Read kumam 2 Abakai 19 Bible Online

2 Abakai 19 - kumam bible

2 Abakai 19

¹Kakame Esekia owinyo kede kop kame gin kitero ne, en eko nyinyilo igoen me kome, eko um kede epuko pi iturur, di eko ot i ot ka Rwot.

²En eko ooro Eliakim, ngadwong me paco me abaka, kede Sebena kalani, kede josaseredoti adongo, but enabi Isaya wot ka Amos, gida oudo kitie ngapo ipukoi.

³Gin kiko waco ne Isaya be, “Esekia waco kaman: ceng atin obedo ceng me cwercuny, me cocoko wa, kede me mino wa lewic. Wan ocalunu bala mon kame esawa me nywal gi otuno, do kili kede teko me dinyo idwe.

⁴Cengemogo Rwot Rubanga ni owinyo kope dedede kame ngadwong me isirikalen me Asiria owaco, en ngat kame ngadwong mere abaka me Asiria ocwae pi bino nywaro Rubanga akuo. Akwao Rwot Rubanga nin eket can i kom gi pi kope dedede kame en etieko winyo. Pi mano, leg pi jo odong kuo.”

⁵Kakame jotic me Abaka Esekia otieko waco ne kede Isaya kop kame abaka oudo ooro gi kede,

⁶Isaya oko waco negi be, “Oti iwacenu ngadwong wu be, ‘Rwot waco kaman: kur lworo maki pi kope me acae kame itieko winyo di ngatic me abaka me Asiria waco i koma.

⁷Ango kikoma abino mine cuny moro, tetekeny en ebino winyo rwonge moro, di eko dok i lobo mere. Ango abino mino koneke kede epima i lobo mere kunono.’ ”

⁸Ngadwong me isirikalen me Asiria oko winyo be abaka gi oudo otieko yai ki Lakis etie do yi i bomba me Libina. Aso, en eko ot bute kunono.

⁹Abaka me Asiria bin oko winyo be Abaka Tiraka me Abisinia oudo tie telo isirikalen me Misiri pi bino yi kede gi. Kakame en bin ewinyo kede kop nono, en bobo eko ooro jo but Esekia pi waco ne be,

¹⁰“Kur imi Rubanga ni kame in itie keto gen ni i kome nono ngali be Yerusalem likame bino poto i cinga.

¹¹In itieko winyo gikame abaka me Asiria otieko timo ne lobere dedede, di emuducaro gi atwal atwala. Benyo, iparo be wun ikarununu bwot?

¹²Abakai me Asiria kame ango alunyo cen ngei gi bin omuducaro bomban me Gosan, Aran, kede Resep, kede jo me Eden kame oudo tie Telesar, cabo likame tie moro kikom gi kame rubanga mere oko lake.

¹³Abakai me bomban me Kamat, Arapad, Separabaim, Kena kede Iba tie tuai?”

¹⁴Abaka Esekia oko gamo baluwa ki cing jo kame oudo ooro di eko somo. Di do en eko ot i ot ka Rwot di eko keto baluwa nono i nyim Rwot.

¹⁵Esekia oko lego but Rwot di ewaco be, “Okwe Rubanga me jo me Isirael, in ngat kame ibedo i kom ni me ajakanut i wi cerubim, in keni en Rubanga, kame pugo ajakanuto dedede me wi lobo. In icweo lobo kede malo.

¹⁶Cik yiti, Okwe Rwot di iko winyo wa. Yab wangi, Okwe Rwot, di iko neno gikame tie timere. Winy kope dedede kame Senakerib ocwao me yeti, in Rubanga akuo.

¹⁷Okwe Rwot, ateteni wan ongeo be abakai me Asiria otieko muducaro atekerin dedede kede lobere gi,

¹⁸di kiko kwikwito rubangan gi i mac, bed bala gin oudo likame rubangan, do kibedo gikame jo otimo kede cing gi; gin oudo kibedo cal kame kotimo kede yen kede kide. Omio gin kiko muducaro gi.

¹⁹Aso nataman, Okwe Rwot Rubanga wa, lak wa ki cinge, tetekeny atekerin dedede me wi lobo ngei be in keni en ibedo Rwot Rubanga.”

