Read kumam 2 Abakai 12 Bible Online

2 Abakai 12 - kumam bible

2 Abakai 12

¹I mwaka me kanyaare me apugan ka Abaka Yeku bala abaka me Isirael, Yowasi oko doko abaka me Yuda di eko pug di ebedo Yerusalem pi mwakini ot ongwon. Toto mere oudo obedo Sibia, en dako me bomba me Beereseba.

²Yowasi oko bedo timo gikame ber i nyim Rwot i kare me kuo mere dedede, pien Yekoyada ngasaseredoti oudo ocore.

³Do akadi bed kamanono da, Yowasi likame oko rereto abilan me woro rubangan; jo oko meede mino giamia kede giayala i abilan nogo.

⁴Yowasi oko waco ne josaseredoti pi coko sente kame jo oudo culo i tempulo amakere kede giayala kede giamia ace kame dano kwanyo i mit mere kene.

⁵Ngasaseredoti acelacel oudo poore coko sente kibut jo mege kame en elo, di do sente nogo oko bino tic kede gi me iiko tempulo, ka emito aika.

⁶Do paka tuno i mwaka me ot are kiwie adek me apugan ka Yowasi, josaseredoti oudo pwodi likame oiko tempulo.

⁷Aso, Abaka Yowasi oko lwongo ngasaseredoti Yekoyada kede josaseredoti ace apat di eko penyo gi be, “Pinyo komio wun likame itienu iiko ot ka Rwot? Cako nan wun likame bobo ibinunu mako sente kame jo culo, do poore kel gi me iiko tempulo.”

⁸Josaseredoti oko yei be gin doko likame kibino donyo gamo sente kibut jo, kede da be gin do likame kibino iiko tempulo.

⁹Di Yekoyada oko kwanyo sanduku, eko tuco karamoro atitidi i wie, di eko keto sanduku nono i nget alutari, i bad tetu cam kame dano tie donyo i tempulo. Ngasaseredoti koudo tie i wang tic oudo poore tero i sanduku nono sente dedede kame jo ooto i tempulo otero.

¹⁰Tek kame sente oudo odoko tot i sanduku, kalani ka abaka kede Ngatel me Josaseredoti oudo kioto maro sente nogo di kiko twetweo gi i isaun.

¹¹Di do ingei maro wel gi, gin kiko mino gi but jo kame tic gi makere kede gwoko tempulo, di jo nogo ko culo kede jogedo kame poore iiko tempulo, jo atimo tic me ibaon,

¹²jo agero apama kede jo apao kide; kede da kitio kede gi me wilo ibaon kede kide kame kotio kede gi me iiko tempulo, kede me culo garama dedede amakere kede iiko ot nono.

¹³Do likame tie sente moro kame oudo kotio kede me wilo kalayan kame kotimo kede siliba, jamini me temuno italan, bakulin, agwarai, arabo jamini ace apat kame kotimo kede saabu arabo siliba, gin jamini kame kopoore tic kede gi i tempulo.

¹⁴Sente dedede oudo kotio kede me culo jogedo kede me wilo jamini me gedo.

¹⁵Jo kame oudo lo tic oudo genere twatwal, omio oudo likame emitere pi penyo gi nyuto epone kame kitio kede sente.

¹⁶Sente koudo wok ki giamia me timo cul kede ki giamia me kwanyo dub oudo likame koketo i sanduku nono, magonogo oudo josaseredoti en katero.

¹⁷I kare nono Abaka Kasael me Siria oko suro bomba me Gat di eko mane, di do eko lokere ot pi ot suro Yerusalem.

¹⁸Abaka Yowasi me Yuda oko kwanyo giamia dedede kame Yekosapat, Yekoram, kede Akasia oudo omio but Rwot, gin abakai me Yuda kobedo joakwari mege. Ekwanyo giamia gin di eko ribo kede mege da di eko cwano gi ne Abaka Kasael, di Kasael oko do weko tam me mito suro Yerusalem. Giamia nogo ribo saabu dedede kame oudo tie i dero me kano lim me tempulo, kede koudo tie i ot me abaka.

¹⁹Gi dedede ace kame Abaka Yowasi otimo kowandiko gi i Itabu me Itatam amako Abakai me Yuda.

²⁰I kare mere me ajikini, jotic mege are oko bedo kede iik arac i kome. Magonogo oudo obedo Yosakar wot ka Simeat kede Yekosabab wot ka Somer. Gin bin kiko neko Yowasi i Millo, i yongayo aoto Silla. Bin oko yiko Yowasi Yerusalem i nget joakwari mege; di wode Amasia oko lunyo wange bala abaka.