Read kumam 2 Abakai 4 Bible Online

2 Abakai 4 - kumam bible

2 Abakai 4

¹Ceng moro acel dako me enabi moro kikom ekodet me inabin oko lelemo but Elisa be, “Adwong, cwara ngatic ni oto! Bala kame ida ingeo kede, en oudo ebedo dano alworo Rwot, do nan icuo moro kame en oudo etie kede banya mere obino emito mako idwe na are bala ipasoi pi banya nono.”

²Elisa oko waco ne be, “Nan atim ni nyo? Wac na gikame in itie kede i paco.” Dako nono oko dwoko be, “Likame tie gimoro kame ango atie kede, kwanyo kenekene cupa me mo me olibeti.”

³Elisa oko waco ne be, “Ot but jokio ni iko kwakwao galanin atot atota kame yi gi tie nono.

⁴Di do in kede idwe ni ikounu donyo i ot di ikounu cego ekeko, di ikounu cako piko mo i galanin nogo; tek kame galani moroni opong, kwanye ikete tenge.”

⁵Aso dako nono oko donyo i ode kede idwe mege di eko cego ekeko; di gin kiko donyo tero nen galanin di epiko iye mo.

⁶Kame galani moroni oudo opong, en oudo eko waco ne acel kikom awobe mege be, “Kel bobo ace.” Di do mo me olibeti oko jiko ony ki cupa kame oudo en etie onye kiye.

⁷En eko dok but enabi Elisa di Elisa oko waco ne be, “Oti icat mo nogo icul kede banya, di in kede idwe ni ikounu konyere kede sente odong mere.”

⁸Ceng acel Elisa oudo tie beo ki Sunem, kakame dako obaro oudo bedo iye. Dako nono oko lwonge cam. Aso, Elisa oko donyo beo cam kanono i kare dedede kame en oudo eoto kede Sunem.

⁹Dako nono oko waco ne cware be, “Neningo, ango angeo kiber be icuo aruruco bino but wa kan obedo dano ka Rubanga.

¹⁰Wek oger ne agola moro kakoyarere i wi ot, di oko keto ne iye kabuto, emesa, kom kede etala, tetekeny en ekaruno bedo kunono kame ebino but wa.”

¹¹Ceng moro acel Elisa oko ot kunono di eko ot buto i agola nono.

¹²Elisa oko waco ne ngatic mere Gekasi pi ot lwongo ne dako won ot nono. Kakame en elwongo kede dako nono di eko bino,

¹³Elisa oko waco ne Gekasi be, “Penye gikame en emito be atim ne pi kite kame ebedo lole kede pirwa. Cengemogo etie kede kop mere moro kame emito be ater i nyim abaka arabo but ngadwong me isirikalen.” Dako nono oko dwoko be, “Ango atie bedo i diere me jo na, atie kede gi dedede.”

¹⁴Elisa oko penyo Gekasi be, “Nan atim ne do nyo?” Gekasi oko dwoko be, “En eli kede wode, doko cware da otieko ti.”

¹⁵Elisa oko waco ne be, “Aso lwong bobo dako nono kan.” Dako nono oko bino di eko cungo i ekeko,

¹⁶di Elisa oko waco ne be, “Mwaka atie bino i dwete nogi, in ibino tingo atin awobi.” En eko dwoko be, “Otukwi! Adwong, li akadi acel, kur ingala, Okwe in dano ka Rubanga.”

¹⁷Bala kame Elisa oudo owaco, dako nono oko yac di eko nywalo atin awobi mwaka kolubo i kare nono.

¹⁸Kakame atin odoko dit kede, ceng acel en eko ot but papa mere i poto kakame jo oudo tie kac iye.

¹⁹Cucuto en eko cako koko but papa mere be wie oudo ti bare kitek.

²⁰Papa mere oko waco ne ngatic acel be, “Tinge itere but toto mere.” Ngatic nono oko tinge di oko tere but toto mere, di toto mere oko donyo tinge tuno esawa kanyape, di do eko to.

²¹Toto mere oko tere di eko piele i kabuto ka Elisa di eko cego ekeko di eko ot.

²²En eko lwongo cware di eko waco ne be, “Cwai ngatic acel kede punda; ango amito ot kede oyotoyot but dano ka Rubanga di ako susunyo dwogo.”

