Read kumam 2 Abakai 21 Bible Online

2 Abakai 21 - kumam bible

2 Abakai 21

¹Mwakini me dongo ka Manase oudo tie tomon kiwie are i kare kame en bin ecako kede pug. En bin eko pug i Yerusalem pi mwakini ot kany kiwie kany. Nying toto mere bin Kepesiba.

²Manase bin oko timo gikarac i nyim Rwot. En eoto lubo tim me kwer me atekerin kame bin Rwot oriamo tenge ki nyim jo me Isirael.

³En emedo gero kabedere me woro caljwogi kame bin papa mere Esekia orereto; etimo alutarin me woro Baal, etimo da cal me rubanga Asera, bala kame Abaka Akab oudo otimo. Manase obedo woro jamini apapat kame tie i malo, di etio negi.

⁴En etimo alutarin me woro caljwogi apapat i ot ka Rwot, kabedo kame bin Rwot owaco kop i kome be, “Kobino wora i Yerusalem.”

⁵En etimo da alutarin i diakale are dedede me ot ka Rwot pi woro jamini apapat dedede kame tie i malo.

⁶En bin emio wode bala giayala awanga; etimo da tic me tiet kede lamo gagi, oudo etio kede imuroko kame penyo tipere kede etio da kede jojwogi. En ebedo timo gikareco atot atota i nyim Rwot, di eko wango cuny Rwot.

⁷En ecibo i ot ka Rwot cal apa me rubanga Asera kame en etimo, kabedo kame bin Rwot owaco i kome but Daudi kede but wode Sulumani be, “Ot noni kede Yerusalem kanoni, en kabedo kame ango atieko yero kikom adulion dedede me ikekon tomon kiwie are me jo me Isirael, pi bedo kakame kowora iye nakanaka.

⁸Ango likame bobo abino mino jo me Isirael yai tenge ki lobo kame bin ango amio joakwari gi di kiko donyo rimo piny, tek di gin kigwokere di kiko bedo lubo gi dedede kame ango aciko negi, kede kiko lubo iswilia dedede kame bin ango amio Musa.”

⁹Do gin jo me Yuda bin likame kiko lubo; Manase omio gin kiko timo gikareco atot kalamo me atekerin kame Rwot omuducaro i nyim jo me Isirael.

¹⁰Rwot di ebeo i dog inabin jotic mege bin oko waco be,

¹¹“Pien Abaka Manase me Yuda otieko timo gi me kwer nogi, gikareco kalamo kame jo Amor obedo timo, di en eko mino jo me Yuda otimo dub kede caljwogi mege.

¹²Pi mano, ango Rwot me Isirael abino kelo i kom Yerusalem kede Yuda can kame dano winyo kop mere di kome ko to.

¹³Ango abino mino Yerusalem alola bala kame bin atimo ne Samaria, kede bala kame bin atimo ne Abaka Akab me Isirael kede jo me ode. Ango abino weno jo i Yerusalem bala kame dano weo kede pii i suani di eko riebe.

¹⁴Ango abino jalo jo na odong mege, di ako bino mino gi i cing jokwor gi, jo kame bino bwono gi di kiko yako gi.

¹⁵Ango abino timo manoni but jo na pien gin kitimo gikarac i nyima di kiko wango cunya, cako i kare kame joakwari gi oyai kede ki Misiri tuno tin.”

¹⁶Medo i kom manono, Manase obedo onyo remo me jo ali kede raco moro tuno remo gi mol romo Yerusalem lung, cako ki bad tetucel tuno tetu ocelu. En etimo manoni medo i wi dub kame en emio kede jo Yuda otimo gikarac i nyim Rwot.

¹⁷Gi dedede apat kame bin Manase otimo, kiton dub mege, gin dedede kowandiko gi i Itabu me Itatam amako Abakai me Yuda.

¹⁸Manase bin oko to di oko yike i paco mere me abaka i poto ka Usa. Wode Amon en kame bin oko lunyo wange bala abaka.

¹⁹Mwakini me dongo ka Amon oudo tie ot are kiwie are i kare kame en bin ecako kede pug; en bin eko pug i Yerusalem pi mwakini are. Nying toto mere bin Mesulemet, nyar ka Karus me Yotoba.

²⁰En eko timo gikarac i nyim Rwot, bala papa mere Manase.

²¹En elubo gikame papa mere bin otimo dedede. En ebedo timo tic ne caljwogi bala bin papa mere, doko di eworo gi.

²²En eweko Rwot Rubanga ka joakwari mege, di eko dagi lubo yongayo mere.

²³Jotic ka Amon bin oko bedo kede iik arac i kome i mung, di gin kiko neke i ode.

²⁴Do jo me lobo nono oko bin neneko jo dedede kame oudo obedo kede iik arac i kom Abaka Amon, di gin kiko cibo wode Yosia obedo abaka kawange.

²⁵Aso, gi dedede kame bin Amon otimo kowandiko i Itabu me Itatam amako Abakai me Yuda.

²⁶Amon bin oko to di oko yike i ates i poto ka Usa; di do wode Yosia oko lunyo wange bala abaka.