Read kumam 2 Iyutun 14 Bible Online

2 Iyutun 14 - kumam bible

2 Iyutun 14

¹Abija bin oko to di oko yike i nget joakwari mege i Bomba ka Daudi. Wode anyinge Asa oko lunyo wange bala abaka. I kare mere me pug lobo nono ber oko bedo kede anapakin pi mwakini tomon.

²Asa bin oko timo gikame ber kede kopoore i nyim Rwot Rubanga mere.

³En bin ekwanyo tenge alutarin me kumbor kede kabedo kame koworo kiye rubangan, di eko tuturo ipirin me kide kame koworo, kede gikame cungo pi rubanga adako anyinge Asera.

⁴En eko mino jo me Yuda cik pi timo gikame Rwot mito, en Rubanga ka joakwari gi, kede pi gwoko iswilia mege kede cik mege.

⁵En bin eko da kwanyo tenge ki bomban dedede me Yuda kabedere me woro rubangan kede alutarin me dunyo odok angwe kur, di ajakanut nono oko bedo kede anapakin i kare me apugan mere.

⁶En bin eko luko bomban me Yuda kede apama katek i kare me anapakin nono, di yi oko bedo li i mwakini nogo, pien Rwot oudo omie anapakin.

⁷En ewaco ne jo me Yuda be, “Ogerunu apamai atek luko bomban, kede gedo aboco malo me kino piny, di okounu keto negi irutei kame kocego kede alorito me lilime. Lobo noni pwodi tie merwan, pien wan omounu Rwot Rubanga wa; wan omoenu di nan eko mino wa anapakin ki bad dedede.” Aso, gin kiko gedo di kiko bedo kede mulem.

⁸Abaka Asa oudo tie kede isirikalen tutumia tol adek (300,000) kobedo cuo me ekeko ka Yuda, gin dedede di kitie kede tongini kede ibukui, kede isirikalen amako ibukui kede imalia tutumia tol are kede ot kanyauni (280,000) kobedo cuo me ekeko ka Benjamin. Gin dedede oudo kibedo jo kame tek yi.

⁹Dano moro me Abisinia anyinge Seera oko bin ot suro Yuda kede isirikalen milion acel (1,000,000), kede cabalan tutumia tol adek (300,000), di kiko ot paka tuno Maresa.

¹⁰Asa oko ot pi yi kede en, di gin dedede kiko teere pi copo yi i Aditot me Sepata i nget Maresa.

¹¹Asa oko lego but Rwot Rubanga mere be, “Okwe Rwot, in itwero konyo isirikalen agoro, di eyot ni ayota bala konyo isirikalen atek. Okwe Rwot Rubanga wa, kony wa nan, pien in en kame wan otie geni, doko da wan obino kan i nyingin pi yi kede twon isirikalen nogi. Rwot, in en Rubanga wa; kur iyei ne dano adana bwoni.”

¹²Aso, Rwot oko bwono isirikalen me Abisinia kakame Asa kede isirikalen me Yuda osuro gi kede. Gin kiko ringo,

¹³di Asa kede isirikalen mege oko bedo wapo gi paka tuno Gerar. Oko neko isirikalen me Abisinia atot adikinicel omio likame doko kiko twero catuno yi. Rwot kede isirikalen mege obwono gi di oko yako gi jamini atot twatwal.

¹⁴Di do gin kiko twero dudubo bomban atie i nget Gerar pien jo me kunono oudo lworo otieko mako gi i kom Rwot. Isirikalen oko yako bomban nogo dedede pien oudo kitie kede jamini atot me ayaka.

¹⁵Gin bin kiko da suro kimere me jo koudo tie kede leini, di kiko tero romini kede diegi atot, kede aguraguran. Di do bin kiko dok Yerusalem.