Read kumam 2 Iyutun 20 Bible Online

2 Iyutun 20 - kumam bible

2 Iyutun 20

¹Ingei kare moro isirikalen me Moab kede me Amon, karacel kede jo Meunim[5] oko ot pi yi kede Yekosapat.

²Joter kop mogo oko ot waco ne Yekosapat be, “Twon isirikalen me Edom owok ki loka tetuca me Nam Oto kibino pi suri; nan kitieko tuno Kasason Tamar.” (Manoni en nying ace me Engedi.)

³Lworo oko mako Yekosapat, di eko mono kony kibut Rwot. En eko ciko ceng me kanyo kec i Yuda lung.

⁴Jo oko wok ki bomban dedede me Yuda di kiko cokere pi kwano kony kibut Rwot.

⁵Gin karacel kede jo me Yerusalem kiko cokere i diakal anyen me tempulo. Abaka Yekosapat oko ot cungo i nyim gi

⁶di eko lego be, “Okwe Rwot, Rubanga ka joakwari wa, in Rubanga kame tie malo, in ipugo ajakanuto me atekerin dedede. In itie kede teko kede twer kame ngatamoro likame sobolo aruno.

⁷In Rwot Rubanga wa, mam bin in iriamo jo kame oudo bedo i lobo noni kakame jo ni me Isirael oudo tie donyo kede iye, di iko mine but ikwae ka Aburaam, en ngawoti, pi bedo mergi me atwal?

⁸Gin nan kitie bedo i lobo noni, doko da kitieko gero iye tempulo me wori, di kiwaco be,

⁹‘Ka can moro opoto ne wa, karuno bedo di alola me yi, aumpuli, arabo kec, wan obino ot cungo i nyim tempulo noni, kede i nyimi, pien kolwongo ot noni kede nyingi, di wan oko bino kok buti, di in iko winyo koko wa di iko lako wa.’

¹⁰“Nan jo me Amon, Moab kede Edom osuro wa. Kakame joakwari wa bin owok kede ki Misiri, in likame iko yei negi suro lobere nogo, aso gin kiko naco gi kiko weko gi likame kidudubo gi.

¹¹Nan gin kitie culo wa pi manono i yore me gin bino riamo wa ki lobo kame in imio wa.

¹²Okwe in Rubanga wa, benyo, likame ibino ngolo negi kop iko mino gi alola? Pien wan girwa oli kede teko i nyim twon jo atot kobino pi suro wa nogi. Wan likame ongeo gikame opoore timo, do wang wan tie i komi.”

¹³Cuo dedede me Yuda, kede mon gi, kede idwe gi, oudo tie cungo kanono i nyim Rwot.

¹⁴Di tipo ka Rwot oko ot i kom Ngalebi moro koudo tie i diere me jo. Nyinge oudo Yakasiel wot ka Sakaria, wot ka Benaya, wot ka Yeyel, wot ka Matania; en oudo ebedo Ngalebi me ot ka Asap.

¹⁵En ewaco be, “Winyunu wun dedede jo me Yuda kede jo kame bedo Yerusalem, karacel kede abaka Yekosapat. Rwot tie waco ne wu be kur cunyu nyote, doko da kur lworo maku pi twon ekodet me isirikalen jokwor wu; yi nono likame obedo meru do ebedo me ka Rwot.

¹⁶Diki iotunu isurunu gi kakame gin kitie bino wok kede ki yongayo adiding kame kiar wok ki Sis. Ibinunu udo gi i ajikini me aditot, di pwodi likame ituno i wi tim me Yeruel.

¹⁷Likame wun ibinunu yi. Kenekene wun teerenu di ikounu cungo mot, di ikounu bino neno di Rwot mio wu ibwonunu yi. Okwe wun jo me Yuda kede Yerusalem, kur ibedunu kede gungcuny, doko da kur imiunu cunyu nyote; diki otunu isurunu gi, Rwot bino bedo tie kede wu!”

