Read kumam 1 Iyutun 17 Bible Online

1 Iyutun 17 - kumam bible

1 Iyutun 17

¹Di bin Abaka Daudi odonyo bedo i paco mere me abaka, en eko waco ne enabi Natan be, “Neningo, nataman ango atie bedo i ot kame kogero kede yen seda, do Sanduku me Isikan ka Rwot tie bedo i eema!”

²Natan oko waco ne abaka be, “In tim gikame tie i cunyi; pien Rwot tie kedi.”

³Do iwor nono Rwot oko waco ne Natan be,

⁴“Ot di iko waco ne ngatic na Daudi be ango awaco be, ‘In en kalikame iyaro gero nango ot kame ango abino bedo iye.

⁵Pien ango pwodi likame abedo i ot cako i kare kame alako kede jo me Isirael ki Misiri tuno tin, do abedo kokobo di abedo i eema.

⁶I kabedere dedede kame ango abedo ot iye kede jo me Isirael, likame tie ceng moro acel kame ango atieko penyo kede jotel kame ango bin aciko pi gwoko jo na me Isirael be pinyo komio gin likame kiko gero na ot kede ebao me seda.’

⁷“Aso, nataman in ibino waco ne ngatic na Daudi be Rwot me jo yi owaco be, ‘Ango en kame bin akwanyi ki kakwat, ki kuo me lubo romini di ako keti bedo ngatel ka jo na me Isirael.

⁸Ango abedo tie kedi i kabedere dedede kame in oudo ioto iye, di ako muducaro jokwor ni dedede i nyimi. Ango abino mino nyingi bedo iruo, bala nying jo kame pirgi tek ki wi lobo.

⁹Ango abino yero kabedo ne jo na me Isirael di ako cibo gi iye, tetekeny kibed kabedo kame mako gi, di likame bobo tie ngatamoro kame lolo gi iye. Jo areco likame bobo bino olo gi, bala bin i kare kasek.

¹⁰Cako i kare kame ango bin aketo kede jongolkop pi telo jo na me Isirael, jo areco oko bedo suro gi, do nataman ango abino bwono jokwor ni dedede, doko da abino mini ikwae.

¹¹Ka kare me kuo nin otiek di oko yiki i nget joakwari ni, ango abino keto atin ni acel kame in inywalo, di en eko lunyo wangi bala abaka, di ango ako bino mino ajakanut mere cungo di tek.

¹²En ebino gero nango ot, di ango ako bino mino ajakanut mere bedo nakanaka.

¹³Ango abino bedo papa mere, di en eko bino bedo woda. Do likame abino kwanyo amara na kalikame lokere kibute, bala kame bin akwanyo kede kibut Saulo, ngat kame bin ango akwanyo tenge tetekeny in idok abaka.

¹⁴Ango abino mine ebedo ngapug me jo na kede me ajakanut na nakanaka, doko apugan mere bino bedo ikar kede ikar.’ ”

¹⁵Natan oko waco ne Daudi kope nogi dedede bala kame oudo Rubanga onyuto ne kede.

¹⁶Di do Abaka Daudi oko donyo i yi eema di eko bedo i nyim Rwot, eko lego be, “Okwe Rwot Rubanga, ango en ngai, doko jo me ekeko na da obedo alu kibuti, en komio in imia akodi kuo kame nataman atie iye noni?

¹⁷Aso do di i wangin manoni oudo obedo gi katitidi, Okwe Rwot. Medo i wi manono, in itieko da cikere i kom kop amako ekeko me ngatic ni i kare me anyim. In itera bala dano me ruom amalo, Okwe Rwot Rubanga!

¹⁸Nyo bobo kame ango akaruno waco ni pi wor kame in imia ango ngatic ni? Pien in ingea ango ngatic ni kiber, Okwe Rwot Rubanga!

¹⁹Pir ango ngatic ni, Okwe Rwot, kede pi mit me cunyi, in itieko timo jamini apirgi tek nogi, di iko nyuto ne ngatic nin jamini adongodongo nogi dedede.

²⁰Okwe Rwot Rubanga, likame tie ngatamoro kame cal bala in, doko likame tie Rubanga ace kwanyo in, bala kame wan otieko winyo kede yit wa.

²¹Ateker mene en kame cal bala jo ni me Isirael? Benyo, tie ateker moro ace i wi lobo kame in Rubanga iko ot lako pi bedo jo ni? In bin imio nyingi oko bedo iruo pi jamini adongodongo kede me aura, kame in bin itimo ne jo ni di iriamo tenge atekerin ki nyim jo ni kame ilako ki Misiri.

²²In itieko mino jo ni me Isirael odoko megi atwal; doko in Rwot itieko doko Rubanga gin.

²³“Nataman do, Okwe Rwot Rubanga, in mok atwal kop kame in iwaco i kom ango ngatic ni, kede i kom jo me ekeko na; tim gikame in icikere iye.

²⁴Manono bino mino jo pako nyingi nakanaka di kiwaco be, ‘Rwot me jo yi en Rubanga kame pugo Isirael’; di jo me ekeko nango ngatic ni ko bino bedo pug nakanaka.

²⁵Pien in, Okwe Rubanga na, imio ango ngatic ni angeo be ibino mino ikwae na bedo abakai; manoni en komio ango ngatic ni audo nwangcuny me lego buti kamanoni.

²⁶Aso, nataman Okwe Rwot, in ibedo Rubanga, doko in itieko cikere pi timo nango ngatic ni gikame ber noni;

²⁷pi mano, ango akwai imi winyo but jo me ekeko na, tetekeny ajakanut gi meede i nyimi nakanaka. Pien in, Okwe Rwot, itieko mino gin winyo, doko winyo kame in imio, bino bedo i kom gin nakanaka.”