²⁰Di do Isaya wot ka Amos oko cwano kop but Esekia di ewaco ne be Rwot Rubanga me jo me Isirael otieko winyo ilega mere kame mako abaka Senakerib,

²¹di Rwot oko dwoko kop be, “Jo me bomba me Yerusalem nyeri, doko kicai in Senakerib.

²²Iparo be ngai en kame in oudo itie yeyeto di icao? Ngai en kame in oudo itie lelemo i wie? Ngai kame in oudo ineno kede ewaka kame cal kamano? In oudo itimo magonogo i koma ango Ngat Kacil me Isirael!

²³In icwao joor ni nyera, doko in itieko waco be in itieko yito i wi mori kede cabalan ni atot atota nogo, ituno paka i ajikini me Lebanon di iko tongo yen seda kame bocoboco, kede yen saipuras kame beco kalamo. In iwakere be ituno i cuny abum mege kakokodo adikinicel.

²⁴In iwakere doko be in ikunyo ataneko di iko mato pii i lobere me kumbor, kede be tieni onyono icileta me Misiri paka tuo.

²⁵“Benyo, in likame iwinyo be ango oudo aiko kamanono riki sek? Ango oudo atieko iiko riki sek gikame nataman ango amio ocobere, en be in ibino rereto bomban kame kocelo kede apama atek di gin kiko doko amejeko.

²⁶In itimo manoni di jo me bomban nogo do li kede teko; oudo kitie kede inonong atek, doko oudo kibedo di wi gi ototolun. Gin oudo kical bala amel arabo bala lum kame tie dongo i wi ot, lum kame yamo aliet me oro nero di pwodi likame kitieko dongo.

²⁷“Ango angeo kope dedede kame maki, gi dedede kame in itimo kede kabedere kame in ioto iye. Ango angeo gero kame itie kede i koma.

²⁸Do pien in itie kede gero i koma, doko atieko winyo kite kame in iwakere kede, ango abino kodo umi kede golu na di ako rwako lilim i dogi di ako wiri i dok cen ilubo yongayo kame oudo iwok kiye.”

²⁹Di do Isaya oko waco ne Abaka Esekia be, “Manoni en gianena kame bino nyuto ni gikame bino timere. Mwaka noni wun ibinunu camo kodere kame bwangun tui ken gi, di i mwaka me are ikounu bino camo kodere kame bwangun tui ken gi kakame oudo ikwanyunu kiye cam me mwaka okato. Do i mwaka me adek wun ibinunu cuno kodere wu di ikounu kano gi, ibinunu puro olok di ikounu camo anyakini gi.

³⁰Donge me jo me ot ka Yuda kame bino bwot di kiko dong kuo bino bobo bedo cal bala yat kame rieo aliasin mege i lobo kakatut di eko nyak.

³¹Pien donge me jo bino bedo tie Yerusalem kede i wi moru me Sion. Manoni bino timere pien Rwot me jo yi otieko keto cunye pi timo manoni.

³²“Pi mano, Rwot waco kop i kom abaka me Asiria be, ‘En likame ebino donyo i bomba noni arabo gweno akadi tong me emal acel iye. Likame tie sirikale moro kame mako ebuku, kame bino tuno i nget bomba noni, arabo kame bino mukuro lobo rimaro apama mere pi sure.

³³Yongayo kame en oudo elubo me bino, yongayo nono en kame ebino lubo me dok; likame ebino donyo i bomba noni; ango Rwot en awaco.

³⁴Ango abino yi pi bomba noni di ako gwoke pira kede pir ngatic na Daudi.’ ”

³⁵Di do malaika ka Rwot oko ot i kimere me isirikalen me Asiria di eko neko isirikalen tutumia tol acel kede ot kanyauni kiwie kany (185,000). Oru mere odiko sek kakame piny oru kede, kom jo oto oudo orade piny.

³⁶Di do Abaka Senakerib me Asiria oko yai edok paco, di eko donyo bedo Ninebe.

³⁷Ceng moro acel di en oudo etie lego i tempulo ka rubanga mere Nisirok, awobe mege are Adaramelek kede Sareser oko neke kede epima, di gin girgi kiko lwi kioto i lobo me Ararat. Esarakadon, wode ace, oko lunyo wange bala abaka.