¹⁸Di Yekosapat oko luro nyime piny, di jo dedede me Yuda kede Yerusalem oko riebere piny i nyim Rwot, di kiko wore.

¹⁹Di Jolebi me ekeko ka Kokat kede Kora oko cungo malo di kiko donyo pako Rwot Rubanga me Isirael.

²⁰Odiko sek me ceng kolubo mere jo oko yai di kiko ot i wi tim me Tekoa. Kakame gin oudo kitie yai ot kede, Yekosapat oko cungo malo di eko waco be, “Winyanu, wun jo me Yuda kede jo kame bedo Yerusalem; yeunu Rwot Rubanga wu di en eko bino sipakino wu; yeunu gikame inabin mege waco ne wu.”

²¹Ingei en poro kop kede jo, abaka oko yero jo kame poore wer ne Rwot di kipake di kingapo angapito kacil ameny, di gin kitelo ne isirikalen yongayo di kiwero be, “Opakunu Rwot! Amara mere bedo nakanaka!”

²²Kakame gin kicako kede wer di kipako Rwot, Rwot oko suro jokwor koudo obino pi suro Yuda, gin jo me Amon, Moab, kede jo me moru me Seir, di oko bwono gi.

²³Pien jo me Amon kede Moab oko lokere suro jo me moru me Seir, di kiko neneko gi pitipit; kakame kitieko neneko kede jo me moru me Seir, gin kiko lokere nekere ken gi ken gi.

²⁴Kakame jo me Yuda otuno kede i gedo abor malo me kino piny koudo tie i wi tim, kiko udo di liele tie buto piny, likame tie ngatamoro kobwot.

²⁵Yekosapat kede isirikalen mege oko ot pi yako jame gi, di kiko udo dok, jamini, igoen, kede jamini ace me wel. Gin kiko tieko ceng adek di kitie coko jamini, do jamini oko bedo tot twatwal omio likame kiko twero tero gin dedede.

²⁶I ceng me ongwon gin kiko cokere i Aditot me Bereka[6] di kiko pako Rwot pi gikame oudo etimo.

²⁷Yekosapat oko telo isirikalen mege dok Yerusalem di cuny gi yom, pien Rwot oudo omio gi kilelo i wi jokwor gi.

²⁸Gin kiko donyo Yerusalem di kiko kato akata paka i tempulo ka Rwot di kigoo adungu, kede di kikuto bilo kede agwarai.

²⁹Lworo oko mako jo me ajakanuto me pinye apat kakame kiwinyo kede be Rwot oudo oyi kede jokwor me Isirael di eko bwono gi.

³⁰Di ajakanut ka Yekosapat oko bedo kede anapakin, pien Rubanga mere oudo omie wei ki bad dedede.

³¹Aso Yekosapat oko pugo Yuda. En bin ecako pug di mwakini me dongo mere tie ot adek kiwie kany, di eko pug pi mwakini ot are kiwie kany ki Yerusalem. Toto mere oudo nyinge Asuba nyar ka Siliki.

³²En eko lubo ekite ka papa mere Asa di likame eparao tenge kiye; oudo ebedo timo gi opoore i nyim Rwot.

³³Do abilan me woro rubangan likame oudo kotuturo; jo oudo pwodi likame osipakino cuny gi i kom Rubanga ka joakwari gi.

³⁴Gi ace dedede kame bin Yekosapat otimo, cako ki agege tuno i ajikini kowandiko gi i Itabu me Itatam ka Yeku Wot ka Kanani kame obedo dul me Itatam amako Abakai me Isirael.

³⁵I kare moro Abaka Yekosapat bin oko kodere kede Abaka Akasia me Isirael, ngat koudo otimo jamini areco atot.

³⁶Gin kiko ribere gero imerin i edoket me Esiongeber, imerin kame oudo poore ot Tarusi.

³⁷Do Elieser wot ka Dodabaku me Maresa oko kwenyaro Yekosapat be, “Pi kite kame in ikodere kede Akasia, Rwot bino dudubo gikame igerunu.” Di imerin nogo oko tuturun likame kiko twero ot Tarusi.