Read kumam 1 Abakai 15 Bible Online

1 Abakai 15 - kumam bible

1 Abakai 15

¹I mwaka me tomon kiwie kanyauni me apugan ka Abaka Yeroboam wot ka Nebat me Isirael, Abija oko doko abaka me Yuda,

²di eko pug ki Yerusalem pi mwakini adek. Toto mere oudo nyinge Maka nyar ka Abisolom.

³En etimo dub dedede kame papa mere oudo otimo, doko cunye oudo likame tie kede ateni me lubo kop ka Rwot Rubanga mere bala bin kwaru mere Daudi.

⁴Do pi Daudi, Rwot Rubanga mere oko mine awobi kame lunyo wange pugo Yerusalem kede pi mine cungo di etek.

⁵Pien Daudi oudo obedo timo gikame poore i nyim Rwot, di likame eko weko timo gimoro kame en eciko ne pi timo i kare me kuo mere lung, kwanyo kenekene i kop ka Uria Ngakiti.

⁶Yi kame oudo ocakere i dierediere ka Rekoboam kede Yeroboam oko meede i kare me kuo ka Abija dedede.

⁷Gi dedede ace kame Abija otimo kowandiko gi i Itabu me Itatam amako Abakai me Yuda. Yi oko bedo tie i dierediere ka Abija kede Yeroboam.

⁸Abija oko to di oko yike i nget joakwari mege i Bomba ka Daudi, di wode Asa oko lunyo wange bala abaka.

⁹Asa bin oko doko abaka me Yuda i mwaka me ot are me apugan ka Yeroboam bala abaka me Isirael,

¹⁰di eko pug ki Yerusalem pi mwakini ot ongwon kiwie acel. Da mere nganywal papa mere oudo obedo Maka nyar ka Abisolom.

¹¹Asa bin oko timo gikame oudo ber i nyim Rwot bala bin kwaru mere Daudi.

¹²En eriamo tenge cuo kede mon kame oudo jo buto kede gi i kabedo kame oudo koworo kiye rubangan, di eko kwanyo tenge caljwogi dedede kame joakwari mege oudo otimo.

¹³En doko da eko kwanyo tenge da mere Maka ki ruom mere me toto me abaka, piento en oudo etimo cal aneno rac me rubanga adako anyinge Asera; Asa bin oko totongo cal nono piny di eko wange i Aditot me Kideron.

¹⁴Do en likame eko dudubo abilan me woro rubangan. Bed bala kamanono da, cunye oudo tie kede ateni me lubo kop ka Rwot i kare me kuo mere dedede.

¹⁵En eko tero i tempulo jamini kame en kede papa mere oudo kikwero but Rwot; etero jamini kame kocweo kede saabu kede siliba.

¹⁶Abaka Asa me Yuda kede Abaka Basa me Isirael oko bedo yi pi kare lung kame oudo gin kibedo kede jopug.

¹⁷Abaka Basa me Isirael oko suro Yuda, di eko cako celo bomba me Rama kede apama atek, pi gengo jo donyo Yuda but Abaka Asa, kede wok kiye.

¹⁸Di Asa oko kwanyo saabu kede siliba dedede kame oudo odong i tempulo kede i ot ka abaka, di eko mino gi i cing jotic mege. En eko cwano gi but Abaka Benekadad wot ka Tabarimon, wot ka Kesion me Aram, kame oudo bedo Damasiko pi waco ne be,

¹⁹“Poore wan okodere kedi, bala kame bin papa na kede papa ni otimo. Nan ango acwao ni siliba kede saabu noni bala giamia buti. Oti itur kodere ni kede Abaka Basa me Isirael, tetekeny ekaruno kwanyo isirikalen mege ki adul na.”

²⁰Benekadad oko winyo kop ka Abaka Asa, di eko cwano isirikalen mege suro bomban me Isirael. En eko mako bomban me Iyon, Dan, Abel Bet Maka, adul kame tie i nget nam me Galilaya, kede adul me Naputali dedede.

²¹Kakame Basa owinyo kede kop nono, en eko jiko gero bomba me Rama di eko donyo bedo Tirisa.

²²Di Abaka Asa oko mino kop i Yuda dedede kame ciko jo dedede abongo weko ngatamoro, pi kwanyo ki Rama kide dedede kede ibaon kame Basa oudo tie tic kede me gedo. Abaka Asa oko tic kede gi me gero Misipa, kede Geba atie i adul ka Benjamin.

²³Gi dedede ace kame Asa otimo, teko mere me yi, kede bomban kame egero kowandiko gi i Itabu me Itatam amako Abakai me Yuda. Do i kare kame eti kede, tuwo oko mako tiene.

²⁴Asa oko to di oko yike i nget joakwari mege i Bomba ka Daudi, di wode Yekosapat oko lunyo wange bala abaka.

²⁵I mwaka me are me apugan ka Abaka Asa me Yuda, Nadab wot ka Abaka Yeroboam oko doko abaka me Isirael di eko pug pi mwakini are.

²⁶Eda eko timo gikame rac i nyim Rwot, en elubo ekite ka papa mere di eko mino jo me Isirael odubo.

²⁷Basa wot ka Akija, dano me ekeko ka Isakar, oko bedo kede iik arac i kom Nadab. Kakame Nadab kede isirikalen mege oudo ooto suro kede bomba me Gibeton i Pilistia, Basa oko neko Nadab kunono.

²⁸Manoni bin otimere i mwaka me adek me apugan ka Asa bala abaka me Yuda. Di do Basa oko lunyo wang Nadab bala abaka me Yuda.

²⁹Cucuto di bin en edoko abaka, en eko neneko jo dedede me ot ka Yeroboam. Di lubere kede kop kame Rwot oudo owaco ki dog ngatic mere Akija me Silo, bin oko neneko jo dedede me ot ka Yeroboam.

³⁰Manoni otimere pi dub ka Yeroboam kame en etimo, kede kame emio jo me Isirael otimo, di manono oko wango cuny Rwot Rubanga me Isirael.

³¹Gi dedede ace kame Nadab otimo kowandiko gi i Itabu me Itatam amako Abakai me Yuda.

³²Abaka Asa me Yuda kede Abaka Basa me Isirael oko bedo yi nakanaka i kare dedede kame oudo kitie kede i apugan.

³³I mwaka me adek me apugan ka Abaka Asa me Yuda, Basa wot ka Akija oko doko ngapug me Isirael, di eko pug di ebedo Tirisa pi mwakini ot are kiwie ongwon.

³⁴Eda eko timo gikame rac i nyim Rwot, en elubo ekite ka Yeroboam di eko mino jo me Isirael odubo.