Read kumam 1 Iyutun 26 Bible Online

1 Iyutun 26 - kumam bible

1 Iyutun 26

¹Manoni en kite kame bin oko popoko kede tic ne Jolebi koudo daro tempulo. Ki ekeko ka Kora bin koyero Meselemia wot ka Kore, dano me diakal ka Asap.

²Meselemia bin tie kede awobe kanyaare kame mwakini me dongo gi lubere kaman: Sakaria en oudo awobi adwong, di Yediael lube, di Sebadia, di Yatiniel,

³di Elam, di Yekokanan, kede di Eliekoenai.

⁴Bin tie icuo moro da kame nyinge Obed Edom. En Rubanga oudo omie winyo di eko nywalo awobe kanyauni di nywalo gi lubere kaman: Semaya, di Yekosabad, di Yoa, di Sakar, di Netanel,

⁵di Amiel, di Isakar, kede di Peuletai.

⁶Wode Semaya da bin oko nywalo awobe kame pirgi bin tek twatwal i ekeko gi, pien gin oudo jo atek twatwal.

⁷Awobe ka Semaya nogo gin bin en Otini, Repael, Obed, Elisabad, Eliku kede Semakia. Eliku kede Semakia oudo obedo jodiru twatwal.

⁸Jo koyai ki ot Obed Edom bin tie jo ot kanyape kiwie are. Gin dedede jo kame bin opwonyere kiber i tic noni.

⁹Jo me ot ka Meselemia bin oko gida cwano cuo tomon kiwie kanyauni kame oudo opwonyere kiber i tic noni.

¹⁰Ki ekeko ka Merari oudo tie icuo kame nyinge Kosa; en oudo etie kede awobe ongwon: Simiri en oudo ngatel gi (papa mere bin omie ebedo ngatel, bed bala en oudo likame kao),

¹¹Kilikia, Tebalia, kede Sakaria. Jo dedede me ot ka Kosa kame bin oko yero pi bedo jodar tempulo oudo tie jo tomon kiwie adek.

¹²Jodar tempulo nogi bin kopopoko i ikodeta, di lubere kede ikekon gi, di oko mino gi tic i tempulo, bala kame oudo otimo kede ne Jolebi icegun.

¹³Jo me ekeko acelacel bin oko uco alulu pi mito ngeno erute kame gin kipoore daro. Manono bin kotimo abongo paro pi wel me jo atie i ekeko acelacel.

¹⁴Alulu me daro erute me bad tetu kide bin oko mako Selemia, di alulu me daro erute me bad tetu malo oko mako wode Sakaria, icuo kame nakanaka oudo mio tam aber.

¹⁵Alulu me daro erute me bad tetu piny oko mako Obed Edom, di oko mino awobe mege daro agolai kame bin kogwoko kiye jamini.

¹⁶Alulu me daro erute me bad tetu tim kede me Saleket kame oudo tie i yongayo ayito malo oko mako Supim kede Kosa.

¹⁷I bad tetu kide, jodar kanyape en kame bin bedo i wang tic buli ceng, i bad tetu malo jodar ongwon, kede i bad tetu piny jodar ongwon. Jodar ongwon en kame bin koketo pi daro agolai me kano jamini, jodar are pi agola acelacel.

¹⁸I bad tetu tim bin koketo jodar kanyape, ongwon i yongayo adonyo i tempulo, kede are i diakal.

¹⁹Manoni en kite kame bin kopopoko kede tic me daro irutei but jo me ekeko ka Kora kede me ka Merari.

²⁰Kikom Jolebi icegun, Akija en kame bin koketo pi gwoko lim me ot ka Rubanga kede agolai kame bin kokano iye jamini kame komio but Rubanga.

²¹Ladan, ngat acel kikom awobe ka Gereson, en bin kobedo kwaru me jo me ikekon atot apapat, ribo kiton jo me ot ka wode Yekiel.

²²Awobe are ka Yekiel, Setam kede Yoweri en kame bin obedo jodongo kame gwoko lim me tempulo kede agolai me kano jamini.

²³Bin oko popoko tice ne jo me ikekon gi: Amuram, Isikar, Keburon, kede Usiel.

²⁴Sebuel, dano me ekeko ka Geresom wot ka Musa, en kame bin obedo ngadwong kame lo kop kamako lim me tempulo.

²⁵Sebuel oudo obedo wad kede Selomit kibut Elieser omin me Geresom. Elieser en oudo obedo papa me Rekabia, papa me Yesaya, papa me Yoram, papa me Sikiri papa me Selomit.

²⁶Selomit noni kede imiegu mege en kame bin lo kop kamako jamini dedede kame bin Abaka Daudi, kede jotel me diakale, jodongo kame telo isirikalen tutumia tutumia kede kame telo isirikalen toli, kede jotel apat me isirikalen, omio but Rubanga.

²⁷Gin bin kiko tero jamini ace kame koyako ki yi di kiko mino but Rubanga pi bedo me timo tic me tempulo.

²⁸Selomit kede imiegu mege nogo en kame bin gwoko jamini dedede kame komio but Rubanga pi bedo me timo tic i tempulo, kiton giamia kame enabi Samuel okelo, giamia kame Abaka Saulo okelo, giamia kame Abuneri wot ka Ner okelo, kede giamia kame Joab wot ka Seruya okelo.

²⁹Kikom jo me ekeko ka Isikar, Kenania kede awobe mege en kame bin oko mino tic kame mako apugan. Gin en oudo kibedo jopug kede jongolkop.

³⁰Kikom jo me ekeko ka Keburon, Kasabia kede joawade mege tutumia acel kede tol kanyaare (1,700), gin dedede jo atwero tic, bin oko keto gi pi bedo jo kame ngingico tice me jo Isirael i bad tetu tim me ecilet me Yorodan, i kom kop amakere kede tic ka Rwot kede me ka abaka.

³¹Yeria en kame bin ngatel me jo me ekeko ka Keburon. I mwaka me ot ongwon me apugan ka Daudi, bin oko ngingico kop i kom jo kame wok ki ekeko ka Keburon, di oko udo be isirikalen me ekeko noni atek i yi bin tie bedo Yaser i adul me Gilead.

³²Abaka Daudi bin oko yero cuo atwero tic tutumia are kede tol kanyaare (2,700) kikom jotel me diakale me joawade ka Yeria, di en eko keto gi pi bedo jo kame ngingico tice me jo me ikekon ka Ruben, Gad, kede dul me ekeko ka Manase, i kom kop amako Rubanga kede amako abaka.