¹⁶Di dako moro ariek oko lwongere ki bomba be, “Winyunu! Winyunu! Wacenu Joab bin kan, ango amito yamo kede.”

¹⁷Joab oko ot kuno di dako nono oko penye be, “In en Joab?” Joab oko dwoko be, “Ebo, ango inononi.” Dako nono oko waco ne be, “Winy ber kop na.” Joab oko dwoko be, “Ango atie winyo.”

¹⁸Dako nono oko waco ne be, “Jo bin maro waco be, ‘Ber kiot penyo i bomba me Abel’; manono bin mio gi kiporo kop di kop ko tiek kiber.

¹⁹Bomba wa ni obedo bomba kame mulem tie iye, doko egenere i Isirael; in itie mito dudubo bomba kame tie bala toto i lobo me Isirael. Pinyo komio imito dudubo gikame obedo me ka Rwot.”

²⁰Joab oko dwoko be, “Manono likame bino timere, likame ango gira abino dudubo bomba wu!

²¹Likame etie kamanono! Do icuo me piny kobedo mori mori me Epuraimu, kame nyinge Seba wot ka Bikiri, en kobedo kede tim me jemo but Abaka Daudi; mienu i cinga, di ango ako gira yai aweko bomba noni.” Dako nono oko waco be, “Wan obino uco ne wu wie ki malo me apama.”

²²Di dako nono oko ot bebeo but jo dedede kede tam mere me rieko nono. Gin kiko ngolo wi Seba wot ka Bikiri di kiko uce ki wi apama ooko ne Joab. Joab oko kuto agwara pi kwenyaro jo mege pi yai, di jo dedede oko yai odok i miere gi. Joab oko dok Yerusalem but abaka.

²³Joab en koudo telo wi isirikalen me Isirael; Benaya wot ka Yekoyada oudo telo wi isirikalen adaro Daudi;

²⁴Adoram oudo telo jo adio jo timo tic moroni tetek; Yekosapat wot ka Akilud oudo obedo ngat atelo tic me coko kope;

²⁵Seba oudo obedo kalani; Sadoki kede Abiata oudo obedo josaseredoti;

²⁶kede Ira dano me bomba me Yair oudo obedo ngat acel kikom josaseredoti ka Daudi.