Read kumam 1 Abakai 11 Bible Online

1 Abakai 11 - kumam bible

1 Abakai 11

¹Abaka Sulumani bin oko bedo maro mon atot me obukui ribo kede nyar ka Parao. En bin eko nyomo mon kibut jo Moab, Amon, Edom, Sidon kede Kiti,

²gin atekerin kame bin Rwot owaco ne jo me Isirael kop i kom gi be, “Likame ibinunu nyomere kede gin; pien ateteni gin kibino loko cunyu lubo rubangan gin”; en magonogi kame Sulumani oko keto cunye maro.

³Sulumani bin oko nyomo mon tol kanyaare koudo obedo anyira me abakai, kede da oudo en etie kede mon tol adek kame en ebedo kede gi abeda. Mon nogi bin oko loko cunye tenge kibut Rubanga,

⁴pien tuno i kare kame do en bin eti kede, gin oudo kitieko loko cunye woro rubangan me obukui. En oudo do likame egenere but Rwot Rubanga mere kede cunye lung bala kame bin papa mere Daudi oudo oketo kede cunye i kom Rubanga.

⁵Sulumani bin obedo woro Asitate rubanga adako me jo Sidon, kede Milikom rubanga aneno rac me jo Amon.

⁶Aso, Sulumani bin oko bedo timo gikarac i wang Rwot, di en likame eko lubo Rwot kede cunye lung, bala kame papa mere Daudi bin obedo timo.

⁷En bin egero kabedo me woro Kemos, en rubanga aneno rac me Moab, kede kabedo me woro Molek, en rubanga aneno rac me Amon, i wi moru i bad tetu kide me Yerusalem.

⁸En bin eko da timo kamanono ne mon mege dedede me obukui, en egero negi kabedere me mino giayala me odok angwe kur kede giayala angola but rubangan gin.

⁹Akadi bed bala Rwot Rubanga me Isirael bin oneeno but Sulumani tien are di cike be kur ewor rubangan me obukui, Sulumani bin likame oko lubo kop ka Rwot, do en eko lokere tenge kibute. Manono oko mino Rwot olilo ne Sulumani

¹¹di eko waco ne be, “Pien manoni obedo gikame oudo tie i tam nin di in likame iko gwoko isikan na kede iswilia na kame bin aciko ni, ango ateteni abino kwanyo ajakanut ki buti di ako mino but ngatic ni.

¹²Do pir papa ni Daudi, ango likame abino timo manoni i kare me kuo nin, do i kare me apugan ka wodi.

¹³Akadi kamanono da, ango likame abino kwanyo ajakanut lung ki cinge. Ango abino weko ne jo me ekeko acel pir ngatic na Daudi kede pir Yerusalem, bomba kame ango atieko yero.”

¹⁴Di do Rwot bin oko mino Kadad, en dano kame bin yai ki paco me abaka me Edom, oko doko ngakwor ka Sulumani.

¹⁵Pien bin kakame Daudi omao kede Edom, di Joab ngatel me isirikalen mege bin oko ot kunono pi yiko jo kame bin koneko i yi, en bin eko neko cuo dedede i Edom.

¹⁶Joab kede jo me Isirael lung bin oko dong bedo Edom tieko duwete kanyape, tuno gin tieko neko cuo dedede.

¹⁷Do Kadad bin oko lwi di eko ringo Misiri kede jo Edom mogo kame bin obedo jotic ka papa mere. I kare nono oudo en pwodi etie atin awobi.

¹⁸Gin bin kiyai ki Midian di kiko ot paka tuno Paran; gin kiko yai ki Paran kede jo ace di kiko ot paka tuno Misiri but Parao abaka me Misiri. Parao bin oko mino Kadad ot, lobo kede cam.

¹⁹Parao bin oko bedo kede cuny me amara atek but Kadad, tetekeny en eko mino Kadad amin me dako mere, amin me Takepenes abaka adako, pi doko dako mere.

²⁰Amin me Takepenes bin oko nywalo ne Kadad atin awobi kame nyinge Genubat, kame Takepenes bin oko pito i ot me abaka. Genubat bin oko dongo i ot ka Parao karacel kede idwe ka Parao.

²¹Kakame Kadad oko winyo kede i Misiri be Daudi oudo otieko to, kede be Joab ngatel me isirikalen mege da oudo otieko to, en bin eko waco ne Parao be, “Wek ango adok i piny wa.”

²²Do Parao oko penye be, “Nyo kalikame ango ami en kame mio in imito dok i piny me tur wu?” Kadad oko gamo doge be, “In kenekene yei na aoti.”

