Read kumam 2 Abakai 17 Bible Online

2 Abakai 17 - kumam bible

2 Abakai 17

¹I mwaka me tomon kiwie are me apugan ka Abaka Akas me Yuda, Kosea wot ka Ela bin oko doko abaka me Isirael, di eko pugo Isirael i Samaria pi mwakini kanyangon.

²En bin eko bedo timo gikarac i nyim Rwot, cite kalikame rom kede kame abakai me Isirael kogeo pug nen obedo timo.

³Abaka Salamaneser me Asiria bin oko bino yi kede Kosea. Kosea bin oko doko dano kame Salamaneser pugo, di en eko donyo culo esolo bute.

⁴Do abaka me Asiria bin oko udo be Kosea obedo dano kame kelo arubaruba; piento Kosea oudo ooro jo but Abaka So me Misiri pi bino konye kede abaka me Asiria, di eko jiko kwanyo esolo me buli mwaka but abaka me Asiria. Manono oko mino abaka me Asiria omake di oko twene i otkol.

⁵Di do abaka me Asiria bin oko suro lobo nono dedede di eko ot Samaria eko luke pi mwakini adek.

⁶I mwaka me kanyangon me apugan ka Kosea, abaka me Asiria bin oko mano Samaria, di eko tero jo me Isirael Asiria bala mabus. En bin eko keto mogo kikom gi i bomba me Kala, jo ace eketo i nget ecilet kame kolwongo be Kabor i adul me Gosan, kede mogo eko keto i bomban me Mede.

⁷Manoni bin otimere pien jo me Isirael oudo otimo dub but Rwot Rubanga gi, ngat kame bin okwanyo gi ki lobo me Misiri ki cing Parao abaka me Misiri. Gin bin kiko bedo woro rubangan apat

⁸di kiko donyo lubo itok me atekerin kame bin Rwot oriamo tenge ki nyim gin ki lobo nono kede itok kame bin abakai me Isirael okelo.

⁹Jo me Isirael bin oko timo gi kalikame poore but Rubanga gi. Gin kigero kabedere kame gin kiworo iye caljwogi i bomban gin dedede, cako ki bomban atitino tuno i bomban adongo kame kocelo kede apama atek.

¹⁰Gin kicibo ipirin me kide kede cal me rubanga Asera i wi imukuran dedede kede i dud yen koduko dedede, pi gin woro.

¹¹Di gin kiko mino giayala me odok angwe kur i kabedere me woro caljwogi nogo dedede, bala kame atekerin kame bin Rwot oriamo tenge ki nyim gin i lobo nono oudo timo. Gin bin kiko timo gikareco, di kiko wango cuny Rwot.

¹²Gin kibedo timo tic ne caljwogi, gikame Rwot bin ociko gi iye be kur kitimi.

¹³Rwot bin obedo kwenyaro jo me Isirael kede jo Yuda di emio enabi acelacel kede nganeno acelacel waco negi be, “Lokerenu tenge ki yote areco me kuo wu, di ikounu donyo gwoko cik kede pwony na kame tie i iswil kame bin ango amio joakwari wu, kede kame bin amio inabin jotic na okelo ne wu.”

¹⁴Do gin bin likame kiko lubo; gin oudo kibedo joepali bala bin joakwari gi, jo kame bin likame oyei kop ka Rwot Rubanga gi.

¹⁵Gin kiko dagi lubo pwony mere, kede isikan mere kame bin en etimo kede joakwari gi, doko gin likame kiko paro gimoro i kom ikwenyar kame en ebedo mino gi. Gin kibedo woro caljwogi gikame kony mere li di gida kikom gi kony gi oko doko li. Gin kibedo lubo ikiteso me atekerin kame bin oluko gi, jo kame bin Rwot ociko gi be kur kilub gikame gin kitimo.

¹⁶Gin kiweko lubo cik dedede ka Rwot Rubanga gi, di kiko teto cal are me roce pir gin ken gi. Gin kiko timo da cal me rubanga adako kame nyinge Asera, di gin kiko donyo woro gi dedede kame tie i malo, di kitimo tic ne rubanga Baal.

¹⁷Gin bin kimio idwe gi awobe kede anyira bala giayala awanga; gin oudo kipenyo yamere kede kilamo gagi; oudo kiketo cuny gi timo gikarac i nyim Rwot di kiko wango cunye.

¹⁸Pi mano, Rwot bin cunye oko wang kitek ne jo me Isirael di eko riamo gi tenge ki nyime; likame tie ngatamoro kame bin oko dong kwanyo kenekene jo me ekeko ka Yuda.

¹⁹Jo me ekeko ka Yuda da bin likame oko gwoko cik ka Rwot Rubanga gi, do kiko donyo lubo itok kame jo me Isirael okelo.

