Read kumam 2 Abakai 6 Bible Online

2 Abakai 6 - kumam bible

2 Abakai 6

¹Ceng acel inabin oko waco ne Elisa be, “Neningo, kakame wan obedo iye diding.

²Wek wan ooti Yorodan di ngat acelacel ko tongo epir acel di oko bino gero kede gi kakame obino bedo iye.” Elisa oko dwoko be, “Mano ber.”

³Ngat acel kibut gi oko kwano be Elisa upere kede gi, en eko yei.

⁴Aso, Elisa oko upere kede gi. Kakame kituno kede Yorodan, gin kiko donyo tongo yen.

⁵Do kakame ngat acel kibut gi oudo tie tongo kede epir, wi le mere oko pute di eko poto i yi pii; en eko kok be, “Okwe adwong, abino timo nadi? Le noni oudo akwao akwaa.”

⁶Di Elisa oko penye be, “Epoto tuai?” Icuo nono oko nyuto ne kakame wi le oudo opoto iye. Elisa oko tongo ebela di eko uce i yi pii di eko mino wi le nono olemo.

⁷Di eko waco ne icuo nono be, “Kwanye,” en eko cwano cinge di eko kwanye.

⁸Abaka me Siria oko cako yi kede Isirael. En eko pepenyo tam kibut jodongo jotic mege di eko yero kakame epoore gero iye kimere gi.

⁹Do Elisa oko cwano kop but abaka me Isirael pi kwenyaro en kur ebei kunono, pien isirikalen me Siria oudo opwono kitie kuro gi.

¹⁰Abaka me Isirael oko kwenyaro tien atot atota jo kame bedo kanono pi bedo di kigwokere.

¹¹Abaka me Siria cunye oko wang twatwal pi kop noni; en eko lwongo jodongo me isirikalen mege di eko penyo gi be, “Ngai kikomu en kame tie ribere kede abaka me Isirael?”

¹²Di ngat acel kibut gi oko dwoko be, “Adwong abaka, likame tie ngatamoro. Kom Elisa enabi me Isirael en kame waco ne abaka me Isirael gikame in iyamo akadi i agola ni me buto.”

¹³Abaka oko waco ne be, “Mounu kakame etie iye; ango abino cwano jo kioto make.” Kakame oko waco ne kede Elisa oudo tie Dotan,

¹⁴en eko cwano twon isirikalen kuno kede asigiran kede cabalan; gin kioto kunono iwor di kiko luko bomba.

¹⁵Kakame ngatic ka Elisa oyai kede odiko sek di eko donyo ooko, en eko udo isirikalen atie kede asigiran kede cabalan di oluko bomba. En eko dok but Elisa di eko lelemo be, “Okwe adwong, wan otie i can! Obino timo benyo?”

¹⁶Elisa oko dwoko be, “Kur ibed kede lworo; pien wan otie kede isirikalen atot kalamo kame gin kitie kede.”

¹⁷Di Elisa oko lego be, “Okwe Rwot, yab wange tetekeny etwer neno piny.” Aso, Rwot oko yabo wang ngatic nono di eko twero neno piny; en eko neno di asigiran kede cabalan aliel mac oumo bad moru luko Elisa.

¹⁸Kakame jo Siria oko bino kede piny pi sure, Elisa oko lego but Rwot be, “Okwe Rwot yut wang gi.” Aso, Rwot oko yuto wang jo nogo bala kame Elisa oudo okwao.

¹⁹Elisa oko waco negi be, “Wun irwenyunu yongayo, doko da irwenyunu bomba; lubanu ater wu but icuo kame itienu mono.” En eko telo gi etero gi Samaria.

²⁰Elisa oko lego be, “Okwe Rwot yab wang jogi tetekeny kikaruno neno piny.” Rwot oko yabo wang gi di kiko neno be oudo kitie Samaria.

²¹Kakame abaka me Isirael oneno gi kede, en eko penyo Elisa be, “Adwong, anek gi? Benyo, anek gi?”

²²Elisa oko dwoko be, “Li! Benyo, oudo in en i yi kede gi di iko mako gi en komio imito neko gi? Kenekene mi gi cam kede pii di iko weko gi kidok but ngadwong gi.”

²³Aso, abaka me Isirael oko iiko negi cam me aura. Ingei gin cam, en eko cwano gi kidok but ngadwong gi. Cako i kare nono isirikalen me Siria oko jiko ot suro lobo me Isirael.

²⁴Ingei kare moro, Abaka Benekadad me Siria oko lwongo isirikalen mege dedede, kiko sirito ot suro Samaria di kiko luke.

²⁵Pi kite kame oudo kiluko kede bomba, kec oko cere i bomba nono, omio oko donyo cato wi punda pi siliba akaya ot kanyauni, kede guram tol are me cet awele[1] oudo kotwero cato pi siliba akaya kany.

²⁶Ceng acel kakame abaka me Isirael oudo tie dero kede wi apama kocelo bomba, dako moro oko lelemo ne be, “Okwe adwong abaka konya!”

²⁷Abaka oko dwoko be, “Wek Rwot en akonyi! Ango atwero konyi benyo? Iparo be ango atie kede engano amoto bwini?”

²⁸Di abaka oko penye be, “Peko ni nyo?” En eko dwoko be, “Dako no oudo owaco nango be onek atin nango di oko camo, di oko camo mere da ceng alubo.

²⁹Aso, wan oko tedo atin awobi nango di oko camo. Ceng kolubo mere ango ako waco ne be ocam atin awobi mere da, do en eko kano mere.”

³⁰Kakame abaka owinyo kede kop ka dako nono, en eko nyinyilo egoe ki kome pi cwercuny. Kite kame oudo etie kede i wi apama, jo oko neno epuko kame oudo engapo bala egoe me yie.

³¹Di do eko waco be, “Akwao be Rubanga neka ka tin piny oyuto di likame kongolo ngut Elisa!”

³²En eko cwano aor pi ot omo Elisa. Iesawa nono Elisa oudo tie bedo ture karacel kede joadongo mogo. Di pwodi aor nono likame otuno, Elisa oko waco ne joadongo nogo be, “Ingeunu be nganek ca ocwao aor bino ngolo wia? Kame aor nono otuno wun nenunu be icegunu ekeko di ikounu dine kitek. Abaka da kikome tie lube kicen.”

³³Di pwodi oudo likame etieko yamo, abaka oko tuno di eko waco be, “Peko noni owok kibut Rwot! Pinyo kamio ango pwodi ameede kede keto gen na bute?”