²³Cware oko penye be, “Pinyo komio itie ot bute tin? Tin likame obedo ceng me Ebaga me Por Duwe amoto ceng Sabato.” Do en eko dwoko ne be, “Kur ipari.”

²⁴En eko keto abeno ingei punda di eko waco ne ngatic be, “Mie ering kitek; kur ididio en tuno di ango en awaco ni.”

²⁵En eko ot tuno i moru me Kamel kakame Elisa oudo tie iye. Kakame Elisa onene kede di etie bino, Elisa oko waco ne Gekasi be, “Neningo dako me Sunem ca tie bino.

²⁶Bubunyo ringo ot siramo en di iko penye ka kitie kiber, en kede jo ture dedede.” Dako nono oko waco ne Gekasi be likame oudo tie gimoro arac,

²⁷do kakame etuno kede but Elisa, en eko mako tien Elisa. Gekasi oko ot pi koto remoro en tenge, do Elisa oko waco be, “Weke, en etie kede cwercuny adwong; do Rwot omungo na pinyo mere.”

²⁸Di dako nono oko waco be, “Adwong, benyo, oudo bin ango apenyi pi mina atin? Mam oudo ango awaco ni be iwek ngangalo ango?”

²⁹Elisa oko waco ne Gekasi be, “Iikere iko mako ebela na i cingi iko ot. Ka iriamo kede ngatamoro kur imote, doko ka ngatamoro omoti kur igami. Kame ituno kunono rii ebela nono i nyim awobi nono.”

³⁰Do toto me awobi nono oko waco be, “Alairo i nying Rwot kakuo be ango likame abino yai weki.” Aso, Elisa oko yai di eko upere kede en.

³¹Gekasi oko telo anyim di eko ot rino ebela nono i nyim atin awobi ca, do yamo arabo gimoro ace anyuto kuo likame oko timere. Aso, en eko dok cen ot riamo kede Elisa di eko waco ne be, “Atin ca likame ocei.”

³²Kakame Elisa oko tuno kede i ot, en eko neno atin di buto i kabuto mere di eto.

³³En eko cego ekeko di eko lego but Rwot.

³⁴En eko buto eriebere i kom awobi nono, di doge, wange kede bade otwomere i kom me awobi nono. Kakame en ekude eriebere kede i kome, kom awobi nono oko cako udo lieto.

³⁵Elisa oko yai di eko donyo ririmo yi ot di eko bobo dok eko riebere i kom atin nono; atin nono oko giro tien kanyaare di eko yabo wange.

³⁶Elisa oko lwongo Gekasi di eko waco ne pi lwongo toto me atin nono. Kakame dako nono oko bino kede, Elisa oko waco ne be, “Ter wodi ine.”

³⁷En eko riebere piny i tien Elisa, di eko kwanyo wode etero.

³⁸Kakame Elisa oko dok kede Giligal, kec adwong oudo tie i lobo nono. Ceng acel kakame ekodet me inabin oudo tie i ariamakin kede Elisa, en eko waco ne ngatic mere pi teno agulu ati i keno di eko tedo negi dek.

³⁹Ngat acel kikom gi oko ot obar pi mono amalakwang mogo. En eko udo neru me olok di eko ngwedo anyakini mege bala kame oudo etwero mako. En eko tero gi di eko ngongolo gi i agulu me dek di likame engeo be nyo igonogo.

⁴⁰Oko bin toko ne jo dek, do kakame kibile kede, gin kiko lelemo ne Elisa be, “Elisa, man to ine!” Likame oudo kitwero came.

⁴¹Elisa oko mino kotero ne alos moro, en eko pworo alos nono i gulu me dek di eko waco be, “Tok ne jo dek kicami.” Di dek oko doko ber.

⁴²Ceng moro acel, icuo moro oko wok ki Baal Salisa ekelo ne Elisa mugati ot are kame kotimo kede mawele kocako cek i poto, kede da epuko me wit engano mogo apwodi kokao akaa ki poto. Elisa oko waco ne be, “Mi gi but jo tetekeny kicami.”

⁴³Do ngatic mere oko dwoko be, “Benyo benyo kame ango atwero mino kede jo tol acel gi atitidi noni?” Do Elisa oko medo waco be, “In mi gi but jo tetekeny kicami, pien Rwot owaco be, ‘Gin kibino cam di mogo ko dong.’ ”

⁴⁴En eko toko negi mugati di kiko cam, di mogo oko dong bala kame oudo Rwot owaco.