²⁰Rwot bin oko dagi ikwae dedede me Isirael; en eko mino gin alola di eko mino gi i cing joyak, tuno en tieko riamo gin dedede tenge ki nyime.

²¹Di do bin Rwot otieko poko jo me Isirael tenge kibut jo me Yuda, jo me Isirael bin oko keto Yeroboam wot ka Nebat obedo abaka gin. Yeroboam oko mino jo me Isirael oweko lubo Rwot di en eko mino gin kitimo dub adwong twatwal.

²²Jo me Isirael bin oko meede kede timo dub kame Yeroboam oudo obedo timo; gin likame kiweko timo gi

²³tuno Rwot riamo gin tenge ki nyime, bala kame oudo ewaco kede sek kibut inabin jotic mege. Aso, bin oko kwanyo jo me Isirael ki lobo gi amako gi di oko tero gi Asiria bala joring ayela, kakame kiko donyo bedo iye tuno tin.

²⁴Abaka me Asiria bin oko kelo jo ki bomban me Babilon, Kuta, Aba, Kamat, kede Separabaim, di en eko keto gi i bomban me Samaria kawang jo me Isirael; gin bin kiko gamo bomban nogo di kiko donyo bedo i yi gi.

²⁵I kare kame bin gin kicako bedo kede kunono, gin oudo likame kiworo Rwot; pi manono, Rwot bin oko cwano negi inguon di oko donyo neko gi.

²⁶Bin oko waco ne abaka me Asiria be jo kame oudo en eketo pi bedo i bomban me Samaria likame ngeo iswil me rubanga me lobo nono, pi mano, rubanga nono otieko cwano negi inguon kame oudo tie neneko gi.

²⁷Di do abaka me Asiria bin oko mino cik be miero dwok ngasaseredoti acel kunono, kikom josaseredoti kame bin kokwanyo ki kunono, tetekeny en edok bedo kunono di eko pwonyo jo iswil ka rubanga me lobo nono.

²⁸Aso, ngasaseredoti acel kikom kame gin oudo kitero ki Samaria oko bin dok di eko donyo bedo Betel; en eko donyo pwonyo gi epone kame poore kiwor kede Rwot.

²⁹Do ateker acelacel kame bin oko donyo bedo Samaria pwodi oko bedo timo rubangan gin amako gi di kiko keto gi i abilan me kabedere kame jo Samaria bin otimo me woro caljwogi, ateker acelacel otimo rubanga mere i bomba kame oudo gin kitie bedo iye;

³⁰jo me Babilon otimo cal me rubanga kame kolwongo be Sukot Benot, jo me Kut oko timo cal me rubanga Neregal, jo me Kamat otimo cal me rubanga Asima;

³¹jo me Iba otimo cal me rubanga Nibas kede Taratak; jo me Separabaim oko bedo wango idwe gi i mac bala giayala but rubanga Adaramelek kede Anamelek, rubangan me bomba me Separabaim.

³²Gin oudo da kiworo Rwot, doko da kiko yero jo me epone apapat kikom gin ken gi pi bedo josaseredoti me kabedere me woro caljwogi nogo, jo kame bin mio giayala angola gin i abilan me kabedere nogo.

³³Aso, gin bin kiko bedo woro Rwot, di doko kitimo tic ne rubangan gin amako gi, di kilubo ikiteso me atekerin me kabedere kame bin kokwanyo gi kiye.

³⁴Tuno tin gin pwodi kitimo itok gi me kare kasek nogo. Gin likame kiworo Rwot doko likame kilubo iswil arabo pwony amoto cik kame en bin emio ikwae ka Yakobo, ngat kame en bin eko cako ne nyinge be Isirael.

³⁵Rwot bin otimo kede gin isikan di eko ciko gi be, “Wun likame ibinunu woro rubangan apat arabo kudo wi wu piny but gi, akadi timo ne gin tic, amoto ngolo giayala but gi.

³⁶Wun ibinunu wora ango ngat kame bin akwanyo wu ki lobo me Misiri kede twer atek kede twon teko; wun ibinunu kudo wi wu piny buta, doko ibinunu mina giayala angola wu.

³⁷I kare dedede wun ibinunu gwokere di ikounu lubo pwony, iswil kede cik kame ango bin awandiko ne wu. Wun likame ibinunu woro rubangan apat,

³⁸doko wi wu kur wil kede isikan kame ango atieko timo kede wu. Wun likame ibinunu woro rubangan apat,

³⁹do ibinunu wora, ango Rwot Rubanga wu, di ango ako bino lako wu ki cing jokwor wu.”

⁴⁰Do gin bin kiko dagi winyo, di kiko meede kede lubo itok gin kasek nono.

⁴¹Aso, atekerin nogo bin oko bedo woro Rwot, do di doko kitimo tice ne caljwogi gi da; tuno tin ikwae gi pwodi meede timo kamanono.