Read kumam 2 Abakai 10 Bible Online

2 Abakai 10 - kumam bible

2 Abakai 10

¹Akab oudo tie kede awobe ot kanyaare Samaria. Aso, Yeku oko wandiko baluwan di eko cwano gi but jotel me bomba, but joadongo, kede but jo kame oudo gwoko awobe ka Akab di ewaco negi be,

²“Ango angeo be ikwae ka Abaka Akab tie bedo kano kede wun. Doko da bomba wun kocelo kede apama atek di kodare kede jamini me yi kede asigiran kede cabalan.

³Aso, nan yerunu wot ka Akab moro katwero tic kiber di ikounu kete eluny wang papa mere bala abaka, di do wun ikounu yi pi gwoke.”

⁴Do jopug me Samaria oko doko lwor di kiwaco be, “Nenunu, abakai are likame otwero yi kede en, do wan obinunu twero benyo benyo?”

⁵Aso, ngadwong kame lo paco ka abaka kede ngadwong kame lo bomba, karacel kede joadongo kede jo koudo daro idwe ka Akab oko cwano ne Yeku kop be, “Wan obedo jotic nin, wan obino timo gi dedede kame in iwaco ne wa. Wan likame obino cibo ngatamoro doko abaka; in tim gikame in ingeo be ber.”

⁶Di Yeku oko wandiko baluwa me are but gi be, “Ka wun iganganu, doko da di itiekunu iikere pi lubo kop na, kelunu wi awobe ka Akab buta Jeserel diki tetu esawa noni.” Awobe ot kanyaare ka Akab nogo oudo tie i cing jotel me Samaria, en jo kame oudo gwoko gi.

⁷Kakame baluwa nono otuno kede but gi, gin kiko lwongo awobe ka Akab ot kanyaare di kiko neneko gi. Gin kiko keto wi gi i yi ibukito di kiko cwano ne Yeku Jeserel.

⁸Kakame aor ooto di eko waco ne kede Yeku be oudo kokelo wi awobe ka Akab, en eko waco be kumemo gi i atukito are i erute me bomba tuno odiko.

⁹Odiko di piny oru, Yeku oko ot i erute eko cungo kunono di eko waco ne jo koudo tie kunono be, “Ango en kame atimo iik me neko Abaka Yoram, wun iliunu kede kop moro. Do alu koneko jogi dedede?

¹⁰Man nyuto be gi dedede kame Rwot owaco i kom ikwae ka Akab bino cobere. Rwot otimo gikame en ekwongere iye i dog ngatic mere Elia.”

¹¹Di Yeku oko neneko wade ka Akab ace apat koudo tie i bomba me Jeserel, kede jotic mege adongo dedede, kede adiereson mege, kede josaseredoti; likame moro kikom gi oko dong kuo.

¹²Yeku oko yai ki Jeserel pi ot Samaria. Kakame oudo etie kede i yongayo, en eko riamo kede wade ka Abaka Akasia i kabedo kame kolwongo be “Kimere me Jokwat”, di eko penyo gi be, “Wun alu?” Gin kiko dwoko ne be, “Wan obedo wade ka Akasia, wan obino pi neno jo me ture.”

¹⁴Yeku oko waco ne isirikalen mege be, “Makunu gi akuo!” Gin kiko mamako gi di kiko ngongolo gi i bur kame oudo tie kanono; gin dedede jo ot ongwon kiwie are, likame tie moro oko bwot.

¹⁵Yeku oko bobo yai ki kuno di eko riamo kede Yekonadab wot ka Rekab di oudo etie bino bute. Yeku oko mote di eko penye be, “Cunyi tie i koma bala kame ada mera tie kede i komi?” Yekonadab oko dwoko be, “Twatwal.” Yeku oko waco be, “Aso cwai cingi kan.” Yekonadab oko cwano cinge di Yeku oko mako cinge di eko konye yito i cabala.

¹⁶En ewaco ne Yekonadab be, “Upere keda iko bino neno epone kame ango aketo kede cunya i kom Rwot.” Di do gin kiko ringo kede cabala karacel ot Samaria.

