Read kumam 2 Iyutun 15 Bible Online

2 Iyutun 15 - kumam bible

2 Iyutun 15

¹Bin tipo ka Rubanga oko bino i kom Asaria wot ka Oded,

²di en eko ot pi riamo kede Abaka Asa. En eko waco ne be, “Abaka Asa, winy gikame atie waco, karacel kede wun dedede jo me ekeko ka Yuda kede me ka Benjamin! Rwot bedo tie kede wu ka wuda itienu kede en. Ka imoenu ibinunu ude, do ka iwekenu eda ebino weko wu.

³Pi kare kalac Isirael oudo obedo abongo Rubanga me ateni, abongo josaseredoti kame pwonyo gi, kede abongo iswil.

⁴Do i kare kame peko opoto negi kede, gin kiko lokere but Rwot, Rubanga me Isirael. Gin kimoe di kiko ude.

⁵I kare nogo likame dano oudo twero ot karamoroni abongo udo peko, pien lobere dedede oudo tie kede ayela.

⁶Ajakanut acel oudo tie yi kede ocelu, kede bomba acel da oudo tie yi kede ocelu, pien Rubanga oudo otieko kelo negi peko kede can alit me egere dedede.

⁷Do in bed di itek di likame cunyi ko kwanyere. Kobino mini giamia me pwoc pi tic kame itimo.”

⁸Kakame Asa owinyo kede kop kame Asaria wot ka Oded omurao, en eko udo nwangcuny. En eko kwanyo tenge caljwogi dedede ki lobo me Yuda kede Benjamin, kede ki bomban dedede kame en oudo emao ki piny kobedo imukuran me Epuraimu. En bin eko da iiko alutari ka Rwot kame oudo tie i diakal me tempulo.

⁹Jo atot bin oko ngolo odok but Asa, jo me ekeko ka Epuraimu, Manase, kede Simeon, di gin kiko donyo bedo i ajakanut mere, pien gin oudo kineno be Rwot oudo tie kede en. Asa bin oko lwongo gin dedede karacel kede jo me ekeko ka Yuda kede me ka Benjamin.

¹⁰Gin kiko cokere Yerusalem i duwe me adek me mwaka me tomon kiwie kany me apugan ka Asa.

¹¹I ceng nono gin kiko mino giayala but Rwot kikom jamini kame gin oudo kiyako di kiko kelo: dok tol kanyaare (700) kede romini tutumia kanyaare (7,000).

¹²Gin kiko timo isikan kame kiko yei iye woro Rwot Rubanga ka joakwari gi, kede cuny gi kede kuo gi lung.

¹³Ngatamoroni kalikame oudo bino woro Rwot oudo kopoore neke, akadi di en atin amoto dano kocato, icuo amoto dako.

¹⁴Gin kiko kwongere but Rwot kede dwan amalo, di kiwoo, di kikuto agwarai kede tung leini.

¹⁵Jo dedede me Yuda oko lelo pi ikwong gi nono, pien oudo kikwongere kede cuny gi dedede. Doko da gin oudo kimoe kede mit gi dedede, di kiko ude, di Rwot oko mino gi anapakin ki bad dedede.

¹⁶Abaka Asa doko da bin oko kwanyo toto mere Maka ki ruom mere me toto me abaka, piento en oudo etimo cal arac me rubanga adako anyinge Asera. Asa bin ototongo cal nono di eko bebelo en di eko wango angidingidin mege i Aditot me Kideron.

¹⁷Do en likame eko tuturo kabedo me woro rubangan i Isirael. Akadi bed bala kamanono da, Asa oudo obedo dano kame cunye ateteni tie i kom Rwot i kare me kuo mere lung.

¹⁸En bin eko keto i tempulo jamini dedede kame papa mere bin omio but Rubanga, ribo kiton jamini kame kotimo kede saabu kede siliba kame eda oudo emio but Rubanga.

¹⁹Yi doko likame oko bedo paka tuno i mwaka me ot adek kiwie kany me apugan ka Asa.