Read kumam 1 Iyutun 16 Bible Online

1 Iyutun 16 - kumam bible

1 Iyutun 16

¹Gin kiko tero Sanduku me Isikan ka Rwot di kiko kete i yi eema kame Daudi oudo ogero ne; di gin kiko mino Rubanga giayala awanga kede giayala me nywak.

²Kakame Daudi otieko kede mino giayala awanga kede giayala me nywak, en eko lamo ne jo winyo i nying Rwot,

³di en eko poko ne gin dedede cam. En epoko cam ne jo dedede me Isirael, cuo kede mon di rorom, di emio ngat acelacel mugati acel, angol me ringo, kede olok kotuo.

⁴Daudi oko yero Jolebi mogo pi timo tic i nyim Sanduku me Isikan ka Rwot, pi ngangao, kede pi mino pwoc kede pak but Rwot Rubanga me Isirael.

⁵Asap en oudo ngatel me jower, di Sakaria lubo tiene. Yeyel, Semiramot, Yekiel, Matitia, Eliab, Benaya, Obed Edom, kede Yeyel en kame oudo komio gono adungun kede arigirigin. Asap en kame oudo omio gono suanin abatal,

⁶kede josaseredoti Benaya kede Yakasiel en kame oudo komio tic me kuto agwara kare i kare i nyim Sanduku me Isikan ka Rubanga.

⁷Cenge nono en me agege me Daudi waco ne Asap kede joawade mege pi gin wero were me pak but Rwot.

⁸Okwe, miunu pwoc but Rwot, lwongunu nyinge, miunu tice mege ngere but atekerin.

⁹Werunu ne were, werunu ne were me pak; tatamunu tice mege me aura.

¹⁰Lelunu pi nyinge kacil; jo kame mo Rwot poore kileli.

¹¹Mounu Rwot karacel kede teko mere; mounu wange nakanaka.

¹²Yutununu gi me aura kame en etieko timo, gi me isuur mege, kede kop kame etieko ngolo,

¹³Okwe wun ikwae ka Isirael ngatic mere, idwe ka Yakobo, jo kame en eyero.

¹⁴En Rwot Rubanga wa; en engolo kop i wi lobo lung.

¹⁵Bedunu yutuno isikan mere nakanaka, kop kame en eciko but lwak me kare lung,

¹⁶en isikan kame bin en etimo kede Aburaam, kede cikere mere kame ekwongere kede but Isaka.

¹⁷En bin emoko isikan noni but Yakobo bala cik, kede but jo me Isirael bala isikan kame bedo nakanaka.

¹⁸En ewaco be, “Ango abino mino wu lobo me Kanan pi bedo iner kame mako wu.”

¹⁹Kakame gin oudo kinonok kede, gin jo anok anoka kame tie bala jokumbor i lobo nono,

²⁰jo kame oudo obedo rimo piny arima yai ki piny acel tuno i piny ace, yai ki ajakanut acel tuno but ateker apat,

²¹Rubanga likame oko yei ne ngatamoro tero gi kirac; en ebunano abakai pirgi.

²²Ewaco be, “Kur imulunu jo na kame ayero, kur itimunu gimoro arac ne inabin na.”

²³Werunu but Rwot, wun jo dedede me wi lobo! Tatamunu ceng dedede be en elako wa.

²⁴Tatamunu kop me deyo mere but atekerin, kede tice mege me aura but jo dedede!

²⁵Pien Rwot dwong, doko miero pake twatwal; en kame miero mie wor kalamo rubangan dedede.

²⁶Pien rubangan dedede me atekerin apat obedo caljwogi; do Rwot en ocweo malo.

²⁷Wor kede dwongo bed bute; teko kede kilel tie i kabedo mere.

²⁸Okwe wun jo dedede me wi lobo pakunu Rwot, pakunu deyo kede teko ka Rwot.

²⁹Miunu Rwot deyo kame poore kede nyinge; kelunu ne giayala, di ikounu ot i nyime. Worunu Rwot di ingapunu engape kacil;

³⁰bedunu kede mielkom i nyime, wun jo me lobo lung! Kotieko keto lobo kakare, likame tie gikame karuno yayango en.

³¹Bed kede yomcuny in malo, doko ida lobo leli; Wacunu ne atekerin be, “Rwot en abaka!”

³²Miero nam mori, kiton gi dedede kame tie iye; wek poti da leli, kiton gi dedede kame tie i yi gi.

³³Di do yen dedede ko bino wer pi kilel i nyim Rwot, piento en etie bino ngolo kop ne lobo.

³⁴Okwe miunu Rwot pwoc piento en eber; pien amara mere kalikame lokere bedo nakanaka.

³⁵Wacenu be “Lak wa, Okwe Rubanga Ngalak wa; cok wa, di iko lako wa ki diere me atekerin apat, me wek opwoi di oko pako nyingi kacil kede kilel.”

³⁶Pak bed but Rwot Rubanga me Isirael, ikar kede ikar! Di jo dedede oko waco be, “Amen”, di gin kiko pako Rwot.

³⁷Daudi bin oko weko Asap kede joawade mege kunono i nyim Sanduku me Isikan ka Rwot pi gin bedo timo tic kame mitere buli ceng.

³⁸Obed Edom wot ka Yedutun kede cuo ot kanyape kiwie kanyauni me ekeko kame en eyai kiye en kame oudo konyo gi. Kosa kede Obed Edom en koudo daro irutei.

³⁹Daudi oko yero da ngasaseredoti Sadoki kede joawade mege kame oudo obedo da josaseredoti, pi gin timo tic i eema me woro Rwot kame bin tie Gibeon.

⁴⁰Buli odiko kede otieno gin oudo miero kiwang ne Rwot giayala i wi alutari di lubere kede gikame oudo kowandiko i Iswil kame bin Rwot omio jo Isirael.

⁴¹Keman kede Yedutun oudo tie kede gi, kede jo ace da kame oudo koyero pi mino pwoc but Rwot, pien amara mere kalikame lokere bedo nakanaka.

⁴²Keman kede Yedutun en kame oudo komio i cing gi tic me kuto agwarai kede gono suanin abatal me wer, kede jamini ace me wero were kacil. Awobe ka Yedutun bin komio tic me daro irutei.

⁴³Di do jo dedede oko yai kioto i miere gi, di Daudi da oko ot ture pi mino winyo but jo me ode.