²³Rubanga bobo oko mino Reson wot ka Eliada da odoko ngakwor ka Sulumani. Reson bin oringo tenge kibut ngadwong mere, Abaka Kadadeser me Soba.

²⁴En bin eko coko jo mogo bute di en eko doko ngatel me joyak. (Manoni bin otimere ingei Daudi bwono Kadadeser di eko neneko isirikalen mege.) Reson bin oko ot Damasiko kede ekodet mere di gin kiko donyo bedo kunono. Jo mege nogo bin oko mine edoko abaka me Siria.

²⁵En bin eko bedo ngakwor me Isirael pi kare me kuo ka Sulumani lung, di ekelo negi peko bala kame Kadad da obedo timo; en bin ebedo kede acae i kom jo me Isirael di epugo Siria.

²⁶Yeroboam wot ka Nebat, dano me ekeko ka Epuraimu awok ki Sereda, ngatic ka Sulumani, kame toto mere oudo obedo apuserut kame nyinge Serua, bin oko jemo ne abaka.

²⁷Man en itatam amako kop me jemo mere nono. Sulumani bin tie toro nget bomba i bad tetu kide me Yerusalem kede temuno apama me bomba.

²⁸Yeroboam oudo obedo eponga atek i tic. Kakame Sulumani bin oneno kede be en oudo etek i tic, en eko kete telo tic kame bin omako iye jo tetek i adul me jo me ot ka Yosepu.

²⁹I kare nono bin di Yeroboam tie yai ki Yerusalem, enabi Akija dano me Silo oko ude i yongayo. Akija oudo ongapo egoe anyen. Gin oudo kitie i yongayo ken gi jo are.

³⁰Akija bin oko gonyo ekanso anyen kame oudo engapo di eko nyinyilo en i adulion tomon kiwie are.

³¹Di eko waco ne Yeroboam be, “Ter in adulion tomon, pien Rwot Rubanga me Isirael waco be, ‘Neningo, ango ayapuno kwanyo ajakanut ki cing Sulumani, di ako bino mino in pugo jo me ikekon tomon.

³²Sulumani bino dong kede jo me ekeko acel pir ngatic na Daudi kede pir Yerusalem, bomba kame ango atieko yero kikom bomban me ikekon me Isirael lung.

³³Ango abino timo manoni piento Sulumani otieko daga di eko lunyo woro Asitate rubanga adako me jo Sidon, Kemos rubanga me Moab, kede Milikom rubanga me jo Amon. En likame ebedo lubo yote na, doko likame ebedo timo gikame poore i wanga, kede da en likame egwoko pwony na kede iswilia na, bala kame bin papa mere Daudi obedo timo.

³⁴Akadi kamanono da, ango likame abino kwanyo ajakanut lung ki cinge, do ango abino mine ebedo ngapug pi kare me kuo mere lung, pir ngatic na Daudi kame bin ango ayero di en eko bedo gwoko cik na kede iswilia na.

³⁵Ango abino kwanyo ajakanut kibut wode di ako mino in Yeroboam ibedo ngapug me ikekon tomon.

³⁶Do ango abino mino wot ka Sulumani pugo ekeko acel, tetekeny ngatic na Daudi bed tie kede akware kame pugo i nyima i Yerusalem, bomba kame ango ayero pi bedo mera.

³⁷Ango abino mino in Yeroboam ibedo abaka me Isirael, di iko bino pugo adulion dedede kame cunyi mito.

³⁸Ka in ibino lubo gi dedede kame ango aciko ni, di iko lubo yote na, kede iko bedo timo gikame poore i wanga pi gwoko iswilia na kede cik na, bala kame bin Daudi ngatic na obedo timo, ango abino bedo tie kedi, di ako bino mini ibedo abaka me Isirael, kede ako neno be ikwae ni en kame lunyo wangi, bala kame atieko timo ne Daudi.

³⁹Ango abino mino ikwae ka Daudi alola pi dub ka Sulumani, do likame pi kare dedede.’ ”

⁴⁰Aso, Sulumani bin oko tamo mito neko Yeroboam, do Yeroboam oko lwi eringo Misiri but abaka Sisak, di en eko dong bedo kunono tuno Sulumani to.

⁴¹Gi dedede kame bin Sulumani otimo, tice mege, kede rieko mere, gin dedede kowandiko gi i Itabu amako Tice ka Sulumani.

⁴²En bin epugo Isirael lung i Yerusalem pi mwakini ot ongwon.

⁴³Sulumani bin oko to di oko yike i nget joakwari mege i Bomba ka Daudi, di wode Rekoboam oko lunyo wange bala abaka.