¹⁷Kakame kituno kede kunono, Yeku oko neneko wade ka Akab dedede, likame acel moro oko dong; manoni oudo obedo gikame Rwot owaco ne Elia be bino timere.

¹⁸Di Yeku oko coko jo dedede karacel di eko waco negi be, “Abaka Akab oudo obedo woro Baal i yore atitidi, do ango abino wore i yore akalamo manono.

¹⁹Aso nan lwongunu na inabin ka Baal dedede, jo dedede kame wore kede josaseredoti mege dedede; likame ngatamoro poore keng pien ango atie mino Baal giayala me aura. Ngat kalikame oyaro bino kobino neke.” (Manoni oudo obedo rieko ka Yeku me mito neneko jo kame woro Baal.)

²⁰Yeku oko mino cik be, “Cikunu ceng me woro Baal.” Di oko ciko ceng,

²¹di Yeku oko cwano kop i lobo me Isirael dedede. Jo dedede kame oudo woro Baal oko bino bekebek, likame tie moro oko dong. Gin kiko donyo i tempulo ka Baal, di tempulo nono oko pong culucul.

²²Di Yeku oko waco ne ngasaseredoti kame oudo daro sanduku me igoen pi kwanyo ikanson di eko mino jo kame woro Baal. Aso en eko tero negi igoen.

²³Di Yeku oko donyo i tempulo ka Baal kede Yekonadab wot ka Rekab; en eko waco ne jo aworo Baal be, “Ngingicunu ikounu neno be likame tie dano moro aworo Rwot kan i diere wu, kwanyo kenekene jo kame woro Baal.”

²⁴Di do en kede Yekonadab kiko cako tic me mino Baal giamia kede giayala awanga. Yeku oudo otieko cibo cuo ot kanyauni ooko me tempulo di eciko gi be, “Poore inekunu jogo dedede, ngat kame bino weko dano moro bwot ebino kei kuo mere.”

²⁵Cucuto di en etieko mino giayala awanga, Yeku oko waco ne jodar kede isirikalen be, “Bianu inekunu gi, kur iwekunu moro bwoti.” Aso gin kiko neko jo dedede, di iko donyo ware kede kom gi ooko. Gin kiko dok i tempulo kiko donyo i agola atek me yie

²⁶di kiko kelo cal ka Baal di kiko wange.

²⁷Aso, bin gin kiko nyinyito cal ka Baal di iko rereto tempulo mere di kiko loke edoko coloni tuno tin.

²⁸Manoni en epone kame Yeku ojiko kede woro Baal i Isirael.

²⁹Do eda likame eko jiko dub kame Yeroboam oudo ocako, me mino jo me Isirael woro cal me roce kame oudo kosipo Betel kede Dan.

³⁰Rwot oko waco ne Yeku be, “In itimo gikame tie kakare i yore me muducaro jo me ot ka Akab dedede bala kame oudo cunyango mito. Pi manono, ango acikere be ikwae nin, paka tuno i ikwae me ongwon bino bedo abakai i Isirael.”

³¹Do likame Yeku oko gwokere lubo iswilia ka Rwot Rubanga me Isirael kede cunye dedede; eda elubo dub kame Yeroboam oudo otimo, dub kame emio jo me Isirael otimo.

³²I kare nono, Rwot oko cako ngwero lobo me Isirael. Abaka Kasael me Siria oko mano lobo me Isirael dedede

³³atie i bad tetu kide me Yorodan dok i bad tetu piny tuno i bomba me Aroer i ecilet me Arunon; manoni riribo adul me Gilead kede Basan, kakame jo me ekeko ka Ruben, Gad kede dul me jo me ekeko ka Manase oudo bedo iye.

³⁴Gi dedede ace apat kame Yeku otimo, kede tice anyuto twer mere kowandiko gi i Itabu me Itatam amako Abakai me Isirael.

³⁵Yeku oko to di oko yike Samaria, di wode Yekoyakas oko lunyo wange bala abaka.

³⁶Yeku oudo opugo Isirael di ebedo Samaria pi mwakini ot are kiwie kanyauni.