Read kumam 2 Abakai 13 Bible Online

2 Abakai 13 - kumam bible

2 Abakai 13

¹I mwaka me ot are kiwie adek me apugan ka Abaka Yowasi wot ka Akasia me Yuda, Yekoyakas wot ka Yeku oko cako pugo Isirael di ebedo Samaria. En eko pug pi mwakini tomon kiwie kanyaare.

²En bin eko timo dub i nyim Rwot bala bin Yeroboam wot ka Nebat, di eko mino jo me Isirael otimo dub. En likame eko weko tim areco nogo.

³Aso, cuny Rwot oko wang ne Isirael di eko ruruco jalo jo me Isirael i cing Abaka Kasael me Siria kede i cing wode Benekadad.

⁴Do Yekoyakas oko kwano Rwot di Rwot oko winyo kwac mere, piento en oudo eneno epone karac kame abaka me Siria oudo tie tero kede jo me Isirael.

⁵Pi manono, Rwot oko mino jo me Isirael ngat kame lako gi tetekeny kibwot ki cing jo me Siria; aso, jo me Isirael oko bedo kede anapakin bala bin sek.

⁶Bed bala kamanono da, do jo me Isirael likame oko weko dub kame Abaka Yeroboam oudo omio gi kidonyo iye, do gin kimeede ameda iye kamanono; doko da epir kame oudo kosipo akaka rubanga Asera oko dong cungo Samaria.

⁷Yekoyakas oko dong kede isirikalen aribo jo ot kany aringo kede asigiran, cabalan tomon kede isirikalen me tien tutumia tomon (10,000) kenekene; pien abaka me Siria oudo omuducaro gi di eko pudao gi bala asinge kame kodudupo i diakal me canyo.

⁸Gi ace dedede kame Yekoyakas otimo, ribo kiton teko mere me yi kowandiko gi i Itabu me Itatam amako Abakai me Isirael.

⁹Aso, Yekoyakas bin oko to di oko yike Samaria, di wode Yekoyasi oko lunyo wange bala abaka.

¹⁰I mwaka me ot adek kiwie kanyaare me apugan ka Yowasi bala abaka me Yuda, Yekoyasi wot ka Yekoyakas oko cako pugo Isirael di ebedo Samaria; en bin eko pug pi mwakini tomon kiwie kanyape.

¹¹Eda bin eko timo gikame rac i nyim Rwot; likame eweko tim ka Yeroboam wot ka Nebat kame bin emio jo me Isirael odonyo kede i dub.

¹²Gi dedede ace kame Abaka Yekoyasi otimo, ribo kiton teko mere i kare kame eyi kede Abaka Amasia me Yuda kowandiko gi i Itabu me Itatam amako Abakai me Isirael.

¹³Yekoyasi oko to di oko yike Samaria i nget abakai ace me Isirael, di wode Yeroboam me are en oko lunyo wange bala abaka.

¹⁴Tuwo atek oko mako enabi Elisa. I kare kame oudo etie kede i apien etie kuro to, Abaka Yekoyasi me Isirael oko ot pi nene, di Yekoyasi oko donyo koko i nyime di ewaco be, “Papa na, papa na! In lem ical bala cabalan kede isirikalen aringo kede asigiran agwoko Isirael.”

¹⁵Elisa oko waco ne be, “Kwany imalia ni kede gi me gweno gi.” Aso, Yekoyasi oko kwanyo imalia kede gi me gweno gi.

¹⁶Elisa oko waco ne Yekoyasi pi telo tol me emal pi gwene, di en eko timo kamanono, di Elisa oko keto cinge i wi me ka Yekoyasi.

¹⁷Elisa oko waco ne be, “Aso yab dirisa me bad tetu kide”; en eko yabo. Elisa oko waco be, “Aso, gwei emal”; en eko gweno. Elisa oko waco be, “In en emal ka Rwot kame ebino bwono kede jo me Siria. In ibino yi kede jo me Siria i Apek di iko bino bwono gi.”

¹⁸Di Elisa oko meede be, “Kwany imalia”; en eko kwanyo gi. Di eko waco ne abaka me Isirael be, “Gwegweo gi piny i lobo”; en eko gwegweo gi ecobo piny tien adek di eko weko.

¹⁹Manono oko wango cuny Elisa di eko waco ne be, “Oudo ipoore cocobo piny tien kany amoto tien kanyape; manono koto oudo omio ibwono Siria atwal atwala, do nan ibino bwono gi tien adek kenekene.”

²⁰Aso, Elisa oko to di oko yike. I kare nono ekodet me joyak me Moab oudo maro ot suro lobo me Isirael.

²¹Ceng acel di oudo kotie yiko icuo moro koudo oto, jo oko neno ekodet moro me joyak nogo, di kiko uco kom icuo nono i ates ka Elisa di kiko ringo tenge. Cucuto di kom icuo nono oriamo kede cogere ka Elisa, icuo nono oko yaruno di eko cungo malo.

²²Abaka Kasael me Siria oudo obedo tero jo me Isirael kirac i kare me apugan ka Yekoyakas.

²³Do Rwot oudo oko bedo kede kisa i kom gi di eko konyo gi pi isikan mere kame oudo etimo kede Aburaam, Isaka kede Yakobo, di likame eko weko komuducaro gi. En likame pwodi eweko gi akadi tuno tin.

²⁴Abaka Kasael me Siria oko to di wode Benekadad oko lunyo wange bala abaka.

²⁵Di Abaka Yekoyasi me Isirael oko bwono Benekadad tien adek di eko mano bomban kame Benekadad oudo omao i kare me apugan ka Yekoyakas, papa me Yekoyasi.