Read kumam 2 Abakai 16 Bible Online

2 Abakai 16 - kumam bible

2 Abakai 16

¹I mwaka me tomon kiwie kanyaare me apugan ka Peka wot ka Remalia bala abaka me Isirael, Akas wot ka Yotam bin oko doko abaka me Yuda.

²Mwakini me dongo ka Akas bin tie ot are i kare kame ecako kede pug. En bin eko pug i Yerusalem pi mwakini tomon kiwie kanyape. En likame eko bedo timo gikame poore i nyim Rwot Rubanga mere, bala kame bin kwaru mere Daudi obedo timo,

³do en eko lubo timo gikame abakai me Isirael obedo timo. En bin emio kiton wode kikokome bala giayala awanga but caljwogi, di elubo tim me kwer arac me jo kame bin Rwot oriamo tenge i lobo nono i kare kame bin jo me Isirael donyo kede iye.

⁴Abaka Akas bin obedo mino giayala angola kede giayala me odok angwe kur i kabedere me woro caljwogi, i wi mori, kede i dud yen oduko dedede.

⁵Abaka Resin me Siria kede Abaka Peka me Isirael bin oko ot suro Yerusalem; gin bin kiko luke do likame kiko twero bwono Akas.

⁶I kare nono bin abaka me Edom oko dwoko bomba me Elat i cing jo Edom, di eko riamo tenge jo me Yuda kame bin bedo kunono. Jo Edom oko bino Elat di kiko donyo bedo iye tuno tin.

⁷Akas bin oko ooro jo but Abaka Tigilat Pileser me Asiria di ewaco ne be, “Ango atie ngatic ni doko ango wodi. Bia ilaka ki cing abaka me Siria kede ki cing abaka me Isirael, jo kame tie sura.”

⁸Akas oko kwanyo da siliba kede saabu kame oudo tie i ot ka Rwot kede i kabedo kame bin kokano iye jamini i ot me abaka, di eko cwano ne abaka me Asiria bala giamia.

⁹Abaka me Asiria bin oko winyo kop mere, di eko yai ot suro Damasiko, eko mane di eko neko Abaka Resin, doko eko mako jo mege etero gi Kir bala mabus.

¹⁰Kakame bin Abaka Akas oko ot kede Damasiko pi riamo kede Abaka Tigilat Pileser me Asiria, en eko neno alutari kame oudo tie Damasiko. Abaka Akas oko cwano ne ngasaseredoti Uria cal me alutari nono, kede kite kame oudo otime kede i yore i yore.

¹¹Uria oko gero alutari nono i cal kame Abaka Akas oudo ocwao ki Damasiko. En egere paka tieke di pwodi Akas likame odwogo ki Damasiko.

¹²Kakame bin abaka odwogo kede ki Damasiko, en eko neno alutari nono, di eko ot iye,

¹³en eko mino giayala awanga mere kede giayala me alos, kede eko onyo giayala amata, di eko kikiro remo me giayala mere me nywak i kom alutari nono.

¹⁴Akas bin oko kwanyo ki nyim tempulo alutari me nyonyo buronsi kame oudo tie i nyim Rwot, ki kabedo kame oudo tie i dierediere me alutari meren kede tempulo, di en eko tere eoto kete i bad tetu malo me alutari meren.

¹⁵Di do en eko ciko ngasaseredoti Uria be, “Ibino tic kede alutari adwong noni me mino giayala awanga me odiko kede giayala me alos kame koyalo otieno, giayala me awanga ka abaka kede giayala mere me alos, karacel kede giayala awanga me jo dedede, giayala gi me alos kede me amata. Ibino kikiro i kome remo me giayala awanga dedede kede remo me giayala angola dedede; do alutari me nyonyo buronsi bino bedo mera me penyo kiye kop kibut Rwot.”

¹⁶Ngasaseredoti Uria bin oko timo gi dedede kame Abaka Akas ociko ne.

¹⁷Abaka Akas bin oko totongo purem me icegeren, di eko kwanyo kalayan gi tenge. En bin eko kwanyo da tenge epipa me pii kame oudo cungo i ngei twonin kame kotimo kede nyonyo buronsi, di eko kete i kom acakini kame obedo kidi.

¹⁸Di do pi yomo cuny abaka me Asiria, Akas bin oko kwanyo tenge eema kame oudo kogero i paco me abaka di otio kede i ceng Sabato, doko eko cego yongayo kame bin abaka donyo kede i ot ka Rwot.

¹⁹Gi dedede ace kame bin Abaka Akas otimo kowandiko gi i Itabu me Itatam amako Abakai me Yuda.

²⁰Akas bin oko to di oko yike i nget joakwari mege i Bomba ka Daudi; wode Esekia bin oko lunyo wange bala abaka.