Read kumam 2 Iyutun 2 Bible Online

2 Iyutun 2 - kumam bible

2 Iyutun 2

¹Abaka Sulumani bin cunye oko mito gero ne Rwot tempulo, kede da pi gero paco mere me abaka.

²Sulumani bin oko rwako jo i tic tetek; jo tutumia ot kanyaare (70,000) kame yeo jame me gedo, kede jo tutumia ot kanyauni (80,000) kame pao kide. Jo kame daro jotic oudo tie tutumia adek kede tol kanyape (3,600).

³Sulumani bin oko cwano kop but Abaka Kiram me Taya be, “In bin iwinyere kede papa na Daudi di iko bedo cwano ne yen seda me en gero kede gi ot kame en oudo emito bedo iye.

⁴Nan ango amito gero ne Rwot Rubanga na tempulo, di ako bino kwere bute. En ebino bedo kakame komie iye giayala me odok angwe kur, kede kame koyalo ne iye nakanaka mugati kacil, kede kame komie iye giayala awanga odiko kede otieno acelacel, kede i ceng Sabato kede i Ebaga me Por Duwe, kede i ceng adongo ace me woro Rwot Rubanga wa. En eciko ne jo me Isirael pi timo kamanoni nakanaka.

⁵Ot kame ango abino gero bino bedo dwong, pien Rubanga wan dwong kalamo rubangan apat.

⁶Do ngai kame twero gero ne ot, pien akadi malo da, akadi malo kakawiriwir da likame rome? Ango do abedo ngai kamio atwero gero ne ot, kwanyo kenekene kakame komie iye giayala?

⁷Aso, nan cwai na ngatic cing atie kede diru me tic kede nyonyo saabu, siliba, buronsi, kede ayon; kede da di etie kede diru me cweno igoen ebululu ebululu, akwakwar kede akwar, doko da di epwonyere i tic me goro cal i kom jamini. En ebino nywako tic kede jodiru kame tie keda i Yuda kede Yerusalem, jo kame bin papa na Daudi oyero.

⁸Cwai na da ibaon me yen seda, saipuras, kede alegum, pien ango angeo be jotic nin tie kede diru i tic me ibaon me Lebanon. Jotic nango bino tic karacel kede jotic nin

⁹pi iiko nango ibaon di tot adikinicel, pien ot kame ango atie gero obedo ot adwong twatwal, doko da en ebedo ot me aura.

¹⁰Ango abino mino jo ni ayango ibaon ipukoi tutumia ot are (20,000) me engano kame koriego, kede mawele da arom kamanono, kede bwini lita tutumia tol ongwon (400,000), kede mo me olibeti da karom kamanono.”

¹¹Abaka Kiram me Taya oko dwoko ne Sulumani kop kede baluwa kame waco be, “Pi kite kame Rwot maro kede jo mege omio eko keti ibedo abaka me jo mege.

¹²Pak bed but Rwot Rubanga me Isirael, ngat kocweo malo kede piny, en ngat kame emio Daudi awobi ariek, kopong kede diru kede niang, en ngat kame nan emito gero ne Rwot tempulo, kede da gero paco meren me abaka.

¹³Nan ango atie cwano ni ngatic cing ariek di etie kede diru, nyinge Kuram Abi.

¹⁴Toto mere oudo obedo dako me ekeko ka Dan, do papa mere oudo obedo anywali me Taya. En epwonyere timo jamini kede nyonyo saabu, siliba, buronsi, ayon, kede da kide, kede ibaon. Doko da engeo tic kede igoen akwakwar, ebululu ebululu, akwar, kede aliamaliam. En etwero goro cal me gimoroni dedede di elubo ekite kame koporo ne kede. Mie etim tic karacel kede jodiru jotic nin, kede jodiru kame bin otimo tic ne papa ni, Abaka Daudi.

¹⁵Aso nan cwai ne wan engano, mawele, bwini, kede mo me olibeti kame oudo icikere pi cwano.

¹⁶Wan obino yango nin ibaon dedede kame imito ki Lebanon, di oko twetweo gi di oko mino nam molo gi paka Jopa; di do in iko bino kobo gi Yerusalem.”

¹⁷Abaka Sulumani oko maro jokumbor dedede koudo bedo i lobo me Isirael, bala kame papa mere Daudi da bin otimo. Jokumbor dedede oko romo tutumia tol acel kede ot kany kiwie adek ki tol kanyape (153,600).

¹⁸En bin eko mino jo tutumia ot kanyaare (70,000) kikom gi tic me weko jame me gedo, kede jo tutumia ot kanyauni (80,000) tic me pano kide ki mori, kede jo tutumia adek kede tol kanyape (3,600) oko bedo jo kame daro jotic.