Read kumam 2 Abakai 20 Bible Online

2 Abakai 20 - kumam bible

2 Abakai 20

¹I kare nogo tuwo oko mako Esekia kame oudo otuno do neke. Enabi Isaya wot ka Amos oko ot bute di eko waco ne be, “Rwot waco be in likame ibino cango, in iyaro to. Pi manono, poore itemuno epone kame ibino weko kede jo me odi.”

²Esekia oko loko nyime oneno apama di eko lego but Rwot kaman:

³“Okwe Rwot, ango akwai iyutuno epone kame ango abedo timo kede tic nin kede cunya lung kede genere, doko abedo timo gikame poore i wangi.” Esekia oko kok adikinicel.

⁴Isaya oko yai kibut abaka, do di pwodi likame en ekalamo diakal me diere, Rwot oko waco ne be,

⁵“Dok cen di iko waco ne Esekia ngapug ka jo na be, ango Rwot Rubanga ka kwaru ni Daudi atieko winyo ilega ni doko atieko neno pigewangi; ango ateteni abino cangi; i ceng me adek in ibino ot i oda.

⁶Ango abino medi mwakini tomon kiwie kany me bedo kuo. Ango abino laki karacel kede bomba noni ki cing abaka me Asiria, di ango ako bino donyo gwoko bomba noni pira kede pir ngatic na Daudi.”

⁷Isaya oko waco ne Esekia pi kwanyo epigi kame konyonyoto di eko keto i akwoti mere di eko bino cango.

⁸Di do Abaka Esekia oko penyo Isaya be, “Gianena nyo kame bino nyuto be Rwot bino canga di ako bino karuno ot i ot ka Rwot i ceng me adek?”

⁹Isaya oko gamo be, “Man en gianena kame Rwot bino mini, kame bino nyuto nin be en ebino timo gi noni kame en etieko cikere iye pi timo. Benyo, nataman imito be mi tipo kame tie i wi kayito ot anyim tien tomon arabo edok cen tien tomon?”

¹⁰Esekia oko gamo be, “Etie gire gikame yoyot ne tipo ot anyim tien tomon; ango amito mie edok cen tien tomon.”

¹¹Enabi Isaya oko lego but Rwot, di Rwot oko mino tipo onyiko cen tien tomon i wi kayito kame Abaka Akas oudo otimo.

¹²I kare nono abaka me Babilon, Abaka Merodak Baladan wot ka Baladan oko winyo be Abaka Esekia oudo kome obedo lit do oudo etieko do cango. Aso, en eko oro jo bute pi tero ne baluwa kede giamia moro.

¹³Esekia oko gamo joor nogo di en eko nyuto negi abar mege dedede. En enyuto negi siliba, saabu, jamini angwe kur, moe me sut, kede jamini mege dedede me yi. Likame tie gimoro me ode arabo kame oudo tie karamoro i adul kame en epugo kame en likame eko nyuto negi.

¹⁴Di do enabi Isaya oko ot but Abaka Esekia di eko penye be, “Cuo nogi owok ki tuai, doko kop nyo kame gin kiwaco ni?” Esekia oko gamo be, “Gin kiyai ki piny abor, kiwok ki Babilon.”

¹⁵Isaya bobo oko penye be, “Nyo kame gin kineno i odi?” Esekia oko gamo be, “Gin kitieko neno gi dedede kame tie i oda; likame tie gimoro i oda kalikame ango anyuto negi.”

¹⁶Di do Isaya oko waco ne Esekia be, “Winy kop kame Rwot tie waco. En ewaco be,

¹⁷‘Kare tie bino kame jamini dedede me odi kede jamini kame joakwari ni obedo kano tuno tin, kobino tero Babilon. Likame tie gimoro kame kobino weko dong.

¹⁸Ikwae ni da, ace kikom gi kobino tero di oko mino gi kidoko abwocin kame timo tice me paco me abaka me Babilon.’ ”

¹⁹Di do Esekia oko waco ne Isaya be, “Kop ka Rwot kame in itieko waco na nono ber.” En ewaco kamanono pien oudo eparo be mulem kede anapakin bino bedo tie i kare me kuo mere.

²⁰Gi dedede apat kame Esekia bin otimo, teko mere, epone kame en bin etimo kede atapar kede puleju di eko tero pii i bomba, gin dedede kowandiko gi i Itabu me Itatam amako Abakai me Yuda.

²¹Esekia bin oko to di wode Manase en kame oko lunyo wange bala abaka.