Read kumam 1 Abakai 9 Bible Online

1 Abakai 9 - kumam bible

1 Abakai 9

¹Di do bin Sulumani otieko gero ot ka Rwot kede paco me abaka di eko cobo timo gi dedede kame oudo eiko,

²Rwot bobo oko neeno bute me tien me are, bala kame oudo etimo kede i Gibeon.

³Rwot oko waco ne be, “Ango atieko winyo ilega kede ingangai ni kame ikelo buta; ango atieko lonyo ot kame in igero noni di ako mine edoko mera atwal; ango abino gwoke, doko cunya bino bedo tie iye pi kare lung.

⁴Aso, ka in ibino timo tic na kede genere kede kuo kopoore, bala kame Daudi papa ni bin otimo, di itimo gi dedede kame ango aciko ni, di ilubo pwony kede iswilia na,

⁵ango abino sipakino ajakanut ni i Isirael, bala kame bin ango acikere kede but papa ni Daudi di awaco ne be, ‘Likame in ibino bedo abongo ngat kame lunyo wangi bala abaka me Isirael.’

⁶Do ka in iko lokere tenge di iko weko luba, in arabo idwe ni, di likame ikounu gwoko cik kede iswilia na kame ango atieko mino wu, do di ikounu donyo timo tic ne rubangan apat di iworunu gi,

⁷ango abino kwanyo jo me Isirael tenge ki lobo kame ango atieko mino gi. Ot kame ango atieko lonyo pi bedo mera no da abino weko atatai; di jo me Isirael ko bino doko jo me anyera kede kame kocao i diere me atekerin dedede.

⁸Ot noni bino doko atukit me ameje; jo dedede kame beo i ngete bino uro twatwal di kijwire. Gin kibino waco be, ‘Pinyo bo komio Rwot otimo gikame cal kamanono ne lobo noni kede ot noni?’

⁹Di do gin kiko bino waco be, ‘Pien gin kiweko Rwot Rubanga gi, ngat kame bin okwanyo joakwari gi ki lobo me Misiri, di gin kiko dak but rubangan mogo icegun, di kiko donyo woro gi, doko di kitimo negi tic. Pi manono, Rwot otieko kelo can noni i kom gi.’ ”

¹⁰Gero ot ka Rwot kede me ka abaka bin otero ne Sulumani mwakini ot are.

¹¹Abaka Kiram me Taya en kame bin obedo cwano ne Sulumani ibaon me seda kede saipuras karacel kede saabu dedede kame cunye oudo mito me tic. Abaka Sulumani bin oko mino Kiram bomban ot are i lobo me Galilaya.

¹²Do kakame Kiram oko yai kede ki Taya pi bino neno bomban kame Sulumani oudo omie, gin likame kiko yomo cunye.

¹³Pi manono, en eko penyo Sulumani be, “Bomban kame cal kamege inogonogi kame in imia, Okwe omina?” Manono oko mino bin oko lwongo bomban nogo be Kabul[7] tuno tin.

¹⁴Do Kiram oudo ocwao ne Abaka Sulumani kilo me saabu kame buco romo tutumia kany (5,000).

¹⁵Abaka Sulumani bin otio kede jo kame bin kodio i tic tetek, pi gero ot ka Rwot kede paco mere amake, toro nget bomba i bad tetu kide, kede pi gero apama me bomba. En bin etio kede jo nogo da pi gero bomban me Kasor, Megido, kede Geser.

¹⁶(Parao abaka me Misiri oudo bin osuro bomba me Geser di eko mane eko wange dopodop. En bin eko neko da jo Kanan kame bin bedo i bomba nono, di eko mino bomba nono bala giamia me nyom but nyare kobedo dako ka Sulumani.

¹⁷Aso, Sulumani bin oko medo gero Geser.) En bin etio kede jo kame omako timo tic tetek nogo da pi medo gero Bet Koron Apiny,

¹⁸Balat, Tamar kame bin tie i wi tim me Yuda i lobo nono

¹⁹kede bomban dedede kame oudo en egwoko iye jame, bomban kame bin kogwoko iye cabalan mege, bomban kame jo aringo kede asigiran bin bedo iye. Sulumani bin oko cobo iik mere me gedo i Yerusalem, Lebanon, kede i lobere dedede kame en oudo epugo.

²⁰Jo kame Sulumani bin obedo mako tetek pi timo tice mege me gedo gin en jo kame bin jo me Isirael likame oko neko kikom jo Amor, jo Kiti, jo Perisi, jo Kibi, kede jo Yebu. Tuno tin pwodi ikwae gin tie ipasoi kamanono.

²²Do Sulumani bin likame omio dano moro me Isirael obedo epasoit; gin bin kibedo isirikalen, jodongo me tice mege, jotel me isirikalen mege, jotel me cabalan me yi kede jo kame ringo kede asigiran mege.

²³Jodongo kame bin lo tice me gedo ka Sulumani oudo tie tol kany kede ot kany (550), gin en nyampalan kame bin pugo jotic.

²⁴Sulumani bin otoro nget bomba i bad tetu kide, ingei dako mere nyar ka Parao yai ki Bomba ka Daudi eko ot i ode kame Sulumani oudo ogero ne.

²⁵Sulumani bin oko bedo mino giayala but Rwot tien adek i mwaka acel. En oudo emio giayala awanga kede giayala me nywak i wi alutari kame en bin egero ne Rwot. En bin ewango da odok angwe kur but Rwot. Manono en ekite kame en bin eko tieko kede tic me gero ot ka Rwot.

²⁶Abaka Sulumani bin oko cweno imerin atot atota Esion Geber, kame bin tie i nget Elot i dog Nam Akwar, i lobo me Edom.

²⁷Kiram bin oko cwano jotic mege kame oudo ipirana i kwang, pi ot timo tic i imerin nogo karacel kede jotic ka Sulumani.

²⁸Gin bin kiko ot i lobo me Opir, di gin kiko kelo ki kunono saabu kame buco romo kilo tutumia tomon kiwie kanyape (16,000), kame gin kiko mino Sulumani.