Read kumam 2 Abakai 25 Bible Online

2 Abakai 25 - kumam bible

2 Abakai 25

¹Abaka Esedekia bin oko jemo ne Abaka Nebukadunesa me Babilon, di manono oko mino Nebukadunesa obino ne kede isirikalen mege dedede di gin kiko suro Yerusalem i buto duwe tomon me duwe me tomon me mwaka me kanyangon me apugan ka Esedekia. Gin bin kiko luko bomba di kimukuro lobo rimaro apama mere,

²di do gin kiko bedo kine paka tuno i mwaka me tomon kiwie acel me apugan ka Abaka Esedekia.

³I buto duwe kanyangon me duwe me ongwon kec oko do cere ne jo kame oudo tie i bomba pien cam oudo otiek.

⁴Di do jo oko muko apama me cel me bomba; abaka oko lwi iwor kede isirikalen dedede, kiringo kilubo yongayo me poto me abaka, di kiko donyo ki erute kame oudo tie i dierediere me apamai are, bed bala oudo jo Babilon oudo oluko bomba rimaro. Gin kiko ringo kioto tetu Aditot me Yorodan.

⁵Do isirikalen me Babilon oko bin wapo Abaka Esedekia di kiko make i ebar me Jeriko. Isirikalen ka Esedekia dedede bin oko sarakin, kiringo kiweke.

⁶Isirikalen me Babilon bin oko mako Esedekia di kiko tere Ribula but Abaka me Babilon, ngat kame oko ngolo ne kop.

⁷Gin bin kiko neneko awobe ka Esedekia i nyime di eneno, di kiko golo wang Esedekia; kiko twene kede irikoi di kiko tere Babilon.

⁸I buto duwe kanyaare me duwe me kany me mwaka me tomon kiwie kanyangon me apugan ka Abaka Nebukadunesa me Babilon, Nebusaradan, ngat kame oudo mio abaka tam doko di en oudo ngadwong me isirikalen, oko donyo Yerusalem.

⁹En eko wango ot ka Rwot, paco me abaka, kede ude me Yerusalem dedede; en ewango ude me jo adongodongo dedede.

¹⁰Isirikalen dedede me Babilon kame oudo tie kede Nebusaradan oko rereto apama me cel me bomba me Yerusalem dedede piny.

¹¹Nebusaradan oko tero Babilon jo dedede kame oudo oko dong i bomba, kede jo kame bin oko rieno cing gi but abaka me Babilon; egwaro jo dedede.

¹²Do Nebusaradan oko weko jocan mogo odong Yuda pi timo tic i poti me olok kede puro poti.

¹³Jo me Babilon oko tuturo ipirin me nyonyo buronsi, icegeren me cibo kalayan kame oudo tie i tempulo, karacel kede epipa adwong me pii, di gin kiko tero nyonyo buronsi dedede Babilon.

¹⁴Gin kitero da agune, gi me kikiso alutari, jamini me kepo wi ausin me italan, bakulin me dunyo odok angwe kur, kede jamini apat dedede me nyonyo buronsi kame oudo kotio kede i tempulo.

¹⁵Kitero da itatany me mac kede kalayan. Gin kitero jamini dedede kame kotimo kede saabu arabo siliba, kiton bakulin atino kede atubai me mako itonge me mac.

¹⁶Jamini me nyonyo buronsi kame oudo Abaka Sulumani otimo pi tempulo oudo pek twatwal likame kotwero pimo gi; gin en ipirin are, icegeren kede epipa alac me pii.

¹⁷Ipirin are nogo acelacel oudo boro mere malo tie puti ot are kiwie kanyaare di oropo wi gi kede nyonyo buronsi kame boro gi malo tie puti ongwon kede dul, di kotubuso gi kede cal me anyakini me pomagurunet me nyonyo buronsi rimaro.

¹⁸Nebusaradan, ngadwong me isirikalen oko tero da bala mabus Seraya Ngatel me Josaseredoti, Sepania ngasaseredoti kame oudo lubo tiene, kede jo adek kame oudo obedo jodar ekeko me tempulo.

¹⁹En eko tero bobo da ki bomba ngatic adwong kame oudo telo kop kame mako isirikalen, kede jo kany me kansulo ka abaka kame oudo pwodi tie i bomba, kalani adwong me isirikalen, en ngat kame bin coko jo piny pi ot yi, kede cuo apat ot kanyape kame oudo obedo anywali me Yuda, kame gin kiudo tie i bomba.

²⁰Nebusaradan oko tero gi i bomba me Ribula but abaka me Babilon.

²¹Abaka me Babilon oko mino koneko gi i Ribula kunono, i lobo me Kamat. Aso, bin oko tero jo me Yuda ot bedo bala mabus i lobo apat.

²²Abaka Nebukadunesa me Babilon bin oko keto Gedalia wot ka Akikam, en akwar Sapan, bala ngapug me jo kame en oudo eweko odong i lobo me Yuda.

²³Kakame jotel dedede me isirikalen me Yuda, jo kalikame bin orieo cing gi, oko winyo kede be abaka me Babilon oudo otieko keto Gedalia bala ngapug, gin kiko ot kede isirikalen gi Misipa but Gedalia. Jotel me isirikalen nogo gin bin en, Isimael wot ka Netania, Yokanan wot ka Karea, Seraya wot ka Tanekumet dano me Netopa, kede Yasania wot ka dano me Makat.

²⁴Gedalia oko kwongere but gi di ewaco be, “Kur ibedunu kede lworo moro pi jotic me Babilon. Bedunu i lobo noni, timunu tic ne abaka me Babilon, di gi dedede ko bino bedo ne wu kiber.”

²⁵Do mwaka nono i duwe me kanyaare, Isimael wot ka Netania, en akwar Elisama, dano me paco ka abaka, oko ot kede cuo tomon, di gin kiko neko Gedalia. Gin kineke karacel kede jo me Yuda kede jo Babilon kame oudo tie kede en.

²⁶Di do jo dedede me Isirael, jo kobaro kede jocan, karacel kede jotel me isirikalen, oko yai di gin kiko ot Misiri, pien gin oudo kitie lworo jo Babilon.

²⁷I mwaka me ot adek kiwie kanyaare me kare kame oudo Abaka Yekoyakin me Yuda otieko obukui bala mabus, i buto duwe ot are kiwie kanyaare me duwe me tomon kiwie are me mwaka nono, Abaka Ebilimerodak me Babilon oko bedo kede cuny me kisa but Yekoyakin di eko gonye ki otkol, manono en mwaka kame en egeo kede pug bala abaka.

²⁸Ebilimerodak oko tere kiber, di eko mine ruom me wor kame kalamo me abakai apat dedede kame bin tie kede en Babilon bala mabus.

²⁹Pi manono, Yekoyakin oko gonyo igoen me mabus di eko ngapo apat, eko donyo cam i emesa me abaka ceng dedede pi kare me kuo mere lung.

³⁰Buli ceng, di en pwodi oudo etie ekuo, abaka me Babilon oudo mie sente me wilo gikame mitere ne.