Read kumam 1 Abakai 21 Bible Online

1 Abakai 21 - kumam bible

1 Abakai 21

¹Nabot oudo tie kede poto olok mere Jeserel i nget paco me abaka, kakame Abaka Akab oudo bedo iye.

²Ceng moro acel Akab oko waco ne Nabot be, “Miango poto ni me olok, ango amito mine ebed poto me puro dek; en etie i nget oda. Ango abino mini poto me olok aber kalamo en kawange, aso ka li abino culi sente iye.”

³Do Nabot oko dwoko ne Akab be, “Rwot dagi be ango amii lobo kame audo kibut joakwari na.”

⁴Akab oko dok paco di cunye owang kede di ening pi gikame Nabot dano me Jeserel owaco ne. En eko ot buto i apien mere di eloko nyime tetu apama, di eko dagi kiton cam da.

⁵Dako mere Jesebel oko ot bute di oko penye be, “Nyo komio tin iling alinga kamano, doko di idagi kiton cam da?”

⁶En eko dwoko be, “Pien ango oudo awaco ne Nabot be, ‘Miango awil poto ni me olok, aso ka li ango abino mini poto ace me olok kawange ka in imito kamanono’; do en eko dwoko be, ‘Ango likame abino mini poto na me olok.’ ”

⁷Dako mere Jesebel oko penye be, “Mam in en ipugo Isirael? Aso, yai malo iko cam, doko da bed kede yomcuny; ango abino mini poto ka Nabot.”

⁸Aso, Jesebel oko wandiko baluwan kede nying Akab di eko dongo iye tikum ka Akab di eko cwacwao baluwan nogo but joadongo kede jo kame koworo koudo bedo kede Nabot i bomba.

⁹Baluwan nogo oudo waco be, “Cikunu ceng me kanyo kec di ikounu lwongo jo karacel, di ikounu mino Nabot kabedo me anyim.

¹⁰Mounu jo are atie kede ikiteso areco ikounu mino gi kibed anyim di kipimere kede en, di jo nogo ko pide be, ‘In ilamo Rubanga kede abaka.’ Di do wun ikounu tere tenge ikounu didipo en kede kide tuno to.”

¹¹Jo me bomba mere, joadongo kede jo kame koworo oko timo bala kame Jesebel owaco. Bala kame oudo tie kede i baluwa kame en ecwao negi,

¹²gin kilwongo ceng me kanyo kec di kiko mino Nabot obedo anyim me jo kocokere.

¹³Jo are kame ikiteso gi reco oko ot bedo i nyime di kipimaun kede en, di kiko pido Nabot i nyim jo di kiwaco be, “Nabot olamo Rubanga kede abaka.” Aso, jo oko make otere ooko me bomba di kiko didipo en kede kide tuno to.

¹⁴Di do oko cwano ne Jesebel kop be, “Kodidipo Nabot kede kide; etieko to.”

¹⁵Cucuto kakame Jesebel owinyo kede be oudo kotieko didipo Nabot paka to, en eko waco ne Akab be, “Nan in ot do igam poto ka Nabot kame en oudo edagi cato ni, piento en etieko to.”

¹⁶Cucuto di Akab owinyo be Nabot oudo otieko to, en eko yai eko ot piny i poto me olok ka Nabot pi game doko mere.

¹⁷Di Rwot oko waco ne Elia enabi me Tisibe be,

¹⁸“Ot piny i poto me olok ka Nabot but Abaka Akab me Samaria; nataman en etie kunono emito tero poto nono doko mere.

¹⁹Oti iwace be ango Rwot atie waco be, ‘Mam itieko neke di bobo iko mito tero poto mere da?’ Wace be ango awaco be, ‘Kakame igwogin onango kiye remo ka Nabot kikokome en kame kibino nango kiye remo nida.’ ”

²⁰Kakame Akab oneno kede Elia, en eko waco ne Elia be, “Ngakwor na mam tin iuda?” Elia oko dwoko be, “Ebo, ango audi. Pi kite kame in itieko miire kede atwal atwala timo gikame rac i nyim Rwot,

²¹omio Rwot nan waco ni be, ‘Ango abino kelo can i komi. Abino rwenyo kuo ni kede me cuo dedede me diakal ni, kobedo ipasoi kede kalikame ipasoi.

²²Abino mino diakal ni doko bala diakal ka Yeroboam wot ka Nebat, kede bala diakal ka Basa wot ka Akija, pien in iwango cunya i yore me telo Isirael timo dub.’

²³Doko da i kom Jesebel Rwot tie waco be, ‘Igwogin bino camo kom Jesebel i bomba me Jeserel.’

²⁴Dano ni moro kame bino to i bomba igwogin en kame bino came; kede dano ni moro kame bino to i calo winy en kame bino came.”

²⁵(Ateteni likame oudo tie dano moro ace kotieko miire atwal atwala timo gikame rac i nyim Rwot bala Akab, ngat kame bin dako mere Jesebel oruruko en.

²⁶En etimo tim me emuna me donyo woro caljwogi, bala bin jo Amor kame Rwot oriamo ki lobo nono i kare kame jo me Isirael oudo tie donyo kede iye.)

²⁷Kakame Akab owinyo kede kope nogi, en eko nyinyilo igoen ki kome di eko ngapo epuko. En eko kanyo kec di eko donyo buto i epuko nono, di eoto di ening aninga.

²⁸Di Rwot oko waco ne Elia be,

²⁹“Mam ineno ekite kame Akab omwolere kede i nyima? Pi kite kame emwolere kede i nyima, likame ango abino kelo can i kome i kare mere, do abino kelo can i ode i kare ka wode.”