Read kumam 2 Abakai 3 Bible Online

2 Abakai 3 - kumam bible

2 Abakai 3

¹I mwaka me tomon kiwie kanyauni me apugan ka Yekosapat me Yuda, Yoram wot ka Akab oko doko abaka me Isirael, di eko pug di ebedo Samaria pi mwakini tomon kiwie kanyauni.

²En eko timo gikame rac i nyim Rwot, do likame en eko bedo rac kalamo papa mere kede toto mere, piento en ereto piny cal ka Baal kame papa mere oudo otimo.

³Do akadi bed bala kamanono da, eda eko timo dub kame Yeroboam wot ka Nebat oudo otimo, i yore me mino Isirael donyo i dub; likame en epokere kede tim nono.

⁴Abaka Mesa me Moab oudo opito romini. Buli mwaka en oudo emio cul but abaka me Isirael me idwe romini tutumia tol acel (100,000), kede yer kame konyaro kikom romini tutumia tol acel (100,000).

⁵Do kakame Akab oko to kede, abaka me Moab oko jemo ne abaka me Isirael.

⁶Aso, Abaka Yoram oko yai ki Samaria di eko coko isirikalen me Isirael karacel.

⁷En eko cwano kop but Abaka Yekosapat me Yuda be, “Abaka me Moab ojemo na, benyo, ibino yei upere keda ot sure?” Abaka Yekosapat oko dwoko be, “Ebo abino ot; ango abedo meri, jo nango obedo jo nin, doko da asigiran nango obedo megi.

⁸Obino lubo yongayo mene me ot suro kunono?” Yoram oko dwoko be, “Obino lubo yongayo me wi tim me Edom.”

⁹Aso, abaka me Isirael kede abaka me Yuda kede abaka me Edom oko yai; kakame kitieko ot kede pi ceng kanyaare, pii kame kimato kede kame leini gi mato oko tiek.

¹⁰Di abaka me Isirael oko waco be, “Okwe, kom Rwot olwongo wan abakai adek pi bino mino wa i cing abaka me Moab!”

¹¹Do Yekosapat oko waco be, “Benyo, likame tie enabi moro ka Rwot kan, kame wan otwero penyo cuny Rwot kibute?” Di ngatic acel ka abaka me Isirael oko dwoko be, “Elisa wot ka Sapat, en ngat koudo obedo konyo Elia tie kan.”

¹²Yekosapat oko waco be, “En etwero waco ne wa kop kowok kibut Rwot.” Aso, abakai adek nogo oko ot but Elisa.

¹³Elisa oko waco ne abaka me Isirael be, “Nyo kame itie mono kibuta? Ot but inabin ka papa ni kede me ka toto ni.” Do abaka Yoram oko dwoko be, “Li, Rwot en kolwongo wan abakai adek, tetekeny abaka me Moab mak wa.”

¹⁴Elisa oko dwoko be, “Alairo i nying Rwot kakuo, en Rwot me jo yi kame ango atio ne be, oudo likame ayaro ngoloro wu da, ka koto oudo likame atie kede wor but ngat kame ikoderenu kede, en abaka Yekosapat me Yuda.

¹⁵Do nan kelanu ngawer.” Kakame ngawer oudo tie gono kede adungu mere, twer ka Rwot oko bino i kom Elisa

¹⁶di eko waco be, “Rwot owaco be, ‘Abino mino ataparin me pii pong i osamai noni.

¹⁷Likame ibinunu neno kot moro akadi yamo abuko, do pii bino pong i osamai noni, tetekeny wun kede leini wu ikounu bino udo pii me amata.’ ”

¹⁸Elisa oko meede be, “Man obedo gikame titidi kibut Rwot; bobo en ebino mino Moab da i cingu.

¹⁹Ibinunu mano bomban gi dedede kame kocelo, kede bomban ace apirgi tek; ibinunu totongo yen gi anyako anyakini piny, ikounu cego wang ataneko gi, di ikounu dudubo poti gi alobo gi mio i yore me lwolwomo iye kide.”

²⁰Oru mere odiko, i esawa kame komio kede giayala me odiko, pii oko mol wok ki bad tetu Edom di eko umo kabedo dedede.

²¹Kakame jo me Moab oko winyo kede be abakai adek oudo obino pi yi kede gi, gin kiko coko cuo dedede kame oudo twero ngapo jame me yi, cako kibut jo adongo tuno but idwe, di kiko ot teere i ikor pi yi.

²²Kakame gin kiko yai kede odiko, asara me ceng oko caro pii di gin kiko neno di pii kame oudo tie i nyim gi di olokere odoko remo.

²³Gin kiko waco be, “Man obedo remo, isirikalen me abakai adek nogo miero bed di odipo yi di kiko nekere ken gi ken gi. Nan ootunu oyakunu kimere gi!”

²⁴Do kakame gin kiko tuno kede kabedo me kimere oudo tie iye, isirikalen me Isirael oko yai di oko suro gi, di jo me Moab nogo oko ringo. Isirikalen me Isirael oko riamere kede gi di kisuro gi tuno Moab.

²⁵Jo me Isirael oko dudubo bomban me Moab, di kiko lwolwomo kide i poti amio tuno umo gi pukupuk. Kiumo wen ataneko dedede di kiko totongo piny yen abeco dedede kame nyako anyakini. I ajikini mere, bomba me Kir Keres en kame kide me apama kame kocele kede en oko dong cungo, di do jo kame yi kede aporocet oko luke di kiko sure.

²⁶Kakame abaka me Moab oko neno kede be yi do oudo tie bwone, en eko kwanyo jo tol kanyaare kame yi kede epima pi koto yabo ne yongayo me bwot i bad tetu kakame isirikalen me Edom oudo tie iye, do likame kiko twero.

²⁷Di do en eko kwanyo wode kao kame oudo poore lunyo wange bala abaka, di eko yale bala giayala awanga i wi apama. Jo me Isirael oko bedo kede gero atek, di kiko lokere dok cen i lobo gi.