Read kumam 1 Abakai 13 Bible Online

1 Abakai 13 - kumam bible

1 Abakai 13

¹Kakame Yeroboam oudo tie cungo kede i nget alutari pi dunyo odok angwe kur, Rwot oko ciko enabi oko yai ki Yuda di eko ot Betel kunono,

²di eko waco kop i kom alutari nono be, “Okwe alutari, alutari, Rwot owaco kop i komi kaman: kobino nywalo i ot ka Daudi atin kame nyinge Yosia. En ebino ngongolo i wii kanoni josaseredoti kame timo tic i ude kame koworo kiye rubangan atie i wi imukuran, gin jo kame dunyo odok angwe kur i wii, di oko bino wango cogere me jo i wii kanoni.”

³Enabi nono oko mino gianyuta amoko kop mere ceng nono be, “Man en gikame bino nyuto be Rwot en kowaco kop noni kibuta: alutari noni bino tyaikin piny di buru kame tie iye ko bino welere.”

⁴Kakame Abaka Yeroboam owinyo kede kop kame enabi owaco, en eko cimo enabi nono di elelemo be, “Makenu!” Do bade koudo erieo me cimo enabi nono oko mito, omio likame oudo doko etwero dole.

⁵Alutari da oko tyaikin piny di buru oko welere, bala kame enabi oudo owaco i nying Rwot.

⁶Abaka Yeroboam oko waco ne enabi nono be, “Leg but Rwot Rubanga ni pira, tetekeny bada dok ber!” Enabi nono oko lego but Rwot, di bad abaka oko doko ber.

⁷Di abaka oko waco ne enabi nono be, “Oupere oot tura oko cam; ango abino mini giamia moro.”

⁸Do enabi nono oko dwoko be, “Akadi di imia dul me ajakanut ni, likame ango abino upere kedi, akadi camo gimoro amoto mato pii i kabedo noni.

⁹Pien Rwot ocika be kur acam gimoro akadi mato pii da, doko da be kur adok paco di alubo yongayo kame oudo awok kiye.”

¹⁰Aso, en eko dok di elubo yongayo apat.

¹¹I kare nono oudo tie enabi oti koudo bedo Betel. Awobe mege oko ot waco ne gikame enabi kowok ki Yuda otimo i ceng nono, kede gikame ewaco ne Abaka Yeroboam.

¹²Papa gi oko penyo gi be, “Elubo yongayo mene?” Gin kiko nyuto ne yongayo kame enabi kowok ki Yuda olubo me dok.

¹³En eko waco ne awobe mege be, “Tweunu na abeno ingei punda.” Aso, gin kiko tweno ne abeno ingei punda di eko yito iye eko cako ringo kede.

¹⁴En eko cako wapo enabi nono di eko ude di etie bedo i dud yat oak. En eko penye be, “In en enabi kowok ki Yuda?” En eko dwoko be, “Ebo, ango inononi.”

¹⁵Enabi oti nono oko waco ne enabi me Yuda be, “Upere keda oot paco oko cam.”

¹⁶Do enabi kowok ki Yuda oko dwoko be, “Likame ango akaruno dok kedi, akadi camo gimoro amoto mato pii i kabedo noni,

¹⁷pien Rwot ocika be kur acam gimoro, akadi mato pii i kabedo noni, doko da be kur adok di alubo yongayo kame awok kiye.”

¹⁸Di enabi oti me Betel oko waco ne be, “Ada abedo enabi bala in; doko da Rwot ocwao malaika waco na be apoore dwoki tura di iko cam kede iko mato pii.” Do en oudo etie ngale.

¹⁹Aso, enabi kowok ki Yuda oko dok kede en, di eko cam kede mato pii i ode.

²⁰Kakame oudo kitie cam kede, Rwot oko yamo ki dog enabi me Betel

²¹but enabi kowok ki Yuda be, “Rwot owaco be in idagi lubo kop mere, pien in dagi timo gikame en eciko ni.

²²Do akaka manono, in iko lokere dwogo di iko cam kede mato pii i kabedo kame en eciki be kur icam kiye, akadi mato kiye pii. Pi manono, kobino neki di likame oko bino yiko komi i ates me turu.”

²³Ingei en tieko cam kede mato pii, enabi me Betel oko tweno abeno ingei punda ne enabi me Yuda.

²⁴Kakame oudo en etie ot kede, en eko riamo kede engu i yongayo di engu oko neke. Kome oudo tie buto i yongayo kanono, di punda kede engu cungo i ngete.

²⁵Jo mogo oko beo kunono di kiko neno kome di tie buto i yongayo di engu tie cungo i ngete. Gin kiko tero kop nono i bomba me Betel.

²⁶Kakame enabi koudo odwoke cen owinyo kede kop nono, en eko waco be, “Manono en enabi kodagi winyo kop ka Rwot; manono en komio Rwot omie but engu, di engu oko nyinyilo en tuno neke bala kame oudo Rwot owaco ne.”

²⁷Di eko waco ne awobe mege be, “Ketunu na abeno ingei punda.” Gin kiko timo kamanono,

²⁸di en eko ringo kede punda di eko udo di kom enabi tie buto i yongayo, di punda kede engu tie cungo kanono. Engu oudo likame ocamo kome akadi suro punda mere da.

²⁹Enabi oti nono oko kwanyo kom enabi me Yuda, eko kete i wi punda mere eko dwoke i bomba pi koke kede pi yike.

³⁰En eko yiko kome i ates mere amake, di gin kiko donyo koko be, “Okwe can, kom omin wa!”

³¹Ingei en tieko yike, eko waco ne awobe mege be, “Kame ango ato, yikanu i ates kame koyiko iye enabi noni; pielunu cogere na buti i nget mege.

³²Pien kope ka Rwot kame en ewaco i kom alutari me Betel, kede i kom ude me woro rubangan atie i bomba me Samaria ateteni bino cobere.”

³³Akadi ingei gi noni timere da, Yeroboam pwodi likame oko yei lokere tenge ki yongayo mere arac, do en eko meede yero jo ace kikom jo di ecibo gi doko josaseredoti atimo tic i abilan kame en egero. En eko bedo kwero pi doko ngasaseredoti ngatamoroni kenekene kame oudo tie kede mit me doko ngasaseredoti.

³⁴Tim noni oko doko dub i ot ka Yeroboam, omio Rwot oko muducaro ture atwal atwala ki wi lobo.