Read kumam 1 Abakai 16 Bible Online

1 Abakai 16 - kumam bible

1 Abakai 16

¹Rwot oko waco ne enabi Yeku wot ka Kanani kop i kom Basa be,

²“In oudo kony ni li, do ango ako tingi malo ako mini ibedo ngatel ka jo na me Isirael. Do nan ida idubo bala Yeroboam iko mino jo na da otimo dub. Dub gi nono owango cunya;

³pi manono, abino muducaro in kede jo me odi dedede bala kame atimo ne Yeroboam wot ka Nebat.

⁴Dano ni moro kame bino to i bomba igwogin en kame bino camo; do dano ni moro kame bino to tenge i calo winy en kame bino camo.”

⁵Gi dedede ace kame Basa otimo, kede teko mere me yi, kowandiko gi i Itabu me Itatam amako Abakai me Isirael.

⁶Basa oko to di oko yike i nget joakwari mege i Tirisa, di wode Ela oko lunyo wange bala abaka.

⁷Kop kame Rwot owaco i kom Basa kede jo me ode ki dog enabi Yeku oudo ewaco pi dub kame Basa otimo i nyime. En oudo ewango cuny Rwot, likame pi raco kame en etimo bala bin Yeroboam, do da piento en eneneko jo me ot ka Yeroboam.

⁸I mwaka me ot are kiwie kanyape me apugan ka Abaka Asa me Yuda, Ela wot ka Basa oko doko abaka me Isirael di eko pug ki Tirisa pi mwakini are.

⁹Do ngatic mere Simiri, ngadwong me isirikalen koudo lo dul me cabalan me abaka, oko bedo kede iik arac i kome. Ceng moro acel i Tirisa, Ela oudo tie amera i ot ka Arasa, en ngat koudo lo paco me abaka i Tirisa.

¹⁰Simiri oko donyo i ot kanono di eko neko Ela, di do en eko lunyo wange bala ngapug. Manoni otimere i mwaka me ot are kiwie kanyaare me apugan ka Asa me Yuda.

¹¹Cucuto di Simiri obedo i kom me pug bala abaka, en eko neneko jo dedede me ot ka Basa; likame eweko akadi icuo acel kobedo wad mere amoto adieru mere.

¹²Aso, di lubere kede kop kame Rwot oudo owaco i kom Basa i dog enabi Yeku, Simiri oko neneko jo dedede me ot ka Basa.

¹³Pien tim gi me woro caljwogi, kede kite kame oudo kimio kede jo me Isirael otimo dub, Basa kede wode Ela oudo oko wango cuny Rwot Rubanga me Isirael.

¹⁴Gi dedede ace kame Ela otimo kowandiko gi i Itabu me Itatam amako Abakai me Isirael.

¹⁵I mwaka me ot are kiwie kanyaare me apugan ka Abaka Asa me Yuda, Simiri oko doko abaka me Isirael di eko pug pi ceng kanyaare di ebedo Tirisa. Isirikalen me Isirael oko gero kimere gi luko bomba me Gibeton i Pilistia.

¹⁶Kakame gin kiko winyo kede be Simiri oudo otimo iik di eko neko Abaka Ela, gin di do kiko cibo Omiri ngat koudo obedo ngadwong gi me isirikalen odoko abaka me Isirael esawa nono ki kanono.

¹⁷Aso, Omiri oko yai ki Gibeton karacel kede isirikalen me Isirael di gin kiko ot luko bomba me Tirisa.

¹⁸Kakame Simiri oneno kede be oudo kotieko mano bomba, en eko ot i apama atek me yie kame celo paco me abaka di eko cwinyo paco me abaka karacel kede eda, di eko to.

¹⁹Manoni otimere pi dub mege i nyim Rwot. En etimo gikarac i nyim Rwot; elubo ekite ka Yeroboam di eko mino jo me Isirael odubo.

²⁰Gi dedede ace kame Simiri otimo, karacel kede iik arac kame en etimo, kowandiko gi i Itabu me Itatam amako Abakai me Isirael.

²¹Di do jo me Isirael oko pokere tien are; dul me jo oudo mito be Tibini wot ka Ginat bed abaka, kede dul me jo oudo mito Omiri.

²²Do jo kame oudo mito Omiri oko bwono jo kame oudo mito Tibini wot ka Ginat; Tibini oko to di Omiri oko doko abaka.

²³I mwaka me ot adek kiwie acel me apugan ka Abaka Asa me Yuda, Omiri oko cako pugo Isirael di eko pug pi mwakini tomon kiwie are. Mwakini kanyape me agege en epugo di ebedo Tirisa,

²⁴di eko wilo emukura me Samaria kede sente me siliba akaya tol kanyape kibut icuo anyinge Semer, en oudo won emukura nono.

²⁵Omiri oko timo gikame rac i nyim Rwot; en etimo gikame rac kalamo abakai apat kame en elubo.

²⁶Bala bin Yeroboam, en ewango cuny Rwot Rubanga me Isirael i yore me en timo dub, kede da en mino jo me Isirael timo dub kede donyo woro caljwogi.

²⁷Gi dedede ace kame Omiri otimo, kede teko me yi kame en enyuto, kowandiko gi i Itabu me Itatam amako Abakai me Isirael.

²⁸Omiri oko to di oko yike Samaria, di wode Akab oko lunyo wange bala abaka.

²⁹I mwaka me ot adek kiwie kanyauni me apugan ka Abaka Asa me Yuda, Akab wot ka Omiri oko doko abaka me Isirael, di en eko pug i Samaria pi mwakini ot are kiwie are.

³⁰Akab oko timo gikarac i nyim Rwot kalamo abakai ace apat kame en elubo.

³¹En elubo ekite ka Yeroboam wot ka Nebat; do arac kalamo en eko nyomo Jesebel nyar ka Abaka Etebaal me Sidon, di do eko donyo woro Baal.

³²En eko gero ne Baal tempulo i Samaria, di eko gero ne iye alutari.

³³En doko eko sipo da epir me kidi me woro rubanga adako anyinge Asera. Akab otimo gikame wango cuny Rwot Rubanga me Isirael kalamo abakai me Isirael ace apat dedede kame en elubo.

³⁴I kare kame Akab oudo tie pug kede, Kiel me Betel oko medo gero Jeriko. Bala kame Rwot oudo waco ki dog Yosua wot ka Nun, i kare kame Kiel ocibo kede acakini me apama me Jeriko, wode kao Abiram oko to pi manono, di wode atidi anyinge Segub da oko to kakame ecako gero kede erute me Jeriko.