Read kumam 1 Iyutun 18 Bible Online

1 Iyutun 18 - kumam bible

1 Iyutun 18

¹Kikano di do kare oudo okakato, Daudi bin oko suro jo Pilistia eko bwono gi. En emao gin bomba me Gat kede calere mege.

²En eko bobo da bwono jo Moab, di eko mino jo Moab kame oko dong oko doko jo kame tie i loc mere di kiko donyo culo esolo bute.

³Daudi bobo oko yi di eko bwono Abaka Kadadese me Soba, i nget adul me Kamat di oudo Kadadese tie ot pi dwoko adul me tetu malo me ecilet me Eupurate i loc mere.

⁴Daudi bin oko mako cabalan me yi ka Kadadese tutumia acel (1,000), isirikalen tutumia kanyaare (7,000) kame oudo ringo kede asigiran, kede isirikalen tutumia ot are (20,000) koudo oto kede tien. Daudi oko tongotongo tien asigiran nogo dedede di eko weko asigiran tol acel kenekene en kodong.

⁵Kakame bin jo Siria kame oudo bedo i piny me Damasiko oko bino kede pi konyo Abaka Kadadese me Soba, Daudi oko neko jo tutumia ot are kiwie are (22,000) kikom gi.

⁶Di do en eko keto isirikalen Damasiko kunono, di jo Siria kame bin bedo Damasiko oko doko jo kame bin Daudi pugo, doko kiko donyo culo esolo bute. Rwot bin oko mino Daudi obwono jo dedede kame en oudo eko yi kede gi.

⁷Daudi bin oko mano ibukui kame kotimo kede saabu kame oudo jotic ka Kadadese mako, di eko tero gi Yerusalem.

⁸En eko bobo da mano nyonyo buronsi atot twatwal ki Tibat kede Kun, bomban ka Kadadese. Nyonyo buronsi nogo en kame bin Sulumani oko timo kede epipa adwong me pii, ipirin kede jamini me timo tic me tempulo.

⁹Kakame bin Abaka Toi me Kamat oko winyo kede be Daudi oudo otieko bwono isirikalen ka Kadadese dedede,

¹⁰en eko cwano wode Yoram but abaka Daudi pi mote kede pwone piento Daudi oudo oyi kede Kadadese di eko bwone. Toi oudo obedo yi kede Kadadese tien atot. Yoram bin oko tero ne Daudi giamia me jamini kame kocweo kede siliba, saabu kede buronsi.

¹¹Abaka Daudi oko mino jamini nogo dedede but Rwot, karacel kede siliba kede saabu kame oudo emao kibut atekerin kame bin en eko bwono, gin en jo Edom, jo Moab, jo Amon, jo Pilistia, kede jo Amalek.

¹²Abisai wot ka dako kame nyinge Seruya, bin oko bwono jo Edom i Aditot me Munyo di eko neko jo me Edom tutumia tomon kiwie kanyauni (18,000).

¹³En eko keto isirikalen kabedere dedede i Edom, di jo me Edom lung oko doko jo kame Daudi oudo pugo. Rwot bin oko mino Daudi obwono jo dedede kame en oudo eyi kede gi.

¹⁴Daudi bin oko pugo Isirael lung di engolo kop i ateni doko di etero jo mege dedede kiber.

¹⁵Joab kame nying toto mere oudo Seruya en kame oudo obedo ngatel me isirikalen; Yekosapat wot ka Akilud en kame bin wandiko kope dedede kame timere;

¹⁶Sadoki wot ka Akitub kede Akimelek wot ka Abiata en koudo obedo josaseredoti; Seraya en oudo obedo kalani;

¹⁷Benaya wot ka Yekoyada en kame oudo obedo ngatel me isirikalen kame bin gwoko Daudi; doko awobe ka Daudi en oudo obedo jodongo me tic mere.