Read kumam 1 Abakai 17 Bible Online

1 Abakai 17 - kumam bible

1 Abakai 17

¹Enabi anyinge Elia dano me Tisibe i lobo me Gilead oko waco ne Akab be, “Akwongo i nying Rwot Rubanga akuo me Isirael ngat kame ango atio ne be, kot amoto toyo likame bino bedo tie i mwakini nogi, tuno di ango awaco be kibed tie.”

²Di Rwot oko waco ne Elia be,

³“Yai ki kan di iko ot pwono i bad tetu kide i nget Osamai me Kerit, i bad tetu kide me ecilet me Yorodan.

⁴In ibino mato pii ki osamai nono, doko da ango atieko mino agak cik pi kelo nin cam kunono.”

⁵Elia oko ot bala kame Rwot owaco ne; en eoto di eko donyo bedo i nget Osamai me Kerit, i bad tetu kide me ecilet me Yorodan.

⁶Agak oko donyo tero ne mugati kede ringo odiko kede otieno me ceng acelacel, di emato pii ki osamai nono.

⁷Do ingei kare moro acecek osamai nono oko tuo pien kot oudo oweko cwei.

⁸Di Rwot oko waco ne Elia be,

⁹“Nan oti Sarepat i nget Sidon iko donyo bedo kuno, pien ango atieko mino apuserut moro me kunono cik pi donyo piti.”

¹⁰Elia oko yai di eko ot Sarepat. Kakame etuno kede i erute me bomba, apuserut moro oudo tie kunono coko rido me yen; en eko waco ne dako nono be, “Okwe mia pii moro amati.”

¹¹Kakame dako nono oudo tie ot kede omo ne pii, en doko eko lwonge di eko waco ne be, “Okwe kel na kede mugati moro da.”

¹²Apuserut nono oko dwoko ne be, “Alairo i nying Rwot Rubanga ni akuo be, likame ango atie kede mugati moro. Ango atie kede alos aromo pongo cinga acel kenekene i awalo, kede mo moro atitidi me olibeti i cupa. Ango nan atie coko rido mogo ki kan tetekeny aoti atede pira kede pi woda. Manono bino bedo cam wa me ajikini di do oko daro to kec.”

¹³Elia oko waco ne be, “Kur ibed kede lworo; in oti itim bala kame iwaco, do ber kong ted nango mugati moro atitidi kiye iko kelo na, di ingei manono iko tedo ace piri kede pi wodi.

¹⁴Pien Rwot Rubanga me Isirael owaco be, ‘Likame ibino lungaro awalo me alos, arabo lungaro cupa me mo di pwodi ceng kame ango Rwot abino cwano kede kot i wi lobo likame otuno.’ ”

¹⁵Apuserut nono oko ot timo gikame Elia owaco ne, di do en kede wode kede Elia kiko bedo kede cam aromo gi pi ceng atot.

¹⁶Bala kame oudo Rwot omio kede cikere mere i dog Elia, likame alos oko tiek i awalo mere, akadi mo tiek i cupa mere.

¹⁷I cen mere tuwo oko mako wot ka dako nono, en won ot, di tuwo nono oko cere tuno neke.

¹⁸Di dako nono oko waco ne Elia be, “Dano ka Rubanga, pinyo komio itimo na kaman? In ibino kan pi pono wi Rubanga i kom dub na, kede pi kelo ne woda to.”

¹⁹Elia oko waco ne be, “Kel awobi nono buta.” En eko gamo awobi nono ki kor toto mere di eko tere i agola me malo kakame en oudo ebuto iye di eko piele i apien kame en oudo ebuto iye.

²⁰Elia oko lego but Rwot kede dwan amalo be, “Okwe Rwot Rubanga na, pinyo komio ikelo can arom kan i kom apuserut noni? En ebedo gwoka di doko nan in iko neko wode!”

²¹Di Elia oko riebere i kom atin nono tien adek, di elego kede dwan amalo but Rwot be, “Okwe Rwot Rubanga na, dwok ne atin noni kuo mere bobo.”

²²Rwot oko winyo dwan Elia; kuo me atin nono oko bobo dwogo di eko bedo kuo.

²³Elia oko kwanyo atin nono ki agola me malo di eko kele i ot me piny di eko mine i cing toto mere di ewaco ne be, “Neningo, wodi ine kuo.”

²⁴Dako nono oko dwoko ne be, “Nan atieko ngeno be in ibedo dano ka Rubanga, doko da kop kame Rwot waco i dogi obedo kop me ateni.”