Read kumam 2 Iyutun 19 Bible Online

2 Iyutun 19 - kumam bible

2 Iyutun 19

¹Abaka Yekosapat me Yuda oko dok ture i Yerusalem kede mulem.

²Enabi Yeku wot ka Kanani oko ot pi riamo kede abaka Yekosapat di eko waco ne be, “Benyo, eber konyo jo areco kede maro jo adagi Rwot? Pi tim noni omio lilo ka Rwot otieko bino i komi.

³Do akadi bed bala kamanono da, in itie kede bero moro. In idudubo ipirin kame oudo cungo pi rubanga adako anyinge Asera i lobo noni, doko da itamo cibo cunyi timo gikame Rubanga mito.”

⁴Bed bala Yekosapat oudo bedo Yerusalem, en oudo esingo maro ot but jo mege, cako ki Bereseba i bad tetu piny paka tuno i ajikini me piny me imukuran me Epuraimu i bad tetu malo, pi waco ne jo dok but Rwot, en Rubanga ka joakwari gi.

⁵En bin eko yero jongolkop i buli bomba acelacel me Yuda kame kocelo kede apama atek

⁶di eko waco negi be, “Gwokerenu kame itienu ngolo kop, pien likame wun ingolunu kop kawang dano moro, do wun ingolunu kop kawang Rwot; en etie kede wu kame itienu ngolo kop.

⁷Nan bedunu kede lworo but Rwot di ikounu gwokere i gi dedede kame itienu timo, pien Rwot Rubanga wa likame tie kede tim me totolo ngolo kop i ateni, akadi bedo kede apokapoka but jo, akadi gamo cemusana.”

⁸I Yerusalem Yekosapat oko yero Jolebi, josaseredoti, kede jotel me miere me Isirael, pi ngolo kope amakere kede turo Iswil ka Rwot, kede ace amakere kede atwomutwomun i diere me jo.

⁹En bin eko ciko gi di ewaco negi be, “Man en epone kame ibinunu tic kede: ibinunu timo tic wu di itienu kede lworo but Rwot, kede di ibedunu jo agenere bute; doko da ibinunu time kede cunyu lung.

¹⁰Kame joe wu me bomba moroni kenekene okelo ne wu pido amakere kede nek, amoto turo iswil amoto cik, wun ipoorenu pwonyo gi kiber iponeso kame kipoore bedo tie kede i esawa me pido, tetekeny kur kibed kede raco me timo dub but Rwot, me wek kur lilo ka Rwot bin i komu karacel kede gin. Poore itimunu kamanono di likame ikounu bedo kede raco moro.

¹¹Amaria Ngatel me Josaseredoti en kame bino telo wu i pido amakere kede kop i kom Rwot; Sebadia wot ka Isimael ngapug me jo me ekeko ka Yuda en kame bino telo wu i pido amakere kede iswilia ka abaka; Jolebi bino neno be oketo i tic kop kame kongolo. Timunu kamanoni kede nwangcuny, akwao Rwot bed tie i bad me jo kame timo gi